Ikri Konyo Joma ‘Chunygi ni Kare’

1. Ji rwakoga nade wach maber ma walandonegi? (Tich Joote 13:​47, 48; 16:​14, 15)

E KINDE Jokristo mokwongo, ji mang’eny norwako adiera mana mapiyo bang’ winje. (Som Tich Joote 13:​47, 48; 16:​14, 15.) E kindegi bende, nitie joma bedoga mamor sama giwinjo wach maber. Kata mana joma ok oikore rwako wach Pinyruoth sama wahango yalonegi bende bang’e nyaloga rwako adiera. En ang’o monego watim sama wayudo joma ‘chunygi ni kare’ e tij lendo?

2. Ere kaka tijwa mar lendo chalo gi mar japur?

² Wane ane ranyisi ma luwoni. Tijwa mar lendo inyalo pim gi tij japur. Moko kuom olembe mopidho nyalo kwongo ne mamoko chiek. Obiro pono olembe ma osechiek ka konchiel to odhi nyime rito ma pok ochiek. E yo ma kamano bende, sama wayudo ng’at morwako wach, wabiro timo duto ma wanyalo mondo wakonye obed jalup Kristo. To komachielo, wadhi nyime konyo joma pok oikore rwako wach mondo gin bende gine ber mar puonjruok Muma. (Joh. 4:​35, 36) Rieko biro konyowa fwenyo ka be ng’ato oikore rwako wach kod yo maber mar konye. Wane ane gima wanyalo timo e limbe mokwongo mondo wakony joma oikore rwako wach. Bende, wabiro neno kaka wanyalo konyogi mondo gidhi nyime timo dongruok.

KAKA WANYALO KONYO JOMA OIKORE RWAKO WACH MABER

3. En ang’o monego watim sama wayudo joma orwako wach? (1 Jo-Korintho 9:26)

³ Ka wayudo joma orwako wach sama walendo, dwaher konyogi mapiyo mondo gichak wuotho e yor ngima. E kinde kaka mago, onego wanyisgi kaka wapuonjoga ji Muma kendo gwelogi e chokruogewa.—Som 1 Jo-Korintho 9:26.

4. Chiw ane ranyisi mar ng’at ma noikore puonjore Muma achiel kachiel.

⁴ Chako puonjruok Muma. Moko kuom joma walendonegi oikorega chako puonjore Muma achiel kachiel. Kuom ranyisi, nyako moro modak e piny Canada nodhi e troli chieng’ Tich Ang’wen moro mokawo brosua mar Inyalo Dak gi Mor Nyaka Chieng’! Achiel kuom nyiminewa ma ne lendo e trolino nonyise ni brosuano en mar puonjruok Muma. Nyakono ne mor gi wachno kendo nochiwo nambane mar simu. Bang’e e odiechieng’no, nopenjo nyaminwano chieng’ ma obiro chako puonjee Muma. Ka ne nyaminwano onyise ni onyalo lime e giko jumano mondo gipuonjre, nyakono nopenje niya: “Be inyalo biro kiny? Abiro bedo thuolo.” Ne gichako puonjore chieng’ Tich Abich. Nyakono nodhi e chokruok e giko jumano kendo nodhi nyime timo dongruok mapiyo.

5. Ang’o ma nyalo konyowa fwenyo joma wanyalo chakogo puonjruok Muma? (Ne pichni bende.)

⁵ Kuom adier, ok wagen ni ji duto ma wawuoyogo biro rwako wach kaka nyako ma wawuoyo kuomeno. Nitie joma nyalo dwarore ni walim nyadinwoya. Samoro nyalo dwarore ni wachak wuoyo e wi wach ma moro ng’ato. To ka wan gi paro mowinjore kendo wadewe gadier, wanyalo chako puonjruok kode ka pok odeko ahinya. Wanyalo tiyo gi weche kaka mage mondo wachak puonjruok Muma gi ng’ato? Wane ane paro moko ma owete gi nyimine molony e chako puonjruok gi ji Muma nochiwo ka nopenjgi penjono.

6. Gin weche mage ma wanyalo tiyogo mondo wakony ng’ato neno kaka puonjruok Muma nyalo konye?

⁶ Jolendo kod jopainia ma nokwa mondo ochiw paro e wi yore mabeyo mag chako puonjruok Muma gi ji, nowacho ni e pinje moko ok ber tiyo gi weche kaka “somo,” “puonjruok Muma,” kata “abiro mondo apuonji.” Ne giwacho ni ber tiyo gi weche kaka “mbaka,” “wuoyo,” kod “ng’eyo weche manie Muma.” Inyalo chwalo mbakano gi weche kaka, “Muma chiwoga dwoko mag penjo madongo ma ji nigo e yo miwuoro ahinya,” kata “Muma ok en mana buk moting’o weche mag din, to okonyowa e yore mamoko bende.” Kae to inyalo medo kama: “Mbakawano ok bi kawoga thuolo malach. Inyalo puonjori wach maduong’ ahinya mana kuom dakika 10 kata 15 kende.” Wanyalo tiyo gi wechego ma ok wawacho weche kaka “chenro” kata “juma ka juma,” mondo ng’atno kik ne ka gima ichune.

7. En kinde mage ma jomoko osefwenyoe adiera mag Muma? (1 Jo-Korintho 14:​23-25)

⁷ Gwelgi e chokruok. Nenore ni e kinde jaote Paulo, nitie joma nofwenyo adiera mag Muma ka ne gidhi e chokruok mar Jokristo. (Som 1 Jo-Korintho 14:​23-25.) Mano bende e gima timore e kindegi. Thoth joma nyien ma wayudo e tij lendo timoga dongruok mapiyo ka gichako biro e chokruogewa. Onego wachak gwelogi kar ang’o? E sula mar 10 mar bug Inyalo Dak gi Mor Nyaka Chieng’!, ijiwoga jopuonjre mag Muma mondo odhi e chokruogewa. Kata kamano, ok ochuno ni uchop e sulano eka igwelgi. Inyalo gwelo ng’atno e chokruoge mag giko juma mana e limbe mokwongo. Inyalo nyise wi twak mar ji duto kata wach moro ma yudore e Ohinga mar Jarito ma ubiro puonjoru jumano.

8. Gin gik mage ma timorega e chokruogewa ma wanyalo nyiso ng’ato sama wagwele? (Isaya 54:13)

⁸ Sama igwelo ng’ato e chokruogewa, nyise kaka chokruogewa opogore gi mag dinde mamoko ma nyalo bedo ni osedhiye. Ka ne japuonjre moro ohango biro e chokruogewa mag giko juma, nopenjo nyaminwa ma ne puonjore kode niya: “Nenore ni ng’at ma ne tayocha ong’eyo nyinge ji duto, donge?” Nyaminwano nonyise ni waduto watemoga ng’eyo nyinge joma nie kanyakla, mana kaka wang’eyo nyinge joodwa. Mano nopogore ahinya gi gima ne timore e din ma japuonjreno ne dhiye. Wanyalo nyiso ng’atno gimachielo momiyo chokruogewa opogore gi mag dinde mamoko. (Som Isaya 54:13.) Wachokorega mondo walam Jehova, wapuonjre dwache, kendo wajiwre. (Hib. 2:12; 10:​24, 25) Mano e momiyo chokruogewa ochan maber, kendo gipogore ahinya gi nyasi kata romo mamoko. (1 Kor. 14:40) Utewa mag romo olos e yo maber mondo ji duto mobiro e chokruok opuonjre wach Nyasaye kama okuwe. Ok wawuoga e weche mag siasa e chokruogewa nikech ok wan mag pinyni. Bende, ok wadonjrega e mbekni mag mino wach kata jiwo pachwa wawegi. Inyalo nyiso ng’atno vidio mar Ang’o ma Timorega e Kingdom Hall? mondo ong’e gik mobiro neno e chokruoge.

9-10. Ang’o ma wanyalo nyiso ng’ato sama wagwele e chokruogewa mondo kik obed maluor? (Ne picha bende.)

⁹ Jomoko dikore biro e chokruogewa nikech giparo ni ibiro nyisgi ni giwe din ma gidhiye mondo gibed Joneno. Kony joma kamago mondo obed gadier ni wamorga bedo gi welo e chokruogewa, kata kamano, ok wachun-ga ng’ato ang’ata mondo obed Janeno. Bende, orwak joot duto moriwo nyaka nyithindgi. E chokruogewa, nyithindo ok puonj kar kendgi. Kar mano, jonyuol bet kanyachiel gi nyithindgi sama ipuonjowa. Mano konyo jonyuol ng’eyo kama nyithindgi nitie kod gik ma ipuonjogi. (Rap. 31:12) Ok wakwa pesa kata pogo ji bahasa mondo giketee sadaka. Kar mano, waluwo chik ma Yesu nowacho niya: “Nuyudo nono, omiyo chiwuru nono.” (Mat. 10:8) Bende, inyalo nyiso ng’atno ni ok ochuno ni orwakre e yo molichore sama obiro e chokruok. Mano en nikech Nyasaye ng’iyoga chuny ng’ato to ok kaka onenore gi oko.—1 Sam. 16:7.

¹⁰ Ka ng’atno obiro e chokruok, tim duto minyalo mondo ikonye obed thuolo. Konye mondo ong’ere gi owete gi nyimine mamoko moriwo nyaka jodong-kanyakla. Korwake maber to biro bedone mayot duogo e chokruogewa kendo. Ka dipo ni obiro ma onge Muma, tiuru gi Mumbi kendo ikonye luwore gi jagol-twak kod puonjruok mar Ohinga mar Jarito.

GIMA INYALO TIMO BANG’ CHAKO PUONJRUOK

11. Ere kaka inyalo nyiso ni idewo ng’at ma ipuonjorigo?

¹¹ Gin weche mage monego waket e paro sama wapuonjore Muma gi ng’ato? Nyis ni idewo chenro mag ng’atno kendo iti maber gi thuolo momiyi. Kuom ranyisi, ka po ni uwinjoru ni onego ichop e seche moko sie, tem matek mondo irit sa, kata ka po ni thoth ji e alworau ok ritga sa. E wi mano, inyalo temo mondo iti gi thuolo matin e puonjruoku mokwongo. Jolendo moko molony wacho ni ber kupuonjoru mana machuok kata ka po ni ng’atno nigi siso mar winjo weche momedore. Kik iwuo mang’eny ahinya. Kar mano, mi ng’atno thuolo moromo mar chiwo pache.—Nge. 10:19.

12. Dwachwa maduong’ onego obed ang’o sama wapuonjore Muma gi ng’ato?

¹² Sama wachako puonjore Muma gi ng’ato, dwachwa maduong’ onego obed konye ng’eyo Jehova gi Yesu kendo herogi. Mondo watim kamano, wanyalo nyisogi gima Muma puonjo kar tiyo gi pachwa wawegi. (Tich 10:​25, 26) Jaote Paulo ne wuoyoga nyading’eny e wi puonj mag Yesu Kristo nikech Yesu ema Jehova ne ooro mondo okonywa ng’eye kendo here. (1 Kor. 2:​1, 2) Paulo bende nonyiso gimomiyo dwarore ni wakony jopuonjre manyien mondo gibed gi kido mabeyo minyalo pim gi dhahabu, fedha, kod kite ma nengogi tek. (1 Kor. 3:​11-15) Moko kuom kidogo gin yie, rieko, pogo weche kare, kod luoro Jehova. (Zab. 19:​9, 10; Nge. 3:​13-15; 1 Pet. 1:7) Luw ranyisi mar Paulo kuom konyo jopuonjreni mondo gibed gi yie motegno kod winjruok maber gi Wuon-gi manie polo.—2 Kor. 1:24.

13. Ere kaka wanyalo nyiso horuok kendo dewo joma orwako wach? (2 Jo-Korintho 10:​4, 5) (Ne picha bende.)

¹³ Luw yo ma Yesu ne puonjogo kuom bedo ng’at ma hore kendo ma dewo ji. Kik ipenj penjo ma nyalo kuodo wi ng’ato. Ka po ni nitie puonj moko ma ng’atno ok winj tiendgi maber, unyalo wuoyo kuomgi machuok kae to ubi unon-gi matut bang’e. Kar chune mondo oyie gi puonj moro, miye thuolo mondo orwak puonjno koa e chunye. (Joh. 16:12; Kol. 2:​6, 7) Muma pimo puonj mag miriambo gi gik mogurore motegno. (Som 2 Jo-Korintho 10:​4, 5; ne weche mag timo nonro e Study Bible e bwo wich ma wacho ni, “overturning strongly entrenched things.”) Kony japuonjreni neno Jehova kaka kar bwokne, nikech mano biro miyo orwak gik manyien mopuonjore e yo mayot.—Zab. 91:9.

GIMA INYALO TIMO SAMA JOPUONJRE OCHAKO BIRO E CHOKRUOGE

14. Ere kaka onego wane joma nyien mochako biro e chokruogewa?

¹⁴ Jehova ok dwar ni wabuon joma orwako wach nikech ogandagi, sombgi, tijgi, kata kaka ne gipon. (Jak. 2:​1-4, 9) Ere kaka wanyalo nyiso ni wahero welo mobiro e chokruogewa?

15-16. Ang’o ma wanyalo timo mondo welo mobiro e chokruogewa obed thuolo?

¹⁵ Nitie joma nyalo biro e chokruogewa mana mondo gine gik ma timore, kata nikech ogwelgi gi jalendo modak e alwora machielo. Omiyo, ka ineno ng’at manyien mobiro e chokruok, tem matek mondo iwuo kode. Rwake gi mor, kata kamano, kik itim gima nyalo miye luoro kata wich-kuot. Gwele mondo obed bathi. Som kode Mumbi kaachiel gi buge puonjruok mamoko mitiyogo e chokruok, kata inyalo miye meke. E wi mano, par yore mamoko minyalo konyego mondo obed thuolo. Dichwo moro ma nodhi e chokruok mar kanyakla nonyiso owadwa ma norwake ni noluor nikech noneno ni orwakre mopogore. Owadwano nolerone ni Joneno mag Jehova chal achala gi jomamoko, to mano nomiyo obedo thuolo. Dichwono notimo dongruok mochopo e batiso kendo wiye pok owil gi kaka owadwano norwake. Kata kamano, ber ka waparo wachni: Sama wawuoyo gi welo ka pok chokruok ochakore kata bang’ chokruok, onego wanyis ni wadewogi gadier kendo kik wapenjgi penjo ma nyalo kuodo wigi.—1 Pet. 4:15.

¹⁶ Wanyalo nyiso ni wadewo welo mobiro e chokruogewa kokalo kuom mbaka ma wagoyo, paro ma wachiwo, kaka watimo migepewa, kendo nyiso luor sama wawuoyo kuom joma ok ti ne Jehova kata puonj ma giyiego. Tang’ gi weche ma nyalo chwanyogi kata ma nyalo miyo kik gigomb duogo. (Tito 2:8; 3:2) Kuom ranyisi, ok onego wajar kata wacha puonj ma giyiego. (2 Kor. 6:3) Mano nyiso ni owete ma golo twege mag ji duto nyaka tang’ ahinya gi weche ma gitiyogo. Bende, owetego nyalo nyiso ni gidewo welo mobiro e chokruok kuom leronegi tiend weche moko ma Joneno tiyogago.

17. Ang’o monego watim sama waromo gi joma ‘chunygi ni kare’ e tij lendo?

¹⁷ Dwarore ni watim tijwa mar loko ji obed jopuonjre mapiyo kaka ndalo medo kalo, kendo wadhi nyime manyo joma ‘chunygi ni kare ne ngima mochwere.’ (Tich 13:48) Sama watimo mano, kik wawe nyisogi chenro mar puonjruok Muma kata gwelogi e chokruogewa. Ka watimo kamano, wanyalo konyogi chako wuotho e yo ‘ma tero ji e ngima.’—Mat. 7:14.