Dhi Nyime Wuotho Kuom Yie

1. Ang’o momiyo jaote Paulo ne mor ka noparo kaka nosetiyo gi ngimane?

NOCHOPO kinde moro ma jaote Paulo nong’eyo ni nochiegni nege. Kata kamano, ne en gadier ni nosetiyo gi ngimane e yo maber. Ka noparo kaka nosetiyo gi ngimane, nowacho kama: “Asetieko ng’weya, aserito yie.” (2 Tim. 4:6-8) Paulo nosetimo yiero mabeyo e ngimane kaka Jakristo, kendo ne en gadier ni Jehova ne mor kode. Wan bende onego watim yiero mabeyo ma biro miyo Jehova obed mamor kodwa. Ere kaka wanyalo timo mano?

2. Wuotho kuom yie tiende en ang’o?

² Paulo nowacho kama kuome kendo kuom Jokristo wetene: “Wawuotho kuom yie, to ok kuom neno.” (2 Kor. 5:7) Ang’o ma Paulo ne temo wacho? E Muma, inyalo ti gi “wuotho” kiwuoyo kuom kit ngima ma ng’ato oyiero dakie. Ng’at ma wuotho kuom neno biro timo yiero ka luwore gi gik moneno, gik mowinjo, kata kaka chunye taye. To komachielo, ka ng’ato wuotho kuom yie, obiro timo yiero ma nyiso ni ogeno kuom Jehova Nyasaye. Ng’at ma kamano ni gadier ni koluwo chike Jehova ma yudore e Muma, to obiro dak e ngima maber sani kendo Jehova biro guedhe e kinde mabiro.—Zab. 119:66; Hib. 11:6.

3. Gin ber mage ma wabiro yudo ka wawuotho kuom yie? (2 Jo-Korintho 4:18)

³ En adier ni waduto watimoga yiero moko ka luwore gi gik ma waneno, ma wawinjo, kata ma waparo. Kata kamano, wanyalo yudo chandruoge ka watimo yiero kotenore mana kuom wechego kende, to moloyo ka po ni gin yiero madongo. Nikech ang’o? En nikech gik ma wawinjo kata ma waneno nyaloga wuondowa. To kata ka po ni mano ok otimore, ka wawuotho mana kuom neno, wabiro timo gik ma ok mor Jehova. (Ekl. 11:9; Mat. 24:37-39) Kata kamano, ka wawuotho kuom yie, wabiro timo yiero ma “long’o ne Ruoth.” (Efe. 5:10) Luwo chike Jehova biro miyo wabed gi chuny mokuwe kod mor madier. (Zab. 16:8, 9; Isa. 48:17, 18) Ka wadhi nyime wuotho kuom yie wabiro yudo ngima ma nyaka chieng’.—Som 2 Jo-Korintho 4:18.

4. Ere kaka ng’ato nyalo ng’eyo ka be owuotho kuom yie kata kuom neno?

⁴ Ere kaka wanyalo ng’eyo ka wawuotho kuom yie kata kuom neno? Penjo ma luwogi nyalo konyowa ng’eyo mano: Ang’o ma tayowaga sama watimo yiero? Be itayowaga mana gi gik ma waneno? Koso wagenoga Jehova kod paro momiyowa? We wane ane kaka wanyalo dhi nyime wuotho kuom yie e weche adek madongogi: sama wamanyo tich, sama wamanyo ng’at ma dwaher kendorego, kod sama wayudo weche ma tayowa kowuok kuom riwruogwa. Wabiro nono moro ka moro kuom wechego mondo wang’e kaka wanyalo timo yiero mabeyo.

SAMA IMANYO TICH

5. Ang’o monego waket e paro sama wamanyo tich?

⁵ Waduto, wagomboga yudo kaka wanyalo konyore kod kaka wanyalo pidho joodwa. (Ekl. 7:12; 1 Tim. 5:8) Nitie tije moko ma osachgi ber. Ginyalo miyo iyud pesa minyalo konyogo joodi kendo idong’ gi moko minyalo konyorigo e kinde mabiro. Nitie tije moko ma osachgi tin ma nyalo konyo ng’ato yudo ne joode mana gik mochuno e ngima. En adier ni ka pok wayie gi tich moro, wadwaroga ng’eyo ni ibiro chulwa pesa adi. Kata kamano, ng’at ma wuotho kuom neno biro keto pache mana kuom osara ma ibiro chule kende.

6. Ere kaka wanyalo wuotho kuom yie sama wamanyo tich? (Jo-Hibrania 13:5)

⁶ Ka wawuotho kuom yie, wabiro nono kaka tijno biro mulo winjruokwa gi Jehova. Wanyalo penjore kama: ‘Be tijno biro miyo atim gik ma Jehova osin-go?’ (Nge. 6:16-19) ‘Be obiro chocho chenrona mar lamo Jehova, kata miyo abed mabor gi jooda kuom kinde malach?’ (Fil. 1:10) Kidwoko penjogo ni ‘ee,’ nyalo bedo maber ka watamore tijno kata bed ni yudo tich tek. Nikech wawuotho kuom yie, wabiro timo yiero ma nyiso ni wang’eyo ni Jehova ok bi jwang’owa.—Mat. 6:33; som Jo-Hibrania 13:5.

7-8. Ere kaka owadwa moro ma wuok South America nonyiso ni nowuotho kuom yie? (Ne picha bende.)

⁷ We wane ane ranyisi mar owadwa miluongo ni Javiera ma wuok South America ma noneno ber mar wuotho kuom yie. Owacho kama: “Naoro kwayo mondo ondika tich moro maber kendo ma osache ne en nyadiriyo kopim gi osara ma nichula kama ne atiye motelo.” Kata kamano, Javier ne gombo ahinya bedo painia. Odhi nyime wacho kama: “Nochan mondo arom gi maneja mondo openja penjo moko ma ne dhi konye ng’eyo ka be awinjora gi tijno. Ka ne pok aromo kode, nalemo. Ne an gadier ni Jehova nong’eyo maber gima owinjore koda. Kata obedo ni nagombo medo lony e tich ma nasomo kendo yudo osara momedore, ne ok adhi yie gi tijno ka nodhi mona chopo gombo ma ne an-go e tij Nyasaye.”

⁸ Javier wacho kama: “Ka naromo gi maneja, nonyisa ni biro dwarore ni ati kuom seche momedore. Nanyise e yo ma muol ni mano ne dhi bedo matek nikech chenro moko ma an-go motudore gi weche mag lamo.” Omiyo, Javier notamore tijno. Jumbe ariyo bang’e, nobedo painia. Kae to dweche moko bang’e e higano, noyudo tich ma nonyalo timo kuom odiechienge moko e juma. Owacho kama: “Jehova nowinjo lamona kendo nomiya tich ma nokonya dhi nyime bedo painia. Amor ahinya bedo gi tich ma miya thuolo mar tiyo ne Jehova kaachiel gi owetena.”

9. Ranyisi mar Trésor puonji ang’o?

⁹ To nade ka wafwenyo ni tich ma watimo sani ok miwa thuolo mar wuotho kuom yie? We wane ane ranyisi mar owadwa miluongo ni Trésor ma wuok Congo. Owacho kama: “Nayudo tich moro ma nasebedo ka agombo ahinya. Osara ma nichula nohingo nyadidek osara ma ne ichula e tija machon.” Kata kamano, Trésor ne barega ne chokruoge nikech notiyo kuom seche momedore. Ne ichunega mondo opand timbe moko mag mibadhi ma nitimo kama notiyeno. Trésor ne dwaro weyo tijno, kata kamano, noluor bedo ma onge tich. Ang’o ma nokonye? Owacho kama: “Weche ma yudore e Habakuk 3:17-19 nokonya ng’eyo ni kata ka alalo tich, Jehova pod ne dhi rita maber. Omiyo, naweyo tijno.” Otieko kowacho kama: “Thoth joma ndikoga ji tich paroga ni ka ng’ato dwaro tich maber kendo ma osache bup, to onego oyie weyo gimoro amora moriwo nyaka thuolo monego obedgo ji joode kod weche mag lamo. Amor ni ne ok ajwang’o winjruokna gi Jehova kaachiel gi jooda. Bang’ higa achiel kama, Jehova nokonya yudo tich machielo ma ne nyalo konya pidho jooda kendo tiyone. Ka waketo dwach Jehova e ma obed mokwongo e ngimawa, wanyalo bedo gi pek mag yuto kuom kinde moko. Kata kamano, Jehova biro konyowa.” Ka wageno Jehova kod singoge, wabiro dhi nyime wuotho kuom yie kendo obiro guedhowa.

SAMA IMANYO NG’AT MA DIHER KENDORIGO

10. Ere kaka wanyalo wuotho kuom neno sama wamanyo ng’at ma wadwaro donjogo e kend?

¹⁰ Kend en mich mowuok kuom Jehova, kendo ok rach gombo donjo e kend. Sama nyaminwa moro manyo owadwa ma doher ni okende, onyalo neno kido ma owadwano nigo, kaka onenore gi oko, kaka ji wuoyo kuome, yutone, ting’ ma en-go mar rito joodgi, kod ka be ohero owadwano.b Mago gik madongo ma dwarore ni nyaminwano onon. Kata kamano, ka mago kende e gik moketo e pache, to mano nyalo nyiso ni owuotho kuom neno.

11. Ere kaka wanyalo wuotho kuom yie sama wamanyo ng’at ma dwaher kendorego? (1 Jo-Korintho 7:39)

¹¹ Jehova morga ahinya gi owete gi nyimine ma luwo paro mosechiwo sama gimanyo joma degiher kendorego. Kuom ranyisi, Muma wacho ni ber ka ng’ato ochako weche mag kisera bang’ ka osekalo “higni ma rowere thiewoe.” (1 Kor. 7:36) Bende, ng’ato onego ong’i kido ma Jehova wacho ni dhako maber kata dichwo maber onego obedgo. (Nge. 31:10-13, 26-28; Efe. 5:33; 1 Tim. 5:8) Ka ng’at ma ok Janeno ochako nyisogi hera mar kisera, onego giluw siem ma yudore e 1 Jo-Korintho 7:39 ma wacho ni okendgi “mana kuom Ruoth.” (Som.) Owete gi nyimine ma ok ni e kend dhi nyime wuotho kuom yie ka gin gadier ni Jehova dewo kaka giwinjo e chunygi moloyo ng’ato ang’ata.—Zab. 55:22.

12. Ranyisi mar Rosa puonji ang’o?

¹² Wane ane ranyisi mar nyaminwa Rosa ma en painia e piny Colombia. Dichwo moro ma ok en Janeno nochako nyise osiep mar kisera kama notiye. Rosa nochako hero dichwono. Owacho kama: “Nonenore ka ng’at maber kendo nokonyo ji e alwora ma nodakie. Notimonaga gik moko e yo mang’won. Ne en gi kido ma namanyo kuom dichwo ma nagombo ni okenda, en mana ni ne ok en Janeno.” Odhi nyime wacho kama: “Ne tekna kwere ni ok anyal mako kode osiep mar kisera nikech chunya nosehere ahinya. E kindego bende, nagombo ni ayudie ng’at ma ne nyalo kenda, en mana ni ne pok ayudo Jakristo wadwa ma nowinjore koda.” Rosa ne ok oketo pache mana kuom gik ma noneno. Noparo matut kaka yiero ma nodhi timo ne dhi mulo winjruokne gi Jehova. Omiyo, nong’ado tudruok moro amora ma ne en-go gi dichwono kendo nobedo modich e tij Nyasaye. Mana mapiyo bang’ mano, noluonge e Skul mar Joland-Injili mar Pinyruoth kendo sani en painia makende. Rosa dhi nyime wacho kama: “Jehova osemiyo chunya opong’ gi mor lilo.” Kata obedo ni samoro ok yotga weyo gimoro ma wasehero ahinya, nyalo bedo maber ka wawere gi gino ka en gima nyalo monowa wuotho kuom yie.

SAMA IYUDO WECHE MA TAYI KOWUOK KUOM RIWRUOGWA

13. Ang’o ma nyalo monowa wuotho kuom yie sama wayudo weche ma tayowa kowuok kuom riwruogwa?

¹³ Thothne wayudoga weche ma tayowa kowuok kuom jodong-kanyakla, jorit-alwora, bad ofise, kata Bura Matayo. To nade ka ok wang’eyo gimomiyo onyiswa ni watim gimoro? Wanyalo chako paro mana pek ma wabiro yudo ka waluwo gima onyiswano. Kata, wanyalo keto pachwa kuom nyawo ma owete ma tayowa nigo.

14. Ang’o ma biro konyowa wuotho kuom yie sama wayudo weche moko ma tayowa kowuok kuom riwruogwa? (Jo-Hibrania 13:17)

¹⁴ Sama wawuotho kuom yie, wanyiso ni wan gadier ni Jehova e ma chiko weche kendo ni ong’eyo chalwa e yo maber. Mano e momiyo waluwo kaka itayowa ma ok wang’ur. (Som Jo-Hibrania 13:17.) Ka waluwo kaka itayowa, kanyakla bedo gi winjruok maber. (Efe. 4:2, 3) Kata obedo ni owete ma tayowa orem, ka waluwo kaka gitayowa, Jehova biro guedhowa. (1 Sa. 15:22) Obiro rieyo gimoro amora ma ok dhi kare e kinde mowinjore.—Mika 7:7.

15-16. Ang’o ma nokonyo owadwa moro wuotho kuom yie e kinde ma ne giyudo lokruok e yo ma ne gilendogo? (Ne picha bende.)

¹⁵ We wanon ane ranyisi moro ma nyiso gueth ma wayudoga sama wawuotho kuom yie. Kata obedo ni dho Spanish e mitiyogo ahinya e piny Peru, thoth joma odak e pinyno tiyoga gi dhok mamoko ma bende iwacho kono. Achiel kuom dhokgo en Quechua. Kuom higni mang’eny, owete gi nyimine ma wacho dho Quechua nosebedo ka manyo joma wacho dhokno e alworagi. Mondo ne ginyis ni giluwo chike mag sirkal, notim lokruok e yo ma ne gilendonego ji. (Rumi 13:1) Mano nomiyo moko kuomgi ochako bedo gi kiawa ka be lokruogno ne dhi miyo giyud joma wacho dho e Quechua. Kata kamano, nikech owetego noluwo kaka nitayogi, Jehova noguedho kinda ma ne giketo e manyo joma wacho dho Quechua.

¹⁶ Owadwa Kevin ma en jaduong’ e kanyakla ma iwachoe dho Quechua, ne wuoro ahinya ka be lokruogno ne dhi kelo ber moro amora. Owacho kama: “Ne apenjora ni, ‘Ere kaka wabiro yudo joma wacho dho Quechua?’” Kevin notimo ang’o? Odhi nyime wacho kama: “Naparo weche ma yudore e Ngeche 3:5, kae to naparo ranyisi mar Musa. Jehova nonyiso Musa ni ota Jo-Israel ka giluwo Nam Makwar, ma en kama Jo-Misri ne nyalo makogi e yo mayot. To e ma pod Musa noluwo kaka nonyise kendo Jehova noguedhe ahinya.” (Wuok 14:1, 2, 9-11, 21, 22) Kevin noikore tiyo gi paro manyien ma nomigi. Mano nokelo ber mage? Odhi nyime wacho kama: “Namor ahinya neno kaka Jehova noguedhowa. Chon ne wawuothoga mang’eny ahinya ka wamanyo joma wacho dho Quechua, to seche moko ne wayudo ng’ato achiel kata ji ariyo kende ma wacho dhokno. Tinde wadhi e alwora ma thoth ji wachoe dho Quechua. Mano osemiyo wachako mbaka gi ji mang’eny, wayudo dok limbe mang’eny kendo tayo jopuonjre Muma mathoth. Kwan mag joma biro e chokruogewa bende osemedore.” En adier ni sama wawuotho kuom yie Jehova guedhowaga ahinya.

17. Ang’o mipuonjori e sulani?

¹⁷ Wasenono kaka wanyalo dhi nyime wuotho kuom yie e weche moko adek madongo. Kata kamano, nyaka wadhi nyime wuotho kuom yie e ngimawa duto, gibed e weche mag manyo mor kod yiero ma watimo e weche mag somo kata pidho nyithindo. Sama wadwaro timo yiero moro amora, ok onego otawa gi gik ma waneno kende, to onego wayie mondo winjruokwa gi Jehova, paro mochiwo, kod singoge e ma otawa. Ka watimo kamano, to “wanawuoth e nying Jehova Nyasachwa nyaka chieng’.”—Mika 4:5.