Ere Kaka Joneno mag Jehova Neno Ketho Kend Chuth?
Waluwo gima Muma wacho e wi ketho kend chuth. Ka ne Nyasaye ochueyo dichwo gi dhako, nodwaro ni gidag kanyachiel nyaka chieng’. Muma wacho ni ng’ato nyalo ketho kendne chuth mana ka nyawadgi oterore.—Mathayo 19:5, 6, 9.
Be Joneno mag Jehova konyoga joma okendore loyo pek mag kend?
Ee, gitimoga kamano kokalo kuom yore mang’eny:
Bugewa. Nitie buge kod sula mopogore opogore ma nyalo konyo joma okendore, kendo reso kend ma nenore ni osekethore chuth. Kuom ranyisi, ne sula ma luwogi e gaset mar Nenuru! ma higa 2018, Na. 2: “Chiwruok,” kod “Ng’wono ne Nyawadu.”
Chokruogewa. Wawuoyoga e wi puonj mag Muma ma nyalo konyo joma mokendore e chokruogewa mag kanyakla kod mamoko madongo.
Jodong-kanyakla. Jodong-kanyakla konyoga joma okendore ka gitiyo gi ndiko, kuom ranyisi, Jo-Efeso 5:22-25.
Be jodong-kanyakla yiega ne Joneno mag Jehova mokendore mondo giketh kendgi chuth?
Ooyo. Kata ka jodong-kanyakla konyoga joma okendore nyagore gi pek mag kend, ok gitimnegiga yiero ka be onego giketh kendgi kata ooyo. (Jo-Galatia 6:5) Kata kamano, ka ng’ato oyiero ketho kend nikech wach moro mopogore gi ma ndiko oyiego, to ok en thuolo donjo e kend machielo.—1 Timotheo 3:1, 5, 12.
Ere kaka Joneno mag Jehova neno pogo dak?
Muma jiwo joma okendore ni gisik e kend margi kata ka gin gi pek moko e kendgino. (1 Jo-Korintho 7:10-16) Thoth chandruoge mag kend inyalo lo kokalo kuom lamo gi kinda, tiyo gi puonj mag Muma, kod nyiso hera madier.—1 Jo-Korintho 13:4-8; Jo-Galatia 5:22.
Kata kamano, seche moko nyaloga chuno ng’ato pogo dak gi ng’at mokendorego nikech weche kaka ma luwogi:
Ka ng’ato ok dwar rito joode goyiem.—1 Timotheo 5:8.
Ka ng’ato goyo nyawadgi ma miyo ngimane bedo kama rach.—Zaburi 11:5.
Ka ng’at mokendorego miyo lamo Jehova bedone matek. Kuom ranyisi, jaod Janeno moro nyalo chune mondo oketh chike mag Nyasaye. Mano nyalo miyo Janenono oyier pogo dak gi ng’at mokendoregono ka mano kende e yo monyalo dhi nyime nyisogo ni ‘owinjo Nyasaye kar winjo dhano.’—Tich Joote 5:29.