Penjo Moa Kuom Josombwa
Ng’at ma nondiko Ngeche 30:18, 19 nowacho ni “yor wuoyi gi nyako” ok yot ng’eyo. Ang’o ma notemo wacho?
Ji mang’eny ok ong’eyo tiend wechego, to mano oriwo nyaka joma olony gi weche manie Muma. Muma mar Loko mar Piny Manyien keto ndikono duto niya: “Nitiere gik moko adek modhiera ng’eyo, ee, gik moko ang’wen ma ok ang’eyo korgi: Yor otenga e polo, yor thuol e lwanda, yor meli e nam, kod yor wuoyi gi nyako.”—Nge 30:18, 19.
E kinde mokalo, ne waparo ni weche motigo e ndikono ni “yor wuoyi gi nyako,” ne wuoyo kuom gimoro ma ok owinjore. Ang’o momiyo ne wawacho kamano? Weche molworo ndikono wuoyo kuom gik maricho ma ok wachga ni “oromo.” (Nge. 30:15, 16) Kae to kwan matindo 20 wuoyo kuom “dhako ma jachode” ma wacho ni onge gimoro amora marach mosetimo. Mano e momiyo ne wajawacho ni mana kaka otenga ma fuyo e kor polo, thuol manie lwanda, kod meli manie nam, wuoyino nyalo timo gimoro ma ng’ato ang’ata ok ofwenyo. Nikech mano, ne waparo ni weche motigo ni “yor wuoyi gi nyako” wuoyo kuom gimoro marach, tiende ni wuoyi ma rieknige ng’eny ma wuondo nyako moro mondo oterre kode.
Kata kamano, nitie weche moko ma konyowa ng’eyo ni ndikono wuoyo kuom gik mabeyo to ok maricho. Jandikono ne mor ahinya mana gi gik mabeyo mowachgo.
Kitepe machon mag dho Hibrania nyiso ni ndikono wuoyo kuom gimoro maber. Ka luwore gi buk miluongo ni Theological Lexicon of the Old Testament, weche mag dho Hibrania molok e Ngeche 30:18 ni “modhiera ng’eyo” wuoyo kuom “gimoro maber ahinya kata gimoro ma ji nyalo neno ni ok nyal timore.”
Profesa Crawford H. Toy ma wuok Harvard University e piny Amerka bende nowacho ni wechego ok wuo kuom gimoro marach. Nowacho niya: “Ndikono wuoyo e wi yo ma gik mokwan-go nyalo kawogo ng’ato gi wuoro.”
Nenore maler ni weche ma yudore e Ngeche 30:18, 19 wuoyo kuom gik mabeyo ahinya kendo ma ok wanyal ng’eyo korgi. Mana kaka jandik bug Ngeche, wan bende wadhierga nono ka waneno kaka otenga fuyo e kor yamo, kaka thuol nyalo idho wi lwanda to oonge tiendene, kaka meli moting’o gik mapek nyalo lewo e nam, kod kaka wuoyi gi nyako nyalo herore kendo dak kanyachiel ka gimor.