Penjo Moa Kuom Josombwa
Gin jomage mibiro chier e piny, to ibiro chiergi e chier mane?
Wanon ane dwoko ma Muma chiwo e wi penjogo.
Tich Joote 24:15 nyisowa “ni chier nobedie mar jo ma kare gi jo ma ok kare.” Joma kare gin joma notho koluoro Nyasaye kendo nyingegi nondik e bug ngima. (Mal. 3:16) Joma ok kare gin joma notho ka ok oluoro Jehova nikech ne ok giyudo thuolo mar timo kamano. Omiyo, nyingegi ne ok ondik e bug ngima.
Johana 5:28, 29 bende wuoyo mana kuom grube ariyo miwuoyoe e Tich Joote 24:15. Yesu nowacho ni “jo ma notimo gik mabeyo” nowuog oko “e chier mar ngima, to jo ma notimo gik maricho e chier mar bura.” Joma kare gin joma notimo gik mabeyo ka pok ne githo. Ibiro chiergi e ngima nikech nyingegi ondik e bug ngima. Kata kamano, joma ok kare gin joma notimo gik maricho ka pok ne githo kendo ibiro chiergi e bura. Nyingegi pod onge e bug ngima, omiyo, pod ibiro ketgi e bura kinono timbegi, mondo one ka be giwinjore yudo ngima mochwere. E kindego, gibiro yudo thuolo mar puonjore e wi Jehova mondo nyingegi ondik e bug ngima.
Fweny 20:12, 13 lero ni ji duto mibiro chier biro dwarore ni oluw “weche mondik” e “buge modol,” ma gin chike ma biro tayo ji e piny manyien. To joma biro tamore luwo chikego ibiro kethi.—Isa. 65:20.
Daniel 12:2 nokoro ni moko kuom joma nosenindo e tho ne dhi chier “mi yud ngima mochwere, to moko noyud wich-kuot kod achaye mosiko.” Ndikoni wuoyo kuom gima gikone biro timore ne joma ibiro chier. Moko biro yudo “ngima ma nyaka chieng’” to moko biro yudo “wich-kuot kod achaye mosiko.” Omiyo, e giko mar higni 1,000, nitie joma biro yudo ngima ma nyaka chieng’ to moko ibiro keth nyaka chieng’.—Fwe. 20:15; 21:3, 4.
Wane ane ranyisini. Chal mar grube ariyo mag ji mibiro chiergo inyalo pim gi joma dwa dhi dak e piny machielo. Joma kare chalo gi joma yudo visa mar tiyo kata mar dak e piny machielo kaka jokanyo mag pinyno kendo gidakga ka gin thuolo. To joma ok kare chalo gi jodak mimiyo visa ma yienegi dak mana kuom kinde moko. Jodak ma kamago nyaka kwong nyis ni giwinjore dak e pinyno e ka migi thuolo mar dhi nyime dak e pinyno. Kamano bende, joma ok kare mibiro chier, biro dwarore ni oyie luwo chike Jehova e ka migi thuolo mar dhi nyime dak e Paradiso. Bende, bed ni jadak noyudo visa machal nade, moko kuomgi inyalo mi thuolo mar dak kanyo chuth to moko inyalo riembi. Timbegi e ma biro miyo oyienegi dhi nyime dak e pinyno kata ooyo. E yo ma kamano bende, timbe mag joma ibiro chier e ma biro miyo oyienegi dhi nyime dak e piny manyien kata ooyo.
Jehova en Nyasaye mang’won kendo ohero tim makare kod bura makare. (Rap. 32:4; Zab. 33:5) Herane e ma biro miyo ochier joma kare gi joma ok kare. Kata kamano, pod obiro dwaro ni ji duto ma biro dak e piny manyien oluw chikege makare. Mana jogo ma biro here kendo dak ka luwore gi chikene, e ma obiro yienegi dak e piny manyien nyaka chieng’.