Kaka Lwenje kod Ywaruok Hinyowa Waduto
“Chakre Lweny mar Ariyo mar Piny Ngima, ywaruok kod lwenje osebedo mang’eny ahinya kendo ji ma romo bilion ariyo odak kuonde ma lwenje nitie.”
Amina J. Mohammed, Jalup Jagoro Maduong’ mar Riwruok mar Pinje (U.N.), Januar 26, 2023.
Lweny kod ywaruok nyalo muoch apoya nono kata mana kuonde ma kuwe nitie. Kata mana joma odak kuonde ma lweny ongee bende yudoga chandruok ma lwenje kelo. Chandruogego nyalo siko kuom kinde malach kata bang’ lwenyno rumo. Ne ane ranyisi moko:
Nok mar chiemo. Ka luwore gi riwruok mar World Food Programme, “lweny e ma miyo kech kayo ji mang’eny, kendo ji ma dirom pasent 70 onge gi chiemo moromo nikech gidak kuonde ma lwenje kod timbe mahundu ng’enyie.”
Tuoche kod parruok mokalo tong’. Lweny nyalo miyo ji obed gi luoro kod parruok ahinya. Joma odak kuonde ma lweny ng’enyie nyalo yudo hinyruok moriwo nyaka tuoche mag paro. To e ma pod joma kamago ok yudga thieth e yo mayot.
Riembo ji e miechgi. Ka luwore gi riwruok mar United Nations High Commissioner for Refugees, chop Septemba 2023, ji ma kwan-gi okalo milion 114 noseringo moweyo miechgi. Gima duong’ mosemiyo jogo oringo en lwenje kod ywaruok.
Pek mag yuto. Thothne, sama lweny omuoch bech gik moko idhoga, to mano miyoga ngima bedo matek. Ji nyalo sandore sama sirkal weyo chiwo kony e weche mag thieth kata somo mondo gisir jolweny ma kedonegi. Bende, pesa mitiyogago e loso gik mokethore bang’ lweny ng’enyga ahinya.
Ketho alwora. Ji chandorega sama lweny oketho alwora ma gidakie. Lweny chidoga pi, muya, kendo onyalo ketho lowo kuom kinde malach. Mbom mipandoga e bwo lowo bang’ lwenje nyaloga kelo hinyruok madongo kata bang’ ka lwenjego oserumo.
Onge kiawa ni lweny keloga kethruok madongo kendo ochamoga pesa mang’eny ahinya.