Be Nitie Gima Nyalo Konyi Ng’eyo Kaka Inyalo Dak Maber e Kinde Mabiro?

Mana kaka waseneno e sula mokalogi, ji mathoth gomboga ng’eyo kaka ngimagi biro chalo e kinde mabiro. Mano osemiyo moko kuomgi oyie kuom puonj ma wacho ni gik ma timore e ngima ng’ato nosechan chon, giluwo somo ma malo, gimanyo mwandu, kendo gitemo bedo joma beyo. Timo gik ma kamago chalo gi ng’at ma nigi map ma ok nyal konye chopo kama odwaro dhiye. Be mano nyiso ni onge gima nyalo konyowa ng’eyo ngimawa ma kinde mabiro? Ooyo!

WANYALO YUDO KONY KOA KUOM NG’AT MORO MA NIGI TEKO

Kinde mang’eny ka wadwaro timo yiero moko, wasumoga paro kuom joma hikgi ohingowa kata joma riek moloyowa. Kamano bende, wanyalo ng’eyo ngimawa ma kinde mabiro ka wasumo paro kuom Ng’at moro ma hike ng’eny ahinya kendo mariek moloyowa. Weche ma wuok kuom Ng’atno yudore e Ndiko Maler ma ne ochak ndik higni ma dirom 3,500 mokalo. Ndikogo yudore e buk miluongo ni Muma.

Ang’o momiyo inyalo geno Muma? En nikech ng’ama nondike osedak kuom higni mang’eny moloyo ng’ato ang’ata kendo mariek moloyo ji duto e piny gi polo. Muma luonge ni “Ng’at ma Hike Ng’eny” kendo ni “ng’at ma nyaka nene kendo ma nyaka chieng’.” (Daniel 7:9; Zaburi 90:2) En e “Nyasaye madier ma nochueyo polo . . . [kendo] ma nochueyo piny.” (Isaya 45:18) Muma nyisowa ni nyinge Jehova.—Zaburi 83:18.

Nikech Muma en buk moa kuom Jachuech, ng’ato ang’ata nyalo some kendo yudo kony. Puonjge tiyo kinde duto kendo osekonyo ji mang’eny ma wuok kuonde mopogore opogore e piny mangima. Oyudore e dhok mang’eny mopogore opogore kendo ji mathoth ni kode e piny mangima.a Mano nyiso ni otayo ji mang’eny nikech ginyalo winjo weche manie iye e yo mayot. Wechego siro gima Muma owuon wacho niya:

“Nyasaye ok buon ng’ato ang’ata, to e oganda moro amora, ng’at moluore kendo ma timo gik makare oyiego.”—TICH JOOTE 10:34, 35.

Mana kaka janyuol mohero nyithinde tayogiga, Jehova Nyasaye ma en Wuoro ma jahera osemiyowa Muma ma en Wachne mondo otawa. (2 Timotheo 3:16) Inyalo geno Wachne nikech en e ma nochueyowa kendo ong’eyo gima ka watimo, to wanyalo bedo mamor e ngima.

WANYALO GENO MUMA MONDO OTAWA

Wanyalo geno Muma kaka buk ma nyalo tayowa mondo wang’e kaka ngimawa biro chalo e kinde mabiro nikech higni 2,000 moko mokalo, nokoro gik ma ne dhi timore kod kaka timbe ji ne dhi chalo e kindewagi.

GIK MA NE DHI TIMORE

“Oganda noked gi oganda, kendo pinyruoth noked gi pinyruoth. Yiengni madongo mag piny nobedie, bende chiemo nobed manok kamoro bang’ machielo kendo tuoche ma landore nobedie.”—LUKA 21:10, 11.

TIMBE JI

“Kinde matek ahinya nobedie e ndalo mag giko. Nimar ji nobed jo moherore giwegi, jo mohero pesa, jo ma pakore, jong’ayi, jo achaya, jo ma ok winj jonyuolgi, jo ma ok go erokamano, jo ma ok makre chuth gi jomamoko, jo ma onge hera, jo ma ok oikore loso winjruok moro amora, joketh nying ji, jo ma onge ritruok, jo mager, jo ma ok ohero gik mabeyo, jo andhoga, jo ma wigi tek, jo sunga, jo mohero mor mag piny kar hero Nyasaye.”—2 TIMOTHEO 3:1-4.

Inyalo wacho ang’o e wi Muma sama ineno ka weche ma nokoro chon timore sani? Onge kiawa ni inyalo yie gi weche ma Leung, ma a Hong Kong nowacho niya: “Weche ma Muma nokoro nondik chon ahinya. Onge dhano moro amora ma nyalo koro weche ma chop e yo makare kamano. Mano nyiso ni Muma ne ondik gi ng’at maduong’ kendo mariek ahinya moloyowa.”

Muma oting’o weche mang’eny ahinya ma nokor ma moko kuomgi osetimore.b Mano nyiso ni kuom adier Muma en Wach Nyasaye. Jehova owuon wacho kama: “An e Nyasaye kendo onge nyasaye moro machal koda,” kendo ni “chakre chon, asekoro gik ma pok otimore.” (Isaya 46:9, 10) Kuom mano inyalo geno gik ma Muma wacho e wi kinde mabiro.

MUMA NYALO KONYI DAK MABER SANI KENDO E KINDE MABIRO

Ka iluwo puonj ma yudore e Ndiko Maler inyalo yudo ber mathoth. Ne ane ranyisi ma luwogi.

BEDO GI PARO MOWINJORE E WI PESA KOD TICH

“Yueyo matin ber moloyo tich matek manono ma chal mana gi lawo yamo.”—EKLESIASTES 4:6.

BEDO GI NGIMA MABER MAR JOOT

“Ng’ato ka ng’ato kuomu nyaka her chiege kaka oherore owuon; to dhako bende onego omi chwore luor matut.”—JO-EFESO 5:33.

DAK GI KUWE JOWETEWA

“We mirima, kendo kik iwe iyi owang’; kik iyi wang’, mano nyalo miyo idonj e richo.”—ZABURI 37:8.

Tiyo gi puonj mag Muma nyalo miyo iyud ber mathoth sani kendo ibi idag maber e kinde mabiro. Muma nigi singo moko mabeyo ma Nyasaye singonwa kaka ma luwogi.

KUWE MADIER

“Ginibed mamor ahinya nikech ginidag gi kuwe.”—ZABURI 37:11.

UDI KOD CHIEMO MOROMO JI DUTO

“Gibiro gero ute kendo ginidagie, gibiro pidho puothe mzabibu kendo chamo olembegi.”—ISAYA 65:21.

TUOCHE KOD THO BIRO BEDO MAONGE

“Tho ok nobedie kendo, kata kuyo, kata ywak, kata rem ok nobedie kendo.”—FWENY 21:4.

En ang’o monego itim mondo ibi dag e kinde kaka mago? We wane ane sula ma luwo.

a Mondo ing’e matut e wi kaka oselok Muma e dhok mang’eny kod kaka osepoge ne ji, dhi e websaitwa mar www.jw.org/luo, kae to idhi e PUONJ MAG MUMA > HISTORI KOD MUMA.

b Mondo iyud weche momedore ne sula mar 9 e buk miluongo ni Bibilia—Neno la Mungu au la Binadamu?, mogo gi Joneno mag Jehova. Oyudore e websaitwa mar www.jw.org/sw. Dhi e MAKTABA > VITABU NA BROSHUA.