‘Hul Wach Maber’ Chuth
1. Wach maber mane ma walando niji?
1 E pinyni kama wach maber nokie, wan kod thuolo mar “hulo Wach Maber mar ng’wono mar Nyasaye.” (Tich 20:24) Mani oriwo nyaka konyo ji mondo ong’e ni machiegni “ndalo mag giko” biro weyo thuolo ni piny manyien makare mar Jehova, kama “gik machon osekadho.” (2 Timo. 3:1-5; Fwe. 21:4) E kindeno tuoche ok nochak obedie kendo. (Isa. 33:24) Joma otho biro wuok e liete mi gichak giriwre gi joodgi kod osiepegi. (Joha. 5:28, 29) Piny mangima ibiro loki obed paradis maber. (Isa. 65:21-23) Magi gin mana ranyisi manok mag wach maber ma walando niji!
2. Ang’o momiyo kinde Rapar bedo thuolo mabeyo ahinya mag hulo wach maber?
2 Dweche mag Mach, April gi Mei biro bedo gi thuolo mabeyo ahinya mag lando weche mabeyogo. E dwechego, kit yamo kuonde mang’eny e piny miyo bedo mayot kawo seche mang’eny e tij lendo. E wi mano, nyasi maduong’ie moloyo, ma en Rapar, ibiro tim chieng’ Ngeso e piny mangima bang’ podho chieng’, dwe mar Mach 22. Ma e kinde ma owinjore wachak timoe ikruok mar lendo kuom seche momedore.
3. Ang’o mabiro konyowa e medo tij lendo kaka joot?
3 Painia Makonyo: Be inyalo timo chenro e thuolo mari mondo ibed painia makonyo kuom dwe achiel, dweche ariyo, kata adekgo duto? Donge unyalo kawo thuolo e puonj maru mar joot mondo uwuo kuom wachni? Ka nitie winjruok maber, ng’at achiel kata ji mokalo achiel kuom joot nyalo bedo painia makonyo. (Nge. 15:22) Keturu wachni e lamo mondo une kaka Jehova gwedho kinda maru. (Nge. 16:3) Kata kapo ni onge ng’ato kuom joot manyalo bedo painia makonyo, ji duto e ot nyalo keto chenro mar medo lendo kuom tiyo kanyachiel gi jogo mabedo painia makonyo.
4. Wanyalo loso chenro marwa mondo wabed painia makonyo kapo ni wan joma ondiki tich e yo mane?
4 Kapo ni in ng’at ma ondiki tich, chenro maber nyalo miyi ibed painia makonyo. Kanyalore, ti gi seche mag gago ma odiechieng’ e lendo. Kata inyalo bedo gi kari mar lendo machiegni gi kama idakie kata kama itiye mondo ilend kuom saa madirom achiel kapok tich ochakore kata bang’ tich. Inyalo medo thuolo e chenro mari ka ichoro weche moko ma ok ochuno ahinya e dwe machielo kendo kuom kawo odiechieng’ mangima giko juma e tij lendo. Jomoko osekawo odiechieng’ achiel kata ariyo kuom ndalo rusa e tiyo tij lendo.
5. Inyalo konyo nade joma oti kod joma tuore mondo obed painia makonyo?
5 Ka in ng’at moti, ma tuore kata ma tekone tin, inyalo bedo painia makonyo kuom kawo seche matin tin odiechieng’ kodiechieng’ e tij lendo. Kwa Jehova mondo omiyi ‘teko maduong’ ahinya.’ (2 Kor. 4:7) Nyaminwa moro ne obedo painia makonyo ka en jahigini 106! Nikech kony ma ne oyudo kuom wedene ma Jokristo kod jomamoko e kanyakla, ne olendo ot ka ot, odok limo joma ne oselendoni, otimo puonjruok Muma gi ji, kod yore mamoko mag lendo. Ne okonyo e chako puonjruok Muma gi ji apar. Owacho kama “Ka aparo kuom thuolo maber ma ne ayudo mar bedo painia makonyo, chunya pong’ gi hera kod erokamano kuom Jehova gi Wuode kaachiel gi riwruok mar oganda Joge. Kuom adier, adwaro wacho ni ‘erokamano, Jehova!’”
6. Rowere ma osebatisi ma podi ni e skul nyalo timo ang’o mondo obed painia makonyo nade?
6 Ka in rawera ma osebatisi to podi in e skul, in bende inyalo bedo painia makonyo. Mana kaka jogo mondik tich, in bende nyalo bedo ni ibiro tiyo gi giko juma moloyo e chenro mari e tiyo tij lendo. Bende kanyalore, lend kuom saa madirom achiel bang’ skul e odiechienge moko. Be nitie odiechieng yueyo mar skul ma inyalo tiyogo e tij lendo? Ka idwaro bedo painia makonyo, wuo gi jonyuolni kuom wachno.
7. Jodong-kanyakla nyalo timo ang’o mondo gimed ilo mar kanyakla ne tij lendo e kinde Rapar?
7 Meduru Ilo Ne Jolendo: Jodong-kanyakla nyalo konyo ahinya e medo ilo mar kanyakla ne tij painia makonyo kuom ranyisi margi. (1 Pet. 5:2, 3) Ginyalo neno ka digichan romo moko mag chano dhi lendo ne jogo mabiro tiyo tij lendo gokinyi mang’ich, bang’ skul kata bang’ tich. Jarit tij lendo onego ne ni jolendo mowinjore omi migawo mar tayo romo mar chano dhi lendo kendo ni kar lendo moromo nitie, kendo ni gasede koda buge moromo nitie e dwechegi mag lendo makende.
8. Ang’o ma wapuonjore kuom gima ne otimore e kanyakla moro?
8 E kanyakla moro, jodongo ne ochako jiwo wach bedo painia makonyo dweche mang’eny kapok dweche makendego ochopo. Ne gilando ne kanyakla juma ka juma kwan mar jolendo ma ne osepuodhi mondo obed painia makonyo. Mani ne omiyo jogo ma ne gombo bedo painia makonyo ng’eyo ni ne gidhi yudo ji mang’eny ma ne biro riwogi lwedo. Romo mamoko mag chano dhi lendo ne oket okinyi mang’ich kod odhiambo bende. Mano ne omiyo jolendo 53 obedo painia makonyo e dwe mar April, chiegni nus mar kanyakla!
9. Ang’o momiyo kinde Rapar gin kinde maber ne jogo mowinjore bedo jolendo mondo ochak lando wach maber?
9 Kony Jomamoko Olendi: Sama joma nyien kod rowere obedo jolendo, inyalo gwelgi mondo giti tij lendo gi jolendo molony. Thuolo ma kamano nyalo yudore ndalo Rapar ma en kinde ma ji mang’eny e kanyakla biro tiyo tij lendo e yo momedore. Be in gi japuonjre Muma moro matimo dongruok kendo ma osetimo lokruok e ngimane mondo odag kaluwore gi chike makare mag Jehova? Be in gi nyithindo ma timbegi beyo kendo matimo dongruok maber to pok gibedo jolendo? Ka gisewacho ni gidwaro bedo jolendo kendo ineno ni giwonjore bedo, nyis achiel kuom jodong-kanyakla. Jarit matayo kanyakla biro timo chenro mondo jodongo ariyo owuo kodi kaachiel gi nyathini kata japuonjreni.
10. Ang’o ma jodongo nyalo timo mondo gikony jogo ma odok chien moweyo tij lendo?
10 Dweche mabiro bende nobed kinde maber ne jogo ma odok chien moweyo tij lendo mondo ochak tiyo gi kanyakla kendo. Jorit Puonjruok Buk mar Kanyakla kod jodongo mamoko onego otim kinda mar limo joma kamago, gigwelgi mondo gilend kanyachiel. Kapo ni gisebedo ka ok gilend kuom kinde mogwaro, jodongo ariyo onego owuo kodgi mokwongo mondo gine ka giwinjore chako lendo kendo.—km 11/00 (Swahili) ite mar 3.
11. Ranyisi maduong’ moloyo mar “ng’wono mar Nyasaye” en mane?
11 Ikri Ne Rapar: Rawar e ranyisi maduong’ moloyo mar “ng’wono mar Nyasaye.” (Tich 20:24) Tara mag ji e piny mangima ma nigi chuny ma nyiso erokamano biro romo chieng’ Ngeso, bang’ podho chieng’ dwe mar Mach 22, mondo gitim Rapar mar tho Kristo. Wadwaro gwelo kendo konyo jogo duto ma nigi chuny makare mondo obedie nyasi maduong’ ahinyani ma chiwo neno kuom ng’wono maduong’ ma Jehova onyiso dhano.
12. Jo mage ma wanyalo gwelo e Rapar?
12 Ndik nying jogo midwaro gwelo piny. Onge kiawa ni e kind nying mibiro ndiko ibiro keto mag wedeni, jo modak machiegni kodi, jo ming’eyo kar tich kata e skul, jo ma ne ipuonjrigo Muma kod ma ipuonjrigo sani, kod ji duto ma ijalimo pile ka pile. Ka kuom jogo migwelo nitie manyalo bedo gi penjo e wi Rapar, inyalo konyogi kitiyo gi apendiks ma wuoyo kuom Chiemb Odhiambo mar Ruoth e ite mag 206-208 mar bug Muma Puonjo. Timo kamano bende nyalo konyi e chako puonjruok Muma gi ng’ato, nikech obiro miyi thuolo mar nyise buk ma watiyogo e chako puonjruok Muma gi ji.
13. Jehova ne ogwedho nade kinda mar jolendo ariyo ma ne oyiero gwelo jomoko e Rapar?
13 Nyaminwa moro ne ondiko nying ji 48 ma ne ochano gwelo. Kane ogwelo ng’ato ka ng’ato, ne okiewo nying’gi kendo ne ondiko tarik ma ne ogwelogie. Mano ne en mor manade kuome kane ji 26 ma ne ogwelo obiro e Rapar! Owadwa moro ma nigi duka ne ogwelo ng’at moro ma tiyone ma chon ne en jadolo. Ng’atno ne obiro kendo bang’e ne owuoro ni, “Kuom saa achiel, ne apuonjora gik mang’eny e Muma, moloyo ma ne osepuonjora e Kanisa mar Katholik e higini 30.” Kinde matin bang’ Rapar, ne oyie puonjruok e bug Muma Puonjo.
14. Kampen mane ma biro chakre Mach 1 e piny mangima?
14 Kampen: Chakre Mach 1, Ngeso, nyaka Mach 22, kalatas makende mar gwelo ji e Rapar ibiro chiw e piny mangima. Biro bedo maber ka jolendo duto otimo duto ma ginyalo e kampenni. Ber miyo wuon ot kalatasno en owuon moloyo weye e dhoode. Kata kamano, kapo ni un gi kar lendo maduong’, jodong-kanyakla nyalo neno ka kalatasego inyalo we e yo mowinjore e ute joma ok oyudore. E giko juma, wabiro chiwo gasede manyien bende.
15. Ang’o ma wanyalo wacho sama wachiwo kalatas mar gwelo ji e Rapar?
15 Bedo ni wan gi kinde manok mag chiwo kalatasego, ber bedo gi weche machuok ka wachiwogi. Nyis mor kod ilo. Inyalo wacho kama: “Ok wadwar kadho ma ok wagweli, joodi, kod osiepeni e nyasi maduong’ ma ibiro tim Mach 22. Kalatasni wagweligo. Ibiro yudo weche mang’eny kuom nyasino e kalatasno.” Wuon ot nyalo bedo gi penjo. Kata onyalo yie kawo kalatasno kendo owach ni obiro chopo. Ket wuon odno e paro, kendo ichan mar dok lime.
16. Wach mane ma ne otimore manyiso ber mar kampen mar gwelo ji modak e alwora mondo obi e Rapar?
16 Higa mokalo, askar ma jalweny ne oyudo kalatas mar gwelo ji e Rapar e dhoode. Ne oyiero biro, kata kamano ne dwarore ni omiye rusa gi jatende. Kane onyiso jatende kalatasno, jatende ne oling’ matin kae to onyise ni jonyuolne gin Joneno kendo ni ne ojadhi e chokruoge kodgi. Jatendeno ne ok omiye mana rusa mar dhi e Rapar kende, to ne odhi kode e Raparno!
17. Wanyiso e yo mane ni ok wakawo ng’wono mar Nyasaye kayiem nono?
17 Nyis Erokamano: E kinde ma Rapar mar higa 2008 medo sudo machiegni, waduto waparuru ng’wono mar Jehova ma osenyisowa. Jaote Paulo ne ondiko kama: “Wahombou bende ni kik uyud ng’wono kayiem nono.” (2 Kor. 6:1) Wanyalo nyiso e yo mane ni ok wakawo ng’wono mar Nyasaye kayiem nono? Paulo ne ondiko kama: “E weche duto wanyisore kaka jotich Nyasaye.” (2 Kor. 6:4) Kuom mano, wanyiso erokamano kuom mich mar Jehova gi timbewa mabeyo kod kinda mar lando wach maber. E kinde mabiro mar Rapar, wabiro bedo gi thuolo maber ahinya mar medo tiyo tij lendo, ka wahulo wach maber chuth.
[Sanduk manie ite mar 3]
Joma Nyalo Bedo Painia Makonyo Oriwo Ng’ano Giri?
◼ Joot
◼ Jogo ma ondiki tich
◼ Jogo ma tuore gi jogo ma oti
◼ Jogo manie skul
[Sanduk manie ite mar 4]
Sama Wachiwo Kalatese mag Gwelo Ji e Rapar:
◼ Wuo machuok; wuo gi ilo
◼ Ket wuon ot e paro kae to idog lime
◼ Chiw gasede e giko juma