Tim Chenro Sani Mondo IIend Kuom Thuolo Momedore
1. Kinde mag Rapar miyowa thuolo mar timo ang’o, kendo ere kaka wanyalo ikore ne timo kamano?
1 Higa ka higa, kinde mag Rapar miyowa thuolo maber mar ‘goyo ne Jehova erokamano ahinya.’ (Zab. 109:30) Be ibiro lendo e okang’ momedore e dwe mar Mach mondo igo ne Nyasaye erokamano kuom chiwonwa rawar? Ma e sa mar chako timo chenro.—Nge. 21:5.
2. In kaachiel gi jolendo mamoko ne utiyo nade gi thuolo mar bedo jopainia makonyo malendo kuom seche moduok chien e dwe mar April higa mokalo?
2 Bedo Painia Makonyo: Higa mokalo jolendo e kanyakla mang’eny ne omor ahinya kane oland ni nitie thuolo mar bedo jopainia makonyo e dwe mar April kuom seche ma oduok piny. Owadwa moro nondiko kama: “Pod an e sekondari, kendo pok obedona mayot bedo painia mapile. Kata kamano, e dwe mar April, abiro kwayo mondo abed painia machopo seche 30, to abiro temo ahinya chopo seche 50.” Nyaminwa moro matiyo tij andika kuom thuolone duto nondiko kama: “Seche piero adek kende—mano yot!” Kane oland wachni, nyaminwa moro ma jahigini 80 gi dire machon ne en painia, nowacho kama: “Ma e thuolo ma asebedo ka arito! Jehova ong’eyo ni kinde ma ne an painia e kinde ma ne amorie moloyo!” Jomamoko ma ne ok nyal bedo jopainia makonyo notimo chenro mondo gilend kuom thuolo momedore.
3. Ang’o momiyo ng’ato onego onon kabe onyalo bedo painia makonyo e dweche mag Mach, April, gi Mei?
3 Dwe mar Mach dhi bedo mowinjore ahinya gi tij painia makonyo nikech wabiro bedo gi thuolo machielo mar yiero lendo kuom seche 30 kata 50. E wi mano, chakre Ngeso Mach 17, wabiro bedo gi kampen makende mar gwelo ji obi e Rapar ma wabiro timo April 5. Nikech jolendo mang’eny biro yudo mor ahinya mar lendo kuom thuolo momedore e dwe mar Mach, moko kuomgi biro dwaro dhi nyime bedo jopainia e dweche mag April gi Mei ka gilendo kuom seche 50.
4. Ang’o mwanyalo timo mondo walend kuom thuolo momedore, to mano biro kelo ber mage?
4 E Lamo mar Joot maluwo, donge nyalo bedo maber ka uwuoyo kuom kaka ng’ato ka ng’ato e odu nyalo lendo kuom thuolo momedore e kinde mag Rapar? (Nge. 15:22) Kwa Jehova mondo ogwedh kinda mitimo. (1 Joh. 3:22) Ka ilendo kuom thuolo momedore, ibiro medo kelo pak ne Jehova, kendo mor mari biro medore.—2 Kor. 9:6.