Be Nitie Sirkal Mochung’ Motegno ma Nyalo Locho e Wi Pinywani?​—Ang’o ma Muma Wacho?

Nitie tungni mang’eny e sirkende duto ma locho e pinywani. Kata e pinje ma nenore ni sirkendegi ochung’ motegno, weche kaka mag mibadhi, ywaruok e kinde yiero, pogruok e siasa, kod ng’anyo osechocho gik mang’eny e sirkendego.

Muma wacho ni nitie sirkal moro achiel mochung’ motegno. Samoro isegawinjo e wi sirkandno. En e sirkal ma Yesu nowuoyoe e lamo mar Ruoth.

• “Un to onego ulem kama: ‘Wuonwa manie polo, nyingi mondo obed maler. Pinyruodhi mondo obi. Dwaroni mondo otimre e piny kaka timore e polo.’”​—Mathayo 6:9, 10.

Ang’o ma Muma wacho e wi Pinyruodhno?

Pinyruodhno Biro Chung’ Motegno

Sirkandno locho koa e polo.

• Yesu noluongo sirkandno ni “Pinyruodh polo.” (Mathayo 4:17; 5:3, 10, 19, 20) Mano e momiyo Yesu nowacho kama: “Pinyruodha ok en mar pinyni.”​—Johana 18:36.

Pinyruodhno biro kawo kar sirkende duto mag pinyni.

• Muma wacho kama: “Pinyruodhno [biro] ng’injo pinjeruodhi [duto mag dhano] motiekgi chuth kendo noloch nyaka chieng’.”​—Daniel 2:44.

Pinyruodhno ma Ruodhe en Yesu Kristo ok bi kethi ngang’.

• Muma wacho niya: “Lochne en loch ma nyaka chieng’ ma ok norum, kendo pinyruodhe ok noketh ngang’.”​—Daniel 7:13, 14.

Pinyruodhno biro kelo kuwe kendo tieko gik ma miyo ji luoro.

• Muma wacho kama: “Ng’ato ka ng’ato nodag e dalane gi kue, koyueyo e tipo [mar] yiend mzabibu mare kod ng’ope, ma onge gima goye kibaji.”​—Mika 4:4, The Bible in Luo, 1976.

Puonjri mathoth e wi Pinyruodhno

Ka ne Yesu nie piny, notimo kinda “koyalo wach maber mar Pinyruoth.” (Mathayo 9:35) Nokoro bende kama:

• “Wach maber mar Pinyruoth ibiro yal e piny mangima mondo obed ranyisi ne ogendni duto, eka giko nobi.”​—Mathayo 24:14.

E kindewagi, wach maber mar Pinyruoth ilando e pinje mokalo 240. Wagweli mondo ipuonjri mathoth e wi Pinyruodhno kod ber monyalo keloni.

Ne vidio ma wiye wacho ni Pinyruodh Nyasaye En Ang’o?