Yo ma Jachuech ma Jahera Nyisowago Gik Mosingonwa

Chakre ne chue dhano, Jachuechwa osebedo ka wuoyo gi joge kotiyo gi malaike kod jonabi. E wi mano, noneno ni ber mondo ondik wechene kod singoge. Singogo nyalo miyo ibed gi ngima maber e kinde ma biro. Omiyo, ere kama inyalo yudoe gik ma Nyasaye osingo?

Weche ma Nyasaye ondikonwa yudore e Ndiko Maler. (2 Timotheo 3:16) Ere kaka Nyasaye notiyo gi jonabi e ndiko wechego? (2 Petro 1:21) Nyasaye noketo wechene e pach jondikogo, kae to jondikogo ondikogi. Nitie ranyisi moro ma kindewagi ma nyalo konyowa winjo tiend wachno maber. Ka po ni ja ohala moro onyiso sekretari mare ni ondik barua moro, be inyalo wach ni baruano owuok kuom sekretarino? Ooyo. Kamano bende, kata obedo ni Nyasaye ne otiyo gi dhano e ndiko wechene, en e Wuon Ndiko Maler.

WACH NYASAYE YUDORE E DHOK MANG’ENY

Nikech Wach Nyasaye oting’o ote makende, odwaro ni dhano duto osome kendo owinj tiende. E kindewagi, “wach maber ma nyaka chieng’” yudore ne “dhoudi duto, gi dhok duto, kod pinje duto.” (Fweny 14:6) Nyasaye osemiyo Ndiko Maler oyudore e dhok mokalo 3,000 ka en oduto kata bethene moko. Onge buk moro amora machielo ma yudore e dhok mang’eny kamano.