Wajiwreuru e Chokruogewa mag Kanyakla

1. Ang’o momiyo wachiwoga paro e chokruogewa?

ANG’O momiyo wadhiga e chokruogewa mag kanyakla? Gima duong’ en ni mondo wapak Jehova. (Zab. 26:12; 111:1) Gimachielo ma miyo wadhiga e chokruogewa en ni mondo wajiwre e kinde matekgi. (1 The. 5:11) Sama wating’o badwa e chokruok ma wachiwo paro, wakonyo e chopo weche ariyogo.

2. Gin thuolo mage ma wan-go mag chiwo paro e chokruogewa?

² Juma ka juma, wayudoga thuolo mag chiwo paro e chokruogewa. Kuom ranyisi, e chokruok ma giko juma, wanyalo chiwo paro e Puonjruok mar Ohinga mar Jarito. E chokruok ma kor juma, wanyalo chiwo paro e migawo mar Puonj Manie Wach Nyasaye, Puonjruok Muma e Kanyakla, kod migepe mamoko.

3. Gin pek mage ma wanyalo bedogo e wach chiwo paro, to ere kaka Jo-Hibrania 10:24, 25 nyalo konyowa?

³ Waduto dwaher pako Jehova kendo jiwo Jokristo wetewa. Kata kamano, sama wachiwo paro, wanyalo bedo gi pek moko. Kuom ranyisi, chiwo paro nyalo kelonwa luoro, kata wanyalo gombo ahinya chiwo paro, to ok yierwa sama wating’o badwa. Ang’o ma wanyalo timo e chal kaka mago? Dwoko yudore e barua ma jaote Paulo nondiko ne Jo-Hibrania. Ka nowuoyo kuom gimomiyo onego wachokre kanyachiel, nowacho ni onego waket pachwa kuom ‘jiwruok.’ (Som Jo-Hibrania 10:24, 25.) Sama wafwenyo ni paro ma wachiwo e chokruok jiwo Jokristo wetewa, kata ka en mana paro machuok, ok wabi luor chiwe. To kata ka ok omiwa thuolo mang’eny mag chiwo paro kaka dwaher, pod wabiro bedo mamor ni jomamoko bende oyudo thuolo mar timo kamano.​—1 Pet. 3:8.

4. Gin weche mage adek ma wabiro nono e sulani?

⁴ E sulani, wabiro chako gi nono kaka wanyalo jiwore ka wan e kanyakla matin ma joma chiwo paro bende nok. Kae to wabiro nono kaka wanyalo jiwore e kanyakla maduong’ ma joma ting’o badgi mondo ochiw paro ng’eny. Mogik, wabiro nono yore moko ma nyalo konyowa mondo weche ma wawacho sama wachiwo paro e chokruok obed weche ma jiwo jowetewa gadier.

E KANYAKLA MATIN

5. Ere kaka wanyalo jiwore ka wan e kanyakla matin?

⁵ E kanyakla matin kata grup, joma chiwo paro nok. Seche moko owadwa ma tayo migawo moro nyalo rito kuom kinde ka pok ng’ato oting’o bade mondo ochiw paro. Mano nyalo miyo chokruok odhi mos, to mano ok kel jip ahinya. Ang’o minyalo timo? Bed thuolo ting’o badi nyading’eny kaka nyalore. Kitimo kamano, inyalo jiwo jomamoko mondo gin bende gichiw paro nyading’eny.

6-7. Ere kaka wanyalo loyo luoro ma wanyalo bedogo e wi chiwo paro?

⁶ To nade ka chiwo paro miyiga luoro? Ji mang’eny winjoga kamano. Kata kamano, mondo ijiw oweteni gi nyimineni e yo makare, donge inyalo paro yore moko ma nyalo konyi loyo luoro mar chiwo paro? Ere kaka inyalo timo mano?

⁷ Inyalo nono sula moko mokalo mag Ohinga mar Jarito mosegawuoyo e wi wachno.b Kuom ranyisi, achiel kuom weche mosegajiwnwa en ni waikre maber ne chokruok. (Nge. 21:5) Kaka imedo lony gi weche manie sula ma idhi non, e kaka ibiro medo bedo thuolo chiwo paro. Bende, chiw paro machuok. (Nge. 15:23; 17:27) Chiwo paro machuok dwokoga luoro chien. E wi mano, nyalo bedo mayot ne owete gi nyimine paro dwoko mochiw e yo machuok, kar dwoko ma rabora ma nigi weche mang’eny. Sama igolo paro machuok mowuok e chunyi kendo kitiyo gi wecheni iwuon, inyiso ni iikori maber kendo ni sulano odonjoni malong’o.

8. Jehova winjoga nade sama watimo duto ma wanyalo mondo wachiw paro?

⁸ To nade ka bang’ luwo weche mochiwgo pod iyudo ka chiwo paro nyading’eny tekni? Bed gadier ni Jehova mor ahinya sama itimo duto minyalo. (Luka 21:1-4) Omiyo, kik ine ni nyaka ichunri chiwo paro nyading’eny. (Fil. 4:5) Ik paro ming’eyo ni inyalo chiwo maber, ng’ad e chunyi ni ibiro ichiwe, kae to ilam Jehova mondo okonyi ibed gi chuny mokuwe sama ichiwo paro. Inyalo chako gi chiwo paro achiel, kae to imed mosmos.

E KANYAKLA MADUONG’

9. En pek mane minyalo bedogo sama in e kanyakla maduong’?

⁹ Ka kanyaklau nigi jolendo mang’eny, inyalo bedo gi pek moro mopogore. Nyalo bedo ni owete gi nyimine mang’eny ting’oga badgi mondo gichiw paro, to mano miyo seche moko in ok yieri. Ne ane ranyisi mar Nyaminwa Danielle.c Kuom higni mang’eny, osebedo komorga ahinya gi chiwo paro e chokruok. Onenoga mano kaka thuolo mar pako Jehova, jiwo Jokristo jowetene, kendo guro adiera mag Muma e chunye. To ka nodar modhi e kanyakla maduong’, koro ne ok miyega thuolo mang’eny mag chiwo paro. Seche moko chokruok ne nyalo rumo ma ok ochiwo paro kata dichiel. Owacho kama: “Wachno ne nyosoga chunya. Naneno ni thuolo makende ahinya ne baya. Sama gima kamano otimore nyading’eny, yot paro ni owete ma tayo migepe buonowa.”

10. Ang’o ma wanyalo timo mondo wayud thuolo momedore mag chiwo paro?

¹⁰ Be isegawinjo e chunyi kaka Danielle nowinjo? Ka en kamano, chunyi nyalo jok ming’ad ni koro ibiroga chiko achika iti mondo iwinj chokruok. Kata kamano, kik iol gi temo chiwo paro. Ang’o minyalo timo? Nyalo bedo maber ka iiko paro mang’eny ne chokruok ka chokruok. Kitimo kamano, to kata ka iting’o badi to ok oyieri, pod ibiro bedo gi thuolo mamoko mag ting’o badi ka chokruok pok orumo. Sama iiko Puonjruok mar Ohinga mar Jarito, tem paro kaka paragraf ka paragraf otudore gi wach maduong’ ma sulano wuoye. Mano biro miyo ibed gi gimoro minyalo wacho e sulano. Bende, inyalo iko paro e paragraf moko ma wuoyo kuom adiera matut mag Muma ma samoro ok yotnega ji mang’eny lero. (1 Kor. 2:10) Ang’o momiyo mano nyalo konyi? En nikech kochopo e paragraf ma kamago, samoro ji manok e ma biro ting’o badgi. To nade ka bang’ tiyo gi parogo duto, pod chokruoge mang’eny okalo ka pok omiyi thuolo mar chiwo paro? Ka pok chokruok ochakore, inyalo wuoyo gi owadwa ma dhi tayo migawo moro mondo inyise penjo moro ma diher dwoko.

11. Ang’o ma Jo-Filipi 2:4 jiwowa ni watim?

¹¹ Som Jo-Filipi 2:4. Jaote Paulo nojiwo Jokristo ni giket pachgi kuom gik ma kelo ber ne jomamoko. Ere kaka wanyalo tiyo gi puonjno e chokruogewa? En kuom ng’eyo ni jomamoko bende diher chiwo paro mana kaka wan.

12. En yo mane maber mar jiwo jomamoko e chokruok? (Ne picha bende.)

¹² Tem ane neno wachno kama. Wawach ni igoyo mbaka gi osiepegi moko. Be diher ni in e ma iwuo mang’eny to gin giwuo matin? Ooyo, in bende diher winjo pachgi. E yo ma kamano, sama wan e chokruok, dwaher weyo ne ji mang’eny kaka nyalore thuolo mar chiwo paro. Kuom adier, achiel kuom yore mabeyo mogik mag jiwo owetewa gi nyiminewa en miyogi thuolo mar lero yiegi. (1 Kor. 10:24) Wane ane kaka wanyalo timo mano.

13. Ere kaka wanyalo miyo jomamoko thuolo mag chiwo paro?

¹³ Achiel kuom gik minyalo timo en chiwo paro machuok mondo jomamoko bende oyud thuolo mag chiwo paro. Jodong-kanyakla kod jolendo mamoko molony nyalo keto ranyisi maber e wachni. To kata mana sama ichiwo paro machuok, tem ahinya kik idwok gik moko duto e paragraf. Kiwacho gik moko te manie paragraf, ibiro tieko paro duto ne jomamoko. Kuom ranyisi, e paragrafni nitie weche ariyo madongo mochiw, ma gin chiwo paro machuok kod temo ahinya mondo kik wadwok gik moko duto manie paragraf. Ka in e ma okwong miyi thuolo mar chiwo paro e paragrafni, donge nyalo bedo maber kiwuoyo mana kuom wach achiel kende?

14. Ang’o ma nyalo konyowa yiero ni wabiro ting’o badwa nyadidi? (Ne picha bende.)

¹⁴ Ti gi rieko e yiero ni ibiro ting’o badi nyadidi. Ka wating’o badwa nyading’eny ahinya, wanyalo thung’o owadwa ma tayo migawo mondo oyierwa ding’eny to jomamoko pok oyudo thuolo. Mano nyalo miyo jomamoko chunygi ool ma giwe ting’o badgi.​—Ekl. 3:7.

15. (a) Ang’o ma ok onego watim ka po ni ok oyierwa mondo wachiw paro? (b) Ere kaka owadwa ma tayo migawo moro nyalo nyiso ni odewo ji duto manie chokruok? (Ne sanduk ma wiye wacho ni, “Ka In e Mitayo Migawo Moro.”)

¹⁵ Ka jolendo mang’eny oting’o badgi sa puonjruok, samoro ok wabi yudo thuolo mar chiwo paro nyading’eny kaka dwaher. Seche moko owadwa ma tayo migawo moro nyalo weyo ma ok oyierowa chuth-chuth. Mano nyalo nyoso chunywa, kata kamano, kik watem paro kata matin ni samoro en-gi wach moro kodwa.​—Ekl. 7:9.

16. Ere kaka wanyalo jiwo joma ochiwo paro e chokruok?

¹⁶ Ka po ni ok iyudo thuolo mar chiwo paro ding’eny kaka diher, donge inyalo chiko iti maber sama jomamoko chiwo paro, kae to ipwogi bang’ chokruok? Sama ipwoyo oweteni gi nyimineni kamano, mano nyalo jiwogi mana kaka di ne ijiwogi gi paro ma di ne ichiwo e chokruok. (Nge. 10:21) Pwoyo jomamoko en yo machielo mar jiwogi.

YORE MAMOKO MA WANYALO JIWOREGO E CHOKRUOK

17. (a) Ere kaka jonyuol nyalo konyo nyithindgi iko paro mowinjore ka luwore gi hikgi? (b) Ka luwore gi vidio, gin okenge mage ang’wen ma nyalo konyowa iko paro ma wabiro chiwo e chokruok? (Ne weche moler piny.)

¹⁷ Gin yore mage mamoko ma wanyalo jiworego e chokruok? Ka in janyuol, kony nyithindi mondo giik paro ma ginyalo chiwo ka luwore gi hikgi. (Mat. 21:16) Seche moko nyalo bedo ni sula ma wanono e chokruok en sula ma wuoyo kuom chandruoge mag kend kata timbe mochido mag nindruok ma Jokristo ok onego otim, kata kamano, pod nyaka iyudie paragraf moro moting’o weche ma nyathi nyalo chiwoe e paro. Bende, kony nyithindi mondo ging’e gimomiyo nitie seche ma ok bi yiergi kata ka giting’o badgi. Leronegi wechego nyalo konyogi mondo chunygi kik nyosre sama oyier jomamoko to gin ok oyiergi.​—1 Tim. 6:18.d

18. Sama wachiwo paro e chokruok, ang’o ma wanyalo timo mondo kik wawuo kuomwa wawegi ahinya? (Ngeche 27:2)

¹⁸ Waduto wanyalo iko paro ma biro pako Jehova kendo jiwo Jokristo wetewa. (Nge. 25:11) Kata obedo ni dichiel ka dichiel wanyalo chiwo paro e wi gimoro ma notimore e ngimawa, onego watem kik wawuo ahinya kuomwa wawegi. (Som Ngeche 27:2; 2 Kor. 10:18) Kar mano, dwaher ni waket pachwa kuom Jehova, Wachne, kod riwruok mar ogandane. (Fwe. 4:11) To ka penjo mopenj e paragraf moro dwaro ni wawach weche moko ma notimore ne wan wawegi, ok rach timo kamano. Ranyisi mar penjo kaka mago ni e paragraf ma luwo mae.

19. (a) Ka waketo pachwa kuom gik ma kelo ber ne jomamoko sama wan e chokruok, mano nyalo konyo nade? (Jo-Rumi 1:11, 12) (b) Ang’o ma moriga e wi chiwo paro e chokruok?

¹⁹ Kata obedo ni onge chike moridi e wi kaka onego wachiw paro, waduto onego watem ahinya mondo paro ma wachiwo ojiw jomamoko. Mano nyalo dwaro ni seche moko wachiw paro nyading’eny. Kata, nyalo dwarore ni wabed abeda mamor gi thuolo matin ma wayudo mar chiwo paro, kendo wabed mamor ni jomamoko bende oyudo thuolo mar lero yiegi. Ka waketo pachwa kuom gik ma kelo ber ne jomamoko, waduto wanyalo jiwore.​—Som Jo-Rumi 1:11, 12.