Thuolo Momedore mag Pako Jehova
1. En chenro mane manyien ma miyowa thuolo mar ‘goyo ne Jehova erokamano ahinya’?
1 Chakre Mach higani, noket chenro manyien ma miyo jolendo thuolo mar bedo jopainia makonyo kuom seche 30 e dwe mar Mach, April, kod e dweche ma jarit-alwora limoe kanyaklagi. Ka juma ma jarit-alwora limoe kanyaklau chakore e dwe moro to rumo e machielo, jolendo ma dwaro bedo jopainia makonyo kuom seche 30 nyalo yiero achiel kuom dwechego. Jopainia makonyo duto biro yudo thuolo mar bedo e romo ma jarit-alwora timoga gi jopainia mapile kod makende nyaka e giko romono. Mano nyiso ni kata kapo ni ok wanyal bedo jopainia makonyo kuom seche 50, pod wan gi yo mar ‘goyo ne Jehova erokamano ahinya’ nikech wan-gi thuolo mar bedo jopainia makonyo ding’wen e higa ka walendo kuom seche 30!—Zab. 109:30; 119:171.
2. Gin ber mage ma jolendo ma biro bedo jopainia makonyo e limbe mag jarit-alwora biro yudo?
2 E Limbe mag Jarit-Alwora: Jolendo mang’eny koro biro yudo thuolo mar bedo jopainia makonyo e limbe mag jarit-alwora kendo gibiro yudo mor gi jip ka gilendo gi jarit-alworano. (Rumi 1:11, 12) Moko kuomgi nyalo chano odiechieng’ moro achiel e kor juma mondo gilend gi jarit-alwora. Jopainia makonyo ma dhi tich e kor juma nyalo kwaye mondo gilend kode chieng’ Ngeso kata Jumapil. E wi mano, jopainia makonyo biro yudo jip ndi kuom bedo e romo kanyachiel gi jopainia mapile kod makende.
3. Ang’o momiyo kinde Rapar miyowa thuolo maber ahinya mar bedo jopainia makonyo?
3 E Dweche mag Mach kod April: Jolendo ma ne bedoga jopainia makonyo e chenro machon mar lendo kuom seche 30 e dwe achiel kende e kinde Rapar, koro nyalo medo thuologi mag chiwo ne Jehova “misango ma en pak.” (Hib. 13:15) Mach kod April gin dweche makende mag tiyo ne Jehova e okang’ momedore kaka jopainia makonyo. Mano en nikech wajotimo kampen mar gwelo ji e Rapar e dwechego. E wi mano, nikech kinde mag Rapargo ema jolendo mang’eny joyudoree, wanyalo nwang’o thuolo mag yalo gi jolendo mopogore opogore. Bang’e, walimoga joma obiro e Rapar, kendo jiwogi mondo gibi giwinj twak makende bende. Be ibiro tiyo maber gi thuolo momedore mag bedo painia makonyo?—Luka 6:45.