Inyalo Bedo gi Kuwe e Piny Mopong’ gi Lwenje kod Ywaruok
Gary ma kinde moro ne en jalweny wacho kama: “Ka ne pok apuonjora Muma, ne ok ang’eyo gimomiyo piny opong’ gi gero, timbe ma ok kare, kod mahundu. Kata kamano, sani to chunya okuwe. Ang’eyo ni Jehova Nyasaye biro loso pinyni mondo obed kama ber.”
Nitie ji mang’eny ma bende ne nigi paro kaka Gary. Ne ane kaka Muma osekonyogi.
GIMA MUMA WACHO: “A Jehova, iber kendo iikori weyo ne ji richogi.”—Zaburi 86:5.
KAKA WACHNO KONYO: “Ndikoni konya bedo gadier ni Jehova en Nyasaye ma kecho ji. An gadier ni oikore weyona richo duto ma ne atimo e kinde ma ne an jalweny.”—Wilmar, Colombia.
GIMA MUMA WACHO: “Achueyo polo manyien gi piny manyien; ji ok nopar gik machon, bende, gigo ok nochand chunygi kendo.”—Isaya 65:17.
KAKA WACHNO KONYO: “An-ga gi parruok mang’eny ahinya sa asaya ma aparo gik ma ne timore e kinde ma ne an jalweny. Kata kamano, ndikoni konya bedo gadier ni Jehova biro tieko gik moko duto ma chando pacha kod chunya. E kindego, ok abi paro gigo kendo. To mano doko mich ma jaber!”—Zafirah, Amerka.
GIMA MUMA WACHO: “E ndalone, jo makare biro dhi maber, kendo kuwe biro bedo mogundho nyaka dwe nolal nono.”—Zaburi 72:7.
KAKA WACHNO KONYO: “Aparoga wechego nyading’eny. Machiegnini, luoro ma asebedogo nikech lweny biro rumo chuth, kendo ok wabi bedo gi luoro ni gik maricho nyalo timore ne joodwa.”—Oleksandra, Ukraine.
GIMA MUMA WACHO: “Jogi motho biro bedo mangima. . . . Chung’uru malo mondo ukog gi mor, un jo ma odak e lowo!”—Isaya 26:19.
KAKA WACHNO KONYO: “Noneg joodwa mang’eny ahinya e kinde ma ne inego Jo-Tutsi. Kata kamano, ndikoni konya bedo gadier ni abiro nenogi kendo. Ageno winjo dwondgi kendo neno ka gimor kosechiergi!”—Marie, Rwanda.
GIMA MUMA WACHO: “Odong’ mana kinde matin, to joricho ok nobedie. . . Jo mamuol nobed weg piny, kendo ginibed mamor ahinya nikech ginidag gi kuwe.”—Zaburi 37:10, 11.
KAKA WACHNO KONYO: “Kata obedo ni lwenyno norumo, pod nitie timbe ma ok kare kod joma richo. Ndikoni osebedo ka jiwa ahinya. Jehova neno gik moko duto ma timore e ngimana kendo odewa. Osesingo ni gik maricho duto chiegni rumo kendo ok wanapargi kendo.”—Daler, Tajikistan.
Joma owuo kuomgi e gasedni gin mana moko kuom Joneno mag Jehova mang’eny ma Muma osekonyo mondo obed gi kuwe. Gisepuonjore kaka ginyalo weyo buono jomamoko nikech pinje ma giaye, ogendnigi, dhok ma giwacho, kata gik mamoko ma nyalo kelo sigu. (Jo-Efeso 4:31, 32) Joneno mag Jehova ok donjre e weche siasa kod timbe mahundu.—Johana 18:36.
Joneno mag Jehova konyoga jowetegi mana kaka joot konyorega. (Johana 13:35) Kuom ranyisi, Nyaminwa Oleksandra ma ne wasewuoyo kuome motelo kaachiel gi nyamin-gi nodar ma gidhi e piny machielo nikech lweny. Owacho kama: “Ka ne wachopo e pinyno, ne wayudo ka owete gi nyimine ritowa kendo ne girwakowa maber. Ne gikonyowa ahinya kendo mano nomiyo dak e pinyno obedonwa mayot.”
Warwaki e chokruogewa kama ibiro puonjorie weche mabeyo manie Muna kendo ng’eyo kaka inyalo tiyo kodgi e ngimani. Dhi e websaitwa mar jw.org/luo, mondo iyud kar cholruok man machiegni kodi, kata mondo ikwa Joneno mag Jehova opuonjo Muma nono ma onge chudo ka gitiyo gi buk miluongo ni Inyalo Dak gi Mor Nyaka Chieng’!