Hinyruok ma Lweny Kelo
Gik maricho ahinya timorega e kinde lweny. Jolweny kod raia moseneno lweny gi wang’gi ong’eyo adiera mag wechego.
JOLWENY
“Kamoro amora ma iwuothoe iromo gi ji mang’eny motho kata mohinyore marach. Isiko iluor aluora nikech ok ing’eyo gima dhi timoreni.”—Gary, Britain.
“Lisasi nogoyo ng’eya kod wang’a, kendo naneno kinego ji mang’eny moriwo nyaka nyithindo kod jomoti. Lweny nyalo miyo ibed modhil kendo iwe dewo jomamoko.”—Wilmar, Colombia.
“Sama ineno kigoyo ng’ato bunde, ok yot mondo wiyi owil gi wachno. Nduru ma ng’atno goyo kod rem ma en-go nyalo siko e pachi kuom kinde malach. Wiyi ok nyal wil gi ng’atno.”—Zafirah, Amerka.
RAIA
“Naparo ni ok anyal bedo mamor kendo. Nasiko ka aluor nikech naparo ni inyalo nega, to marachie moloyo naluor ni inyalo neg joodwa kod osiepena.”—Oleksandra, Ukraine.
“Ne chunowa riedo e lain chakre sa 8 otieno nyaka kinyne sa 5 otieno mondo wayud chiemo. Ne waluor ahinya nikech lisasi ne nyalo muoch sa asaya kama ne wachung’ieno.”—Daler, Tajikistan.
“Jonyuolna ne oneg e lweny. Mano nomiyo abedo nyathi kich kendo onge ng’at ma ne nyalo hoya kata rita.”—Marie, Rwanda.
Kata obedo ni joma owuo kuomgigo noyudo chandruoge moko nikech lweny, ne giyudo hoch kendo sani gin gi kuwe. To maduong’ie moloyo, gin gadier ni machiegnini lweny biro rumo chuth. Gasedni biro wuoyo e wi Ndiko moko ma nyiso kaka mano biro timore.