LERO TIEND NDIKO MAG MUMA
Chakruok 1:26—“Wachue Dhano e Kido Machal Kodwa”
“Eka Nyasaye nowacho niya: “Koro, wachue dhano e kido machal kodwa, mondo gibed gi teko e wi rech manie nam, gi gik ma fuyo e kor polo, gi le mipidho, kod gik mamoko duto mamol e wi piny.’”—Chakruok 1:26, Loko mar Piny Manyien.
“Kendo Nyasaye nowacho niya, mondo wachwe dhano e kido machalo kodwa, koket kodwa: kendo mondo gibedi gi teko kuom rech ma ni e nam, kendo kuom winy me polo, kendo kuom jamini, kendo kuom piny duto, kendo kuom gik mamol duto ma wuotho e piny.”—Chakruok 1:26, The Bible in Luo, 1968.
Tiend Ndiko mar Chakruok 1:26
Dhano nochue e kit Nyasaye, mano nyiso ni gin gi nyalo mar nyiso kido mag Nyasaye kaka hera, ng’wono, kod ng’ado bura e yo makare. Wechego nyiso maler gimomiyo dhano nyalo bedo gi kido kaka mag Nyasaye.
“Nyasaye nowacho niya: ‘Koro, wachue dhano e kido machal kodwa.’” Ka ne pok Jehova Nyasayea ochueyo gimoro amora, nokwongo ochueyo malaika moro ma nigi teko ma iluongo ni Yesu. Kokalo kuom Yesu, “ne ochue gik mamoko duto manie polo gi manie piny.” (Jo-Kolosai 1:16) Yesu e kido makare chuth mar Nyasaye. Muma wacho niya: “En e kido mineno mar Nyasaye ma ok ne.” (Jo-Kolosai 1:15) Mano e momiyo Nyasaye ne nyalo nyiso Yesu niya: “Wachue dhano e kido machal kodwa.”
‘Mondo gibed gi teko e wi le mipidho duto e wi piny.’ Le ne ok ochue e kit Nyasaye. Ne ok omigi nyalo ma dhano nigo kaka nyiso hera kata nyalo mar pogo ber gi rach. To e ma pod Jehova ohero le duto ma nochueyo. Mano e momiyo nowacho ni dhano ne dhi bedo gi “teko e wi,” le, ma gin weche ma bende inyalo lok ni, “giloch e wi” le, (New International Version) kata “girit” le (Common English Bible). Kuom mano, Jehova nomiyo dhano migawo maduong’ mar rito le. (Zaburi 8:6-8; Ngeche 12:10) Jehova dwaro ni dhano orit piny kaachiel gi gik mangima duto manie iye.
Weche Molworo Ndiko mar Chakruok 1:26
Sula ariyo mokwongo mag bug Chakruok wuoyo kuom kaka nochue piny gi polo, kor lwasi, kod gik mangima manie piny. Gik moko duto ma Jehova nochueyo beyo, kata kamano, dhano e chuechne maberie mogik e piny kae. Ka ne Nyasaye osetieko chuecho, “nong’iyo gik moko duto ma nosechueyo, moneno ni gibeyo ahinya.”—Chakruok 1:31.
Ne ane vidio machuokni mondo ine weche momedore e wi chuech miwuoyoe e bug Chakruok.
Paro ma ok kare ma jomoko nigo e wi Chakruok 1:26
Paro ma ok kare: Mon onge gi nyalo mar bedo gi kido kaka mag Nyasaye, chwo kende e ma nigi nyalo ma kamano.
Adiera: Mumbni mang’eny mag dho Kisungu oloko wesno ni “wachue dichwo e kido machal kodwa,” mano nyalo miyo ng’ato opar ni ndikono wuoyo mana kuom joma chwo kende. Kata kamano, e dho Hibrania weche ma notigo e ndikono nyiso ni iwuoyo kuom chwo gi mon. Chwo gi mon nigi nyalo mar nyiso kido mag Nyasaye. Giduto gin gi nyalo mar moro Nyasaye, kendo ginyalo yudo thuolo mar dak nyaka chieng’.—Johana 3:16.
Paro ma ok kare: Nyasaye nigi del machal gi marwa.
Adiera: “Nyasaye en Roho,” tiende ni ok wanyal nene gi wengewa. (Johana 4:24) Kata obedo ni nitie sama Muma wuoyoga e wi wang’e, lwete, chunye, kod fuonni mamoko mag del, Muma tiyoga gi weche kaka mago mondo okonywa ng’eyo Nyasaye e yo maber.—Wuok 15:6; 1 Petro 3:12.
Paro ma ok kare: Chakruok 1:26 nyiso ni Yesu en Nyasaye.
Adiera: Nyasaye gi Yesu nigi winjruok maber ahinya kaka Wuoro gi Wuode, kendo gin ji ariyo mopogore. Yesu nopuonjowa ni Nyasaye duong’ moloye. (Johana 14:28) Mondo iyud weche momedore, ne vidio ma wiye wacho ni, Be Yesu Kristo En Nyasaye? Kata isom sula ma wiye wacho ni, “Ang’o Momiyo Iluongo Yesu ni Wuod Nyasaye?”
Ne vidio machuokni ma nyiso weche ma yudore e bug Zaburi.
a Jehova en nying Nyasaye. (Zaburi 83:18) Ne sula ma wiye wacho ni “Jehova En Ng’a?”