Kaka Wanyalo Chopo e Chuny Joma Wapuonjo
1. Gik ma Yesu ne puonjo nomiyo jowinjone owinjo nade e chunygi?
1 Yesu Kristo nochopo e chuny jowinjone. Nitie kinde moro ma chuny jopuonjrene ‘noil ahinya’ bang’ leronegi tiend Ndiko moko. (Luka 24:32) Nikech ng’ato nyaka luw chike Nyasaye kowuok e chunye, ere kaka wanyalo chopo e chuny joma wapuonjo mondo wakonygi timo lokruok mapiyo e ngimagi?—Rumi 6:17.
2. Rieko konyowa nade chopo e chuny ng’ato?
2 Ti gi Rieko: Kinde mathoth, nyiso ng’ato mana gik makare kod ma ok kare ok oromo konyo ng’atno kawo Wach Nyasaye gi pek. Kuom adier, kwedo akweda yie ma ng’ato nigo kitiyo gi Ndiko mang’eny nyalo miyo ng’atno kik rwak wach Nyasaye. Mondo wakony ng’ato, nyaka wati gi rieko e ng’eyo gimomiyo oyie gi puonj moro, kata gimomiyo otimo tim moro. Ka watiyo gi rieko kod penjo mwaiko maber mano biro jiwo ng’atno mondo owach gik manie chunye. (Nge. 20:5) Kwatiyo gi yorno to wanyalo fwenyo Ndiko mwanyalo tiyogo mwachop e chunye. Kuom mano, dwarore ni wadew ng’ato gadier, kendo wahore mos. (Nge. 25:15) Ket e paro ni ji ok chalre e yo ma gitimoe dongruok e Wach Nyasaye. Chiw thuolo moromo mondo roho maler mar Jehova okonye loko pache kod timbene.—Mar. 4:26-29.
3. Ere kaka wanyalo konyo joma wapuonjo Muma mondo onyag kido mabeyo?
3 Konygi Mondo Ginyag Kido Mabeyo: Sigendni manie Muma ma lero kido mag Jehova kaka berne kod herane nyalo konyo joma wapuonjo mondo onyag kido mabeyo. Wanyalo tiyo gi Ndiko kaka Zaburi 139:1-4 kata Luka 12:6, 7 e nyiso kaka Nyasaye dewo ng’ato ka ng’ato kuomwa. Sama ng’ato onyiso ni kuom adier Jehova osenyise ng’wono mogundho, obiro medo hero Jehova, kendo kindane e tij Nyasaye biro medore. (Rumi 5:6-8; 1 Joh. 4:19) Bende, ka gipuonjore ni timbegi nyalo moro chuny Jehova, mano nyalo jiwogi mondo gitim mana gik ma biro more kendo miye duong’.—Zab. 78:40, 41; Nge. 23:15.
4. Ere kaka wanyalo miyo joma wapuonjo Muma thuolo mar timo yiero margi giwegi?
4 Jehova ok chun ng’ato ang’ata mondo oluw chikene. Kar mano, ogombo ni ng’ato oluw chikene bang’ neno kaka chikego miyo ng’ato bedo mariek. (Isa. 48:17, 18) Waluwo ranyisi mar Jehova ka wapuonjo ng’ato kendo konye otim yiero en owuon. Sama ng’ato owuon oneno gimomiyo dwarore ni otim lokruok e ngimane, mano kelone ber mogundho. (Rumi 12:2) Kendo mano chwalogi machiegni ahinya gi Jehova ma nono “chuny ji.”—Nge. 17:3.