Pogo Ber gi Rach: Muma e Buk Minyalo Gen e Tayowa

Ok wanyal bedo gadier ni yiero ma watimo biro dhi maber ka waluwo mana pachwa kende kata pach jomamoko. Muma nyisowa gimomiyo en kamano, to bende onyisowa weche mamoko momedore. Oting’o weche madier kendo minyalo gen, ma gin gik ma dwarore mondo wadag e ngima maber kendo mopong’ gi mor.

YO MA DWARORE NI OTAWAGO

E Muma, Jehovaa Nyasaye leronwa ni dwache en ni dhano ogen kuome mondo otagi, to ok ni dhano ota yoregi giwegi. (Jeremia 10:23) Mano e momiyo osemiyowa chike ma tayowa e Muma. Ohero dhano ahinya, kendo ok doher ni wayud hinyruok kata masira nikech yiero maricho ma wanyalo timo. (Rapar mar Chik 5:29; 1 Johana 4:8) E wi mano, nikech en Jachuechwa, en gi rieko kendo ong’eyo chike makare ma nyalo tayowa. (Zaburi 100:3; 104:24) Kata kamano, Nyasaye ok chun ji mondo oluw chikene.

Jehova nomiyo Adam gi Hawa gik moko duto ma ne dwarore mondo gibed mamor. (Chakruok 1:28, 29; 2:8, 15) Bende, nomiyogi chike mayot ma nogeno ni ne gidhi luwo. Kata kamano, noweyogi mondo giyier ka be ne gidhi luwo chikego kata ooyo. (Chakruok 2:9, 16, 17) Gima lit en ni Adam gi Hawa noyiero luwo chikegi giwegi kar luwo chike mag Nyasaye. (Chakruok 3:6) Mano osekelo ang’o? Be dhano nyalo dak maber ka gitiyo mana gi pachgi giwegi e pogo ber gi rach? Ooyo. Gik mosetimore e ngima dhano kuom higni mang’eny osenyiso ayanga ni tamruok luwo chike Nyasaye ok nyal kelo kuwe kod mor madier.—Eklesiastes 8:9.

Muma miyowa chike ma nyalo konyowa timo yiero mabeyo, bed ni ne wapon kanye kata e yo mane. (2 Timotheo 3:16, 17; ne sanduk ma wacho ni, “Buk ma Konyo Ji Duto.”) Ne ane kaka Muma timoga mano.

Puonjri weche momedore e wi gimomiyo Muma inyalo luong ni “wach Nyasaye.”—1 Jo-Thesalonika 2:13. Ne vidio ma wiye wacho ni, Muma Owuok Kuom Ng’a? ma yudore e jw.org/luo.

GIMOMIYO JOMOKO KWEDOGA MUMA

Jomoko wachoga ni Muma ok nyal konyo ng’ato bedo gi timbe mabeyo. Ginyalo wacho kamano nikech gin gi paro ma luwogi.

Paro ma gin-go: “Muma pingore.”

Adiera: Kuonde moko matin ma nyalo nenore ka gima pingore e Muma inyalo winj tiendgi maler ka onon weche molworogi, histori, timbe ma ji ne nigo e kindego, paro ma jandiko ne nigo, kod weche mamoko.

Mondo ine ranyisi mag kuonde kaka mago, ne sula ma wiye wacho ni, “Be Muma Pingore Owuon?” e jw.org/luo.

Paro ma gin-go: “Joma wacho ni luwo puonj mag Muma timoga gik maricho, kuom mano, Muma ok nyal konyo ji bedo gi timbe mabeyo.”

Adiera: Ok onego wawach ni Muma rach mana nikech joma ok dwar luwo puonj mochiwo. Muma nokoro ni ji mang’eny, moriwo nyaka jotend dinde ma tiyo gi Muma, ne dhi timo gik ma ok winjre gi puonj mag Muma. Bende, nowacho ni mano ne dhi miyo ‘ji ocha adiera’ manie iye.—2 Petro 2:1, 2.

Mondo ine ranyisi achiel ma nyiso kaka jotend dinde ok luw puonj mag Muma, ne sula ma wiye wacho ni, “Dibed ni Din Tinde en Mana Ohala?” e jw.org/luo.

Paro ma gin-go: “Muma jiwo mana pach jomamoko.”

Adiera: Muma jiwowa ni wami jomamoko luor. Ok oyie gi . . .

joma nenore giwegi ni gibeyo moloyo jowetegi.—Jo-Filipi 2:3.
joma ochayo joma nigi yie mopogore kata ma timbegi opogore.—1 Petro 2:17.
joma chuno jowetegi mondo oluw pachgi.—Mathayo 10:14.

Muma nyiso ni Nyasaye ok buon ng’ato ang’ata kendo odwaro ni wan bende kik wabuon jomoko.—Jo-Rumi 9:14.

Mondo iyud weche momedore, ne sula ma wiye wacho ni, “Kaka Muma Nyalo Konyowa Chiwo Luor ne Paro ma Jomamoko Nigo” e jw.org/luo.

KAKA MUMA KONYOWA FWENYO YO MA NYASAYE TAYOWAGO

Muma oting’o weche makare ma nyiso gik ma Nyasaye timoga ne dhano. Wechego konyowa fwenyo gik ma Nyasaye neno ni beyo kata richo, kod gik ma nyalo konyowa kata ma nyalo hinyowa. (Zaburi 19:7, 11) Muma oting’o puonj mosiko kendo ma konyowa timo yiero mabeyo pile ka pile.

Kuom ranyisi, ne ane puonj ma yudore e Ngeche 13:20. Ndikono wacho niya: “Ng’at ma wuotho gi jo mariek nobed mariek, to osiep jo mofuwo biro hinyore.” Puonjno pod konyo e kindewagi, mana kaka nokonyo e kinde machon. Muma opong’ gi rieko mosiko kendo madongo kaka mago.—Ne sanduk ma wacho ni, “Rieko Mosiko Manie Muma.”

Kata kamano, inyalo penjori niya: ‘Ere kaka anyalo bedo gadier ni chike mag Muma konyo e kindegi?’ Sula ma luwo biro wuoyo kuom ranyisi mag joma oseneno adiera mar wechego.

a Jehova en nying Nyasaye.—Zaburi 83:18.

RIEKO MOSIKO MANIE MUMA

Kata obedo ni notiek ndik Muma chiegni higni 2,000 mokalo, pod okonyo ahinya e kindewagi. Gik ma dhano dwaro ahinya e ngima pok olokore, ma gin kuwe kod mor madier. (Eklesiastes 1:9) Rieko mosiko manie Muma nyalo konyowa chopo dwarono.

Bedo Jaratiro

“Wadwaro bedo joratiro e gik moko duto ma watimo.”—Jo-Hibrania 13:18.
“Ng’at ma kwelo kik okwel kendo; to kar mano oti matek.”—Jo-Efeso 4:28.

Winjruok gi Jomamoko

“Kik ng’ato odwar mana gik ma kelone ber owuon, to odwar ma kelo ber ne ng’at machielo.”—1 Jo-Korintho 10:24.
“Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo.”—Jo-Kolosai 3:13.

Timo Yiero

“Ng’at ma riekone tin yie gi gimoro amora, to ng’at mariek paro ka pok okawo okang’ moro amora.”—Ngeche 14:15.
“Ng’at mariek neno masira ka biro kendo opondo, ng’at ma riekone tin to dhi adhiya kendo ohinyore.”—Ngeche 22:3.