Bwonjo Nokelo Nyak!

NYIRI moko ariyo ne wuotho kanyachiel e taon mar Baguio e piny Philippines. Ne gineno troli moket e bugewa, to ne ok gisudo machiegni gi trolino. Nyaminwa Helen ma nochung’ e bath trolino norangogi ka bwonjo matek. Nyirigo nodhi adhiya nyime gi dijegi, kata kamano, bwonjo ma Helen nobwonjogono nomorogi ahinya.

Bang’e ka ne nyirigo ni e bas ka gidok ot, ne gineno sain-bod ma nigi alama mar jw.org e dho Od Romo moro. Ne giparo mapiyo ni e troli ma ne gineno chieng’no be nondikie jw.org. Ne gilor e basno mi gidhi e ranga Od Romono mondo gine chenro mag chokruoge mag kanyakla mopogore opogore ma tiyo gi Od Romono.

Nyirigo nodhi e achiel kuom chokruoge ma noluwo. To ing’eyo ng’at ma wang’gi nokwongo neno ka ne gidonjo e Od Romo? Mana Helen! Ne gipare kendo fwenyo mapiyo ni en e ma nobwonjo kodgi chieng’cha. Helen wacho kama: “Ka ne gichako wuotho ka gibiro ira, nabedo maluor matin. Naparo ni samoro nitie gimoro marach ma nasetimo.” Kata kamano, nyirigo nopimo ne Helen kaka weche nobet.

Chokruok ne mitnegi ahinya, kendo ne gimor bedo kanyachiel gi Joneno mag Jehova. Ne giwinjo ka gin thuolo. Ka ne gineno ka owete gi nyimine timo ler e Od Romo bang’ chokruok, ne gikwayo ka gin bende ginyalo konyo. Achiel kuom nyirigo osedar e pinyno, kata kamano, nyawadgi to pod nitie, kendo nochako dhi e chokruok. E wi mano, nochako puonjore Muma. To mago duto timore nikech ang’o? Nikech bwonjo ma Helen nobwonjogo!