Ang’o ma Nyalo Konyi Ng’eyo Kaka Ngimani Biro Chalo e Kinde Mabiro?
Ji mang’eny paroga ni nitie teko moro ma ok ne ma chiko ngimagi ma kinde mabiro. Paro ma kamano miyo gidonjoga e timbe moko ma giparo ni nyalo miyo ngimagi obed maber e kinde mabiro.
PARO MA JI MANG’ENY OYIEGO
TIYO GI SULWE: Nitie joma paroga ni ngimagi ma kinde mabiro otudore gi kaka sulwe nochanore e seche ma nonyuolgie. Gidhiga ir jonon sulwe mondo okonygi ng’eyo kaka ngimagi ma kiny biro chalo, kendo neno gima ginyalo timo ka po ni gifwenyo ni nitie gima nyalo hinyogi.
FENG SHUI: Jomoko oyiega ni ka gigedo kamoro kata e yo moro sie, to mano nyalo miyo gibed gi ngima maber e kinde mabiro. Lo Wing,a modak e piny Hong Kong wacho kama: “Achiel kuom jotelo mag feng shui nonyisa ni ka aketo kidi moro mar kristol kamoro sie e dukana, to mano biro konya loso pesa mang’eny.”
LAMO KWERE MA NOSETHO: Nitie joma paroga ni ka gilamo kweregi ma nosetho kata sanamu moro to mano biro miyo giyud arita maber kod gueth. Van modak Vietnam wacho kama: “Naparoga ni ka adok pacho mi amiyo kwerena ma nosetho luor, to mano biro miyo an kaachiel gi nyithinda wabed gi ngima maber sani, kod e kinde mabiro.”
NYUOLO NG’AT MOSETHO E YO MORO MA CHIELO: Jomoko paroga ni ka ng’ato osetho to inyuolega kendo mondo obed gimoro machielo kata dhano machielo. Giparoga ni gik maricho kata mabeyo ma timorenegi sani, luwore gi ngimagi machon ka ne pok githo monyuolgi kendo.
Kata kamano, ji mathoth neno timbe ma wasewuoyoego kaka timbe mag juok. To e ma pod gipenjoga wach kuom jonon sulwe, josom lwedo, jokor wach, kod jomamoko ma kamago. Giparoga ni joma kamago nyalo konyogi ng’eyo kaka ngimagi ma kiny biro chalo.
BE TIMBE KAKA MAGO OSEKONYO JI?
Be joma ogeno timbe kaka mago odak maber? To be gin gadier ni ngimagi ma kiny biro dhi maber?
Ne ane ranyisi mar Hào modak Vietnam. Nomanyo kony kuom jonon sulwe, feng shui, kod kwerene ma nosetho. To be ne gikonye? Owacho kama: “Ohanda nopodho, nadonjo e gope mang’eny, nachwanyora gi jooda, kendo nadong’ ka chunya onyosore ahinya.”
Qiuming, ma a Taiwan bende nogeno kuom jonon sulwe, noyie kuom puonj moro ma wacho ni ng’ato ka otho to inyuole gimoro machielo kata dhano machielo, noyie ni ngima mar ng’ato nosechan chon, noyie kuom feng shui, kendo nolamo kwere ma nosetho. Bang’ nono wechego matut, nowacho kama: “Nafwenyo ni puonjgo ne guenyore kendo ne ginyalo chocho ng’ato. Nafwenyo ni joma koro wach ka gitiyo gi sulwe kinde mang’eny ok wachga adiera. Kae to bende, ka ng’ato ok onyal paro ngimane machon ka ne pok onyuole, ere kaka onyalo timo lokruok mondo koro odag maber e ngima ma sani?”
“Nafwenyo ni puonjgo ne guenyore kendo ne ginyalo chocho ng’ato.” —QIUMING, TAIWAN
Mana kaka Hào kod Qiuming, ji mathoth bende osefwenyo ni ngimawa ma kinde mabiro ok chik gi kaka gik moko nosechan chon, nono sulwe, lamo jomotho, kata nyuolo ng’at mosetho kendo. Be mano nyiso ni koro ok wanyal chiko kaka ngimawa nyalo chalo e kinde mabiro?
Ji mang’eny paroga ni ka giyudo somo ma malo kod mwandu, to ngimagi ma kinde mabiro biro bedo maber. Ngima osebedo nade ne joma luwo paro kaka mago?
a Nyinge moko oloki e sulani kod e sula mamoko ma luwo.
b Wechego yudore e Muma Maler e Jo-Galatia 6:7. Paro ma yudore e ndikono winjore gi ngero moro ma wacho ni: “Kipidho afuoto, to afuoto e ma inika; to kipidho oganda, to oganda e ma inika.”