Chenro Maber Keto Kuom Higa Manyien e Tij Nyasaye
1. En chenro mane ma wanyalo keto e paro kuom higa manyien e tij Nyasaye?
1 Ka wadwaro timo dongruok e wach Nyasaye, nyaka waket chenro mar gima wadwaro chopo. Gin chenro mage ma iseketo kuom gik ma idwaro timo? Chenro maber ahinya en bedo painia makonyo kuom dwe achiel kata dweche mokalo achiel. Nikech tich majaberni dwaro ni mondo ng’ato otim chenro motelo, sani e kinde maber mar chako ng’iyo nyime. Ang’o momiyo onego ipar bedo painia makonyo kaka chenro monego iket?
2. Ang’o momiyo onego ichan bedo painia makonyo kaka chenro monego iket?
2 Gik Momiyo Ber Bedo Painia Makonyo: Bedo painia makonyo miyo wamoro Wuonwa manie polo “moloyo” kuom tiyo gi seche momedore e tij lendo. (1 Thes. 4:1) Ka waparo gigo duto ma Jehova osetimonwa, chunywa miyowa gombo mar wuoyo kuome gi jomoko. (Zab. 34:1, 2) Jehova neno kendo kawo kaka gima duong’ okang’ ma wachiworego mondo wati tij lendo e okang’ momedore. (Hibr. 6:10) Ng’eyo ni kuom tiyo matek wamoro Jehova, mano kelonwa mor mang’eny.—1 Weche 29:9.
3, 4. Bedo painia makonyo kelonwa ber e yo mane?
3 Pile kaka imedo timo gimoro, e kaka omedo bedo mayot kendo ma mori timo. Tiyo tij lendo kuom seche momedore biro miyo obedni mayot wuoyo gi ji e ot ka ot. Ibiro bedo molony e chako mbaka gi ji kendo lony e tiyo gi Muma. Kaka imedo wuoyo kuom yie ma in-go kuom Nyasaye, e kaka yieno biro medo bedo motegno. Ng’eny jogo ma ne onge gi jopuonjre Muma, ne ochako puonjre gi ng’ato Muma kane gibedo painia makonyo.
4 Bedo painia makonyo bende nyalo jiwo ng’ato mondo ochak timo dongruok e wach Nyasaye. Owadwa ma ne en painia mapile chon, ne neno ni ne oketo chunye ahinya e tij ringruok, mi ong’ado ni mondo obed painia makonyo kuom dwe achiel. Ne owacho kama: “Ne awuoro kaka dwe achielno ne ojiwa e wach Nyasaye! Ne atimo chenro mar bedo painia makonyo kuom dweche maluwore, mi mano ne omiyo abedo painia mapile kendo.”
5. Ere kaka wanyalo loyo paro mar ni ok wan-gi lony?
5 Loyo Gigo Manyalo Monowa: Jomoko nyalo bedo gi luoro mar bedo painia makonyo nikech gineno ni ok gin gi lony e tij lendo. Ka mano en gima moni bedo painia, Jehova nyalo konyi mana kaka ne okonyo Jeremia. (Yere. 1:6-10) Kata obedo ni Musa ne nigi ‘dhok mapek kendo lep mapek,’ Jehova ne otiyo kode e chopo dwaro Mare. (Wuok 4:10-12) Ka ineno ni ionge gi lony, kwa Jehova mondo omiyi chir.
6. Bedo painia makonyo en gima nyalore e yo mane kata obedo ni ng’ato en jamidekre kata en ng’at modich?
6 Be iluoro bedo painia nikech in jamidekre kata nikech dich mag ngima? Ka in jamidekre, tiyo mos kaluwore gi nyalo mari nyalo miyo bedo painia makonyo obed gima nyalore. Ka in-gi dich e ngima, inyalo keto mondo ibi itim moko kuom gigo ma ok ochuno e dwe machielo. Jomoko matiyo tije andika oseketo kinde mar bedo painia makonyo ka gikawo rusa mar odiechieng’ achiel kata ariyo.—Kolo. 4:5.
7. Ang’o momiyo en gima konyo kwayo Jehova e lamo kuom gomboni mar bedo painia makonyo?
7 Kaka Inyalo Timo Kamano: Kwa Jehova mondo okonyi e gombo mari mar bedo painia makonyo. Kwaye mondo ogwedh kinda mari mar tiyo tij lendo e yo momedore. (Rumi 12:11, 12) Onyalo konyi mondo ing’ad paro maber kuom kaka inyalo timo lokruok e chenro mari mapile. (Jak. 1:5) Ka ok in-gi gombo mar bedo painia makonyo, kwa Jehova mondo okonyi yudo mor e tij lendo.—Luka 10:1, 17.
8. Tiyo kod Ngeche 15:22 nyalo konyi e yo mane mondo ibed painia makonyo?
8 Wuouru kaka joot kuom chenro mar bedo painia makonyo. (Nge. 15:22) Kanyalore, ng’at achiel kuom joot nyalo bedo painia makonyo ka iriwe lwedo gi joodgi. Wuo gi jomoko e kanyakla kuom gombo mari mar bedo painia, to moloyo gi jogo ma nigi chenro machal gi mari. Timo kamano nyalo jiwowa kata miyowa ilo mar bedo painia makonyo.
9. Gin dweche mage ma inyalo yiero bedoe painia makonyo?
9 Sama inono chenro magi mag tij Nyasaye mar higa manyien, ineno ni inyalo bedo painia makonyo kinde mage? Ka in ng’at ma ondik tich kinde duto kata idhi e skul, inyalo paro dweche ma nigi odiechieng’ yueyo kata ma nigi odiechienge mag Ngeso abich kata Jumapil abich. Kuom ranyisi, dweche mag Septemba, Desemba, Mach, kod Agost nigi giko jumbe abich. Dwe mar Mei nigi odiechienge mag Ngeso abich, kendo Jun nigi odiechienge mag Jumapil abich. Ka in jamidekre, par dweche ma kit yamo hinyo bedo maber. Bende inyalo paro bedo painia makonyo e dwe ma jarit-alwora biro timoe limbe e kanyaklau. Juma ma olimo kanyaklau, ibiro bedo gi thuolo mar bedo kuom nus sa, e chokruok ma otimo gi jopainia mapile. Nikech Rapar notimre Mach 22 higa mabiro, dweche mag Mach, April, kod Mei gin dweche mabeyo bedoe painia makonyo. Ka iseyiero dwe kata dweche ma idwaro bedoe painia makonyo, chak ndiko piny chenro mabiro konyi chopo kwan seche madwarore.
10. Ang’o ma inyalo timo ka ok inyal bedo painia makonyo?
10 Kata obedo ni ineno ni ok inyal bedo painia makonyo e higa manyien mabironi, podi inyalo nyiso chuny mar bedo painia. Dhi nyime gi timo duto ma inyalo e tij lendo, ka in-gi yie ni Jehova mor kod kinda mitimo gi chunyi duto e tichne. (Gala. 6:4) Riw lwedo kendo ijiw jogo ma gin painia makonyo. Inyalo timo lokruok e chenro mari mapile imed odiechieng’ achiel mar lendo e wi odiechienge mijalendoe e juma mondo ilend gi jogo magin painia.
11. Ang’o momiyo ok onego wabed kod paro mar deko?
11 Oganda Jehova ong’eyo ni magi gin kinde ma ok onego gibed gi paro mar deko. Nitie tich monego otim, ma en tij lando wach maber. Ngima ji ni kama rach, kendo ndalo modong’ nok. (1 Kor. 7:29-31) Hero Nyasaye koda hero dhano wadwa biro jiwowa mondo watim duto ma wanyalo e tij lendo. Kuom timo kinda kod bedo gi chenro maber, wanyalo bedo painia makonyo kata mana kuom dwe achiel e higa manyien mar tij Nyasaye, ma en chenro maber ahinya monego wachop!