Picha ma nyiso dend dhano, ka ma pinyruoth kata sirkal ma sie ok nyal betie

Be Pinyruodh Nyasaye Nie Chunyi?

Dwoko ma Muma chiwo

Ooyo, Pinyruodh Nyasaye ok en mana gima nie chuny Jokristo.a Muma nyisowa ka ma Pinyruodh Nyasaye nitie nikech oluonge ni “pinyruodh polo.” (Mathayo 4:17, King James Version) Ne ane kaka Muma leronwa ni Pinyruodh Nyasaye en sirkal madier ma locho koa e polo.

Pinyruodh Nyasaye nigi joloch, joma olocho e wigi, chike, kendo obiro miyo dwach Nyasaye otimre e polo koda piny.—Mathayo 6:10; Fweny 5:10.
Pinyruodh Nyasaye kata sirkande biro locho e wi “ji duto, bed ni giwuok e dhoot mane kata giwacho dhok mane.” (Daniel 7:13, 14) Teko ma en-go mar locho wuok kuom Nyasaye, to ok dhano.—Zaburi 2:4-6; Isaya 9:7.
Yesu nonyiso jootene ma ne omakore kode ni ne gidhi riwore kode e pinyruodh polo mondo ‘gibed e kombe ruodhi.’—Luka 22:28, 30.
Pinyruodhno nigi jowasike ma obiro ketho chuth.—Zaburi 2:1, 2, 8, 9; 110:1, 2; 1 Jo-Korintho 15:25, 26.

Muma ok puonj ni Pinyruodh polo nie chuny ng’ato kata ni olocho e chuny ng’ato. Kata kamano, onyisowa ni “wach Pinyruoth” kata “wach maber mar Pinyruoth” nyalo mulo chuny ng’ato.—Mathayo 13:19; 24:14.

Sama Muma wacho ni “pinyruodh Nyasaye ni e iu,” mano tiende ang’o?

Jomoko ok ong’eyo ka ma Pinyruodh Nyasaye nitie nikech yo ma Mumbni moko lokogo ndiko mar Luka 17:21. Kuom ranyisi, King James Version wacho ni “pinyruodh Nyasaye ni e iu.” Mondo wawinj tiend ndikono e yo maber, wanyalo nono weche molwore.

Moko kuom jotend din ma ne kwedo Yesu — Pinyruodh Nyasaye ok ne nie chuny joma ne kwedo Yesu kendo ma ne dwaro nege

Noyudo Yesu wuoyo gi Jo-Farisai ma ne gin jotend din ma ne kwede kendo ma ne chano mondo ginege. (Mathayo 12:14; Luka 17:20) Be en adier ni Pinyruodh Nyasaye ne nyalo bedo e chunygi to ne gin joma kwedo Yesu? Yesu nonyisogi kama: “Iu opong’ gi wuondruok kod ketho chik.”—Mathayo 23:27, 28.

Loko mamoko mag Muma lero maber weche ma ne Yesu owacho e Luka 17:21 ka giwacho niya: “Pinyruodh Nyasaye nie kindu kae.” (Wan e ma wapielo wachno; Contemporary English Version) kata “Pinyruodh Nyasaye nie dieru.” (New World Translation) Pinyruodh polo ne nie ‘kind’ Jo-Farisai kata ne ni e ‘diergi’ nikech Yesu ma en e jal ma Nyasaye oseyiero mondo obed Ruoth ne ochung’ e nyimgi.—Luka 1:32, 33.

a Dinde mang’eny mag Jokristo puonjo ni Pinyruodh Nyasaye en gima ni kuom ng’ato, kata gima nie chuny ng’ato. Kuom ranyisi, e piny Amerka, din mar Southern Baptist Convention nolando ni Pinyruodh Nyasaye “en gima nyiso ni Nyasaye locho e chuny ng’ato kendo ni otayo ngimane.” Bende, Pope Benedict XVI nondiko e buge miluongo ni Jesus of Nazareth, ni “Pinyruodh Nyasaye biro mana kokalo kuom chuny ma winjo wach.”