Nyis ni Imor gi Jokwath ma Gin “Mich” Momiwa

1. Moko kuom mich ma Yesu osemiyowa gin mage?

ONGE dhano moro amora mosebedo jachiwo ma loyo Yesu. Ka ne en e piny ka, notiyo gi tekone mar timo honni e konyo jomamoko. (Luka 9:12-17) Mich maduong’ ma nomiyo dhano en ngimane ma nochiwo nikech wan. (Joh. 15:13) Kata bang’ ka nosechiere, nodhi nyime bedo jachiwo. Mana kaka nosingo, nokwayo Jehova mondo omiwa roho mare maler mondo opuonjwa kendo ojiwwa. (Joh. 14:16, 17; 16:13) Bende, kokalo kuom chokruoge mag kanyakla, Yesu dhi nyime tiegowa mondo walok ji duto e piny ngima obed jopuonjrene.—Mat. 28:18-20.

2. Gin jomage ma gin “kaka mich” miwuoye e Jo-Efeso 4:7, 8?

² Wane ane mich moro machielo ma Yesu osemiyowa. Jaote Paulo nondiko ni bang’ ka Yesu nosedhi e polo, “ne ochiwo ji kaka mich.” (Som Jo-Efeso 4:7, 8.) Paulo nolero ni Yesu nochiwo michgo mondo okony kanyakla e yore mopogore opogore. (Efe. 1:22, 23; 4:11-13) E kindewagi, chwo momiwa kaka mich oriwo jokony-tich, jodong-kanyakla, kod jorit-alwora.a Adiera en ni chwogo gin joma orem kendo ginyalo timo gik ma ok kare. (Jak. 3:2) Kata kamano, Yesu Kristo Ruodhwa tiyo kodgi mondo gikonywa. Gin kaka mich momiwa.

3. Chiw ane ranyisi ma nyiso kaka wanyalo siro chwo ma gin “kaka mich” e chopo ting’ ma Yesu nomiyogi.

³ Yesu nochiwo chwo ma gin “kaka mich” mondo gijiw kanyakla. (Efe. 4:12) Waduto wanyalo konyo chwogo e chopo migawo maduong’ ma Yesu nomiyogino. Wanyalo pimo yo ma wakonyogigo gi gero Od Romo. Nitie joma geroga Od Romo achiel ka achiel. To nitie joma siroga tijno kokalo kuom chiemo ma gitedo, gik ma ging’iewo, kod tije mamoko ma gitimo. E yo ma kamano bende, wasiro jokony-tich, jodong-kanyakla, kod jorit-alwora kokalo kuom gik ma wawacho kod ma watimo. Koro wane ane ber ma wayudo kuom tich matek ma gitiyo, kod kaka wanyalo nyiso ni wamor gi chwo ma gin “mich” ma Yesu nomiyowa.

JOKONY-TICH MA “TIMO TIJE MA KONYO JI”

4. Moko kuom “tije” ma jokony-tich ne timo e kinde Jokristo mokwongo ne gin mage?

⁴ E kinde Jokristo mokwongo, moko kuom owete niketo mondo obed jokony-tich. (1 Tim. 3:8) Nenore ni gin e ma ne ‘gitimo tije mag konyo ji’ ma Paulo nowuoye. (1 Kor. 12:28) Jokony-tichgo ne timoga tije mang’eny mopogore opogore mondo jodong-kanyakla oket pachgi kuom puonjo kod limbe mag kwath. Kuom ranyisi, jokony-tich ne nyalo konyo e kopo Ndiko Maler kata ng’iewo gik ma nitiyogo e kopo Ndikogo.

5. Moko kuom tije ma jokony-tich timo e kindewagi gin mage?

⁵ Ne ane moko kuom tije ma jokony-tich timoga e kanyaklau. (1 Pet. 4:10) Inyalo migi tije mopogore opogore kaka rito akaunt mar kanyakla kata alwora mar lendo, kwayo buge ne jolendo e kanyakla, konyo e migawo mar kowo dwol, bedo jorwak welo, kata konyo e rito Od Romo mondo osik kober. Mago duto gin tije ma dwaro ni otimo mondo kanyakla odhi maber. (1 Kor. 14:40) E wi mago, jokony-tich moko tayoga migepe e chokruok mar Ngimawa kod Tijwa kendo gigologa twege mag ji duto. Bende, inyalo mi jakony-tich migawo mar konyo jarit-grup mar tij lendo. Seche moko jokony-tich molony nyalo dhi gi jodong-kanyakla e limbe mag kwath.

6. Moko kuom tije ma jokony-tich timo momiyo wabedo mamor kodgi gin mage?

⁶ Tije ma jokony-tich timo kelo ne kanyakla ber mage? Nyaminwa moro miluongo ni Beberly,bma wuok Bolivia wacho kama: “Tije ma jokony-tich timo miyo awinjoga ka mor sama an e chokruok. Anyaloga wer, chiwo paro, kendo neno vidio kod pichni mipuonjogo ji e chokruok. Jokony-tichgo konyo kanyakla mondo giyud arita maber sama gin e chokruok kendo gitudo joma ok nyal chopo e chokruok aching’ e yor vidio. Bang’ chokruok, gikawoga okang’ mokwongo e timo ler, rito akaunt mar kanyakla, kendo miyo jolendo buge. Amor ahinya gi tije ma gitimo!” Nyaminwa moro miluongo ni Leslie, modak Colombia kendo ma jaode en jaduong’-kanyakla wacho kama: “Jaoda ogeno ahinya kony ma jokony-tich miye. Ka dine ok gikonye, di koro odich ahinya. Amor ahinya gi chuny ma jokony-tich nyiso.” Onge kiawa ni kamano e kaka in bende iwinjoga.—1 Tim. 3:13.

7. Ere kaka wanyalo nyiso ni wamor gi tije ma jokony-tich timo? (Ne picha bende.)

⁷ Kata obedo ni wawinjoga ka wamor gi tije ma jokony-tich timo, onego wanyisgi bende ni wamor gi tije ma gitimogo. (Kol. 3:15) Jaduong’-kanyakla moro miluongo ni Krzysztof modak Finland, wacho gima otimoga mondo onyis ni omor gi gik ma jokony-tich timo. Owacho kama: “Andikonegiga kad kata ote ma nigi ndiko, kata kad ma nyiso gimoro sie ma jakony-tich osetimo mojiwa, kata gimomiyo amor gi tijgi.” Pascal gi jaode Jael modak New Caledonia lemoga ne jokony-tich. Pascal wacho kama: “Machiegnini, wasebedo ka wasayo kendo kwayo Jehova e lamo ne owete ma tayo e kanyaklawa.” Jehova winjoga kwayo ma kamago, to mano miyo ji duto manie kanyakla yudoga ber.—2 Kor. 1:11.

JODONG-KANYAKLA “MA TIYO MATEK” E KINDWA

8. Ang’o momiyo Paulo ne nyalo wacho ni jodongo ma nodak e kinde Jokristo mokwongo ne “tiyo matek”? (1 Jo-Thesalonika 5:12, 13)

⁸ E kinde Jokristo mokwongo, jodongo ne tiyoga matek mondo gikony kanyakla. (Som 1 Jo-Thesalonika 5:12, 13; 1 Tim. 5:17) Ne ‘gitayoga’ kanyakla e chokruoge kendo timo yiero moko ka gin kaka buch jodongo. Ne ‘girieyoga’ owete gi nyimine ka gimiyogi siem ma achiel kachiel mondo gisik ka gitegno e yie. (1 The. 2:11, 12; 2 Tim. 4:2) En adier ni owetego bende ne tiyo matek mondo gipidh joodgi kendo konyogi mondo gisik ka gin gi winjruok maber gi Nyasaye.—1 Tim. 3:2, 4; Tito 1:6-9.

9. Moko kuom migepe ma jodong-kanyakla ma kindewagi nigo gin mage?

⁹ E kindewagi, jodongo tinde odich ahinya. Gin joland-injili. (2 Tim. 4:5) Giketonwa ranyisi maber e tij lendo, gichano alwora milende, kendo gitiegowa mondo wabed jolendo kod jopuonj molony. Gin jong’ad-bura mang’won kendo ok gibuon Jokristo wetegi. Sama Jakristo moro otimo richo maduong’, jodongo konye mondo olos winjruokne gi Jehova kendo. To e sechego bende, gitimo matek mondo girit kanyakla osik ka ler. (1 Kor. 5:12, 13; Gal. 6:1) To maduong’ie moloyo, jodongo gin jokwath. (1 Pet. 5:1-3) Gigologa twege moik maber ka gitiyo gi Ndiko, gitemo matek mondo ging’e ji duto e kanyakla, kendo gitimoga limbe mag kwath. Jodongo moko konyoga e tij gero Ute Romo kendo giritogi mondo gisik ka gibeyo, gichano chokruoge madongo, to moko nie Komiti ma Tudore gi Osiptende kata Grup Mowal ne Limo Jotuwo kod tije mamoko. Kuom adier, jodong-kanyakla tiyo matek mondo gikonywa!

10. Moko kuom gik momiyo wamor gi jodong-kanyakla ma tiyo matek gin mage?

¹⁰ Jehova nokoro ni jokwath ma gin jodong-kanyakla ne dhi ritowa maber kendo ‘onge gima ne dhi miyowa luoro kata buogowa.’ (Jer. 23:4) Nyaminwa moro miluongo ni Johanna ma wuok Finland, noneno adiera mar wechego kinde moko ka ne min-gi tuo matek. Owacho kama: “Kata obedo ni ne tekna nyiso jomamoko kaka nawinjo, jaduong’-kanyakla moro nohore koda, nolemo koda, kendo nokonya bedo gadier ni Jehova ohera. Ok anyal paro weche sie ma nowachona, kata kamano, nawinjo ka chunya okuwe bang’ wuoyo kode. An gadier ni Jehova e ma noore mondo okonya e sama nadware kony moloyo.” Ere kaka jodong-kanyaklau osekonyi?

11. Ere kaka inyalo nyiso ni imor gi tije ma jodongo timo? (Ne picha bende.)

¹¹ Jehova dwaro ni wanyis koa e chunywa ni wamor gi ‘tije’ ma jodong-kanyakla timo. (1 The. 5:12, 13) Henrietta modak Finland wacho kama: “Jodongo oikorega konyo jomamoko, to mano ok nyis ni gin gi teko kata thuolo momedore kata ni gionge gi pek moko ma gikaloe. Seche moko ajanyisogi ni, ‘Ing’e nang’o, in jaduong’-kanyakla maber. Daher ni ing’e mano.’” Nyaminwa moro ma wuok Türkiyec miluongo ni Sera wacho kama: “Dwarore ni ojiw jodongo mondo gidhi nyime timo tijgi. Kuom mano, wanyalo ndikonegi kad, gwelogi e gago, kata dhi kodgi lendo.” Be nitie jaduong’-kanyakla moro ma kindane mori? Many yore minyalo nyisego ni imor gi kindaneno.—1 Kor. 16:18.

JORIT-ALWORA MA TEGO KANYAKLA

12. En chenro mane ma noketi ma nitiyogo e jiwo kanyakla mopogore opogore e kinde Jokristo mokwongo? (1 Jo-Thesalonika 2:7, 8)

¹² Chwo ma Yesu nochiwo e kanyakla “kaka mich” konyo bende e yo moro machielo. Kotiyo gi jodongo ma ne ni Jerusalem, Yesu nooro Paulo, Barnaba, gi owete mamoko kaka jorit-alwora mondo gilim kanyakla mopogore opogore. (Tich 11:22) Ang’o momiyo niorogiga e kanyaklago? Niorogi mondo gitim tich achiel ma jokony-tich gi jodong-kanyakla timoga ma en tego kanyakla. (Tich 15:40, 41) Chwogo noyie tuonore gik mang’eny kendo keto ngimagi kama tek mondo gipuonj jomamoko kendo jiwogi.—Som 1 Jo-Thesalonika 2:7, 8.

13. Moko kuom migepe ma jorit-alwora nigo gin mage?

¹³ Jorit-alwora limoga kanyakla juma ka juma. To kanyakla ma gilimogo moko niga kuonde maboyo ahinya kendo kawogiga seche mang’eny mondo gichop e kanyaklago. Juma ka juma, jarit-alwora gologa twege mang’eny, odhiga e limbe mag kwath, otayoga romo mar jopainia, romo mar jodongo, kachiel gi romo mag dhi lendo. Giikoga twege kendo chano chokruoge mag alwora kod mag ndalo adek. Gipuonjoga e skunde mag jopainia, gichanoga romo makende gi jopainia manie alworagi, kendo gitimoga tije mamoko ma ofis nyalo miyogi.

14. Moko kuom gik momiyo wamor gi jorit-alwora ma tiyo matek gin mage?

¹⁴ Gin ber mage ma kanyakla yudo nikech tije ma jorit-alwora timo? Owadwa moro modak Türkiye wacho kama e wi limbe mag jarit-alwora: “Limbe mag jarit-alwora miyo ayudoga thuolo mar bedo kanyachiel gi owete gi nyimine kendo konyogi. Aseromo gi jorit-alwora mang’eny kendo anenoga ni giduto chopo irgi yotna kendo ni giikorega wuoyo koda.” Johanna ma ne wasewuoyo kuome motelo, wacho ni nitie chieng’ ma ne gidhi lendo gi jarit-alwora moro, kata kamano, onge ng’ama ne giyudo e ute ma ne gilendee. Owacho kama: “Wiya ok nyal wil gi odiechieng’no. Noyudo ka nyiminega moko nodar modhi odak mabor kendo nagombo nenogi ahinya. Jarit-alworano nojiwa kendo nokonya neno ni e kindewagi nitie gik ma nyalo miyo wa bed mabor gi osiepewa kata joodwa. Kata kamano, e piny manyien, wabiro yudo thuolo mang’eny mar bedo kanyachiel kodgi nyaka chieng’.” Samoro in bende inyalo paro kaka jarit-alwora nogasejiwi kinde moro.—Tich 20:37–21:1.

15. (a) Ka luwore gi 3 Johana 5-8, ere kaka wanyalo nyiso ni wamor gi gik ma jorit-alwora timo? (Ne picha bende.) (b) Ang’o momiyo onego wadew monde jorit-alwora, to ere kaka wanyalo timo kamano? (Ne sanduk ma wiye wacho ni, “Paruru Mondegi.”)

¹⁵ Jaote Johana nojiwo Gayo mondo oher tim mar rwako welo, olim Jokristo wetene, kendo “[okowgi] e yo mowinjore e wang’ Nyasaye.” (Som 3 Johana 5-8.) Yo achiel ma wanyalo timogo kamano ne jarit-alwora en rwake e gago. Yo machielo en riwo chenro mar tij lendo lwedo e juma mar jarit-alwora. Leslie ma nosewuo kuome motelo wacho gima chielo motimoga. Owacho kama: “Akwayoga Jehova e lamo mondo omigi gik ma gichando. An gi jaoda wandikonegiga barua ka wanyisogi kaka limbegi nokonyowa ahinya.” Par ni jorit-alwora bende gin joma orem. Seche moko gin bende gibedoga ma tuo, gibedoga gi parruok, kendo chunygi nyalo nyosore. Samoro weche mang’won minyalo wachonegi kata mich moro mimiyogi, e ma nyalo bedo yo ma Jehova dwokogo lamogi.—Nge. 12:25.

WADWARO CHWO MA GIN “KAKA MICH”

16. Ka luwore gi Ngeche 3:27, gin penjo mage ma owete nyalo penjore?

¹⁶ E piny duto, wadwaro chwo ma nyalo bedo “kaka mich” ne ji. Ka in owadwa mosebatisi, be inyalo chiwori ‘konyo’ Jokristo weteni? (Som Ngeche 3:27.) Be itimo kinda mondo ibed jakony-tich? Be inyalo timo kinda momedore mondo ibed jaduong’-kanyakla kendo konyo oweteni gi nyimineni?d Be inyalo timo lokruok mondo idhi e Skul mar Joland-Injili mar Pinyruoth? Skundno biro tiegi kendo konyi timo tich ma Yesu noweyonwa e okang’ ma kare chuth. Ka ineno ni ok iwinjori dhi e skundno, nyis Jehova wachno e lamo. Kwaye mondo omiyi rohone maler mondo okonyi timo migawo moro amora momiyi.—Luka 11:13; Tich 20:28.

17. Chwo momiwa “kaka mich” nyiso ang’o kuom Yesu Kristo Ruodhwa?

¹⁷ Owete ma Yesu omiyowa “kaka mich,”gin ranyisi ma nyiso ni Yesu osebedo ka tayowa e kinde mag gikogi. (Mat. 28:20) Donge wamor ni wan gi Ruoth moherowa, ma jachiwo, mong’eyo gik ma wadwaro, kendo mosemiyowa chwo molony ma dewowa kendo ritowa maber? Ka en kamano, to many thuolo mar goyo erokamano ne chwo ma jokindago. Bende, wiyi kik wil gi goyo ne Jehova erokamano, ma e Jachiw “mich mabeyo duto gi chiwo malong’o duto.”—Jak. 1:17.