Loso Wende ma Konyowa Sudo Machiegni gi Nyasaye

Thum en mich maber moa kuom Jehova. Thum nyalo miyo wawinj maber, onyalo duogo chunywa, kendo jiwowa. Mano e kaka wendewa makende bende konyowaga. To maduong’ moloyo, wendego konyowa sudo machiegni gi Jehova.

Chakre higa mar 2014, oselos wende makende mokalo 70, kendo moko kuom wendego yudore e dhok mokalo 500. Kata kamano nyalo bedo ni isepenjori niya: ‘Ng’ama losoga wendego, to ilosogiga e yo mane?’

Kinda ma Owete Timoga e Loso Wendego

Wende makende ilosoga gi grup mochung’ ne wer. Grubno ni e migawo mar Audio/Video, to migawono itayo gi Komiti mar Puonjo manie bwo Bura Matayo. Grubno oting’o owete gi nyimine 13 ma konyo e ndiko weche mag wer, loso thum, iko chenro, kod tije mamoko. E wi mano, Komiti mar Puonjo osepwodho joma ochiwore tiyo tije Bethel ka gin e utegi, mondo okony e tije kaka ndiko weche mag thum, loso thum, kod wero wende moseik. Owete gi nyiminego tiyo gi nyalo ma gin-go ma ok gimanyo huma moro amora.

Sama idwaro los wer moro makende, gin okenge mage miluwoga? Mokwongo, Komiti mar Puonjo yiero Ndiko ma tayo wendno, kendo ginono kaka wendno dhi mulo chuny ji. Kae to grup mochung’ ne wer miyo ji mopogore opogore tije mag loso thum kod ndiko weche mag wer. Bang’ mano, imako wer mar kionjo mondo okow ne Komiti mar Puonjo owinji, kae to gichiw pachgi. Kae to, grup mochung’ ne wer tiyo gi parogo e rieyo kuonde monego orie, kae to gimako wer mogik. Wendego imako kuonde mopogore opogore, moriwo nyaka bad ofise kod ute mag owete gi nyimine.

Mondo ondik weche mag wer kendo olos thum, owete gi nyimine tiyo gi kompyuta, program ma loso alama mag thum, laibrari moting’o thumbe moselosi, kod gik mamoko. Gitiyo bende gi gige goyo thum, masinde mag riwo dwol gi ma medo dwol, spikni, kod maikrofon. Maikrofon achiel nengone ni e kind siling’ 10,000 kod 100,000 ma Kenya. E higa mar 2020, ne watiyo gi siling’ milion 11.6 ma Kenya e nyiewo gige loso thum.

En ang’o ma watimoga mondo wakung pesa? Kar bedo gi grup maduong’ mar jower gi jothum e Bethel, sani koro watiyo gi joma ochiwore tiyo tije Bethel ka gin e utegi. E wi mano, kar kelo owete mang’eny e Bethel mondo otug gige thum, owetewa gi nyiminewa losoga thum ka gitiyo gi kompyuta.

“WENDEGO TEGO YIE”

Owete gi nyimine ohero ahinya winjo wende makende. Nyaminwa Tara modak e piny Germany wacho kama: “Wendego konya bedo gi kuwe sama an-gi parruok. Sama awinjo wendego e dhowa, to chalna mana ka gima Jehova kwaka.” Owadwa Dmitry modak e piny Kazakhstan wacho kama: “Awinjoga wendego gi chuny maler nikech an gadier chuth ni ok gituomre gi puonj manie Muma. Bende, wendego konyaga mondo aket pacha e weche Nyasaye.”

Nyaminwa Delia modak e piny South Africa wacho kaka wendego konyega. Owacho kama: “Wendego tego yie mara. Sama awinjoga ka chunya onyosore kata aromo gi pek moro, nyaka ayudie wer moro ma jiwa. Seche moko winjo awinja wer makende ma kata ok achikone ita maber oromo duogo chunya!”

Nitie moko kuom wende makende ma ji ohero ahinya. Nyaminwa Lerato ma bende odak South Africa wacho kama: “Wer ma wiye wacho ni ‘Paradiso Chiegni’ kod ma wacho ni ‘Piny Manyien ma Warito’ miyo aparoga kinde ma abiro rwako minwa bang’ kosechiere e paradiso. Sa asaya ma awinjo wendego, atemoga goyo picha e pacha ka minwa ringo kobiro ira mondo okwaka.”

Nitie wer moro makende ma nokonyo ahinya nyaminwa moro ma rawera modak e piny Sri Lanka. Owacho kama: “Chieng’ moro, japuonjwa mar sayans nowuoyona marach ahinya nikech an achiel kuom Joneno mag Jehova. Naluor ahinya kendo nakia ni awach ang’o. Ka naduogo e ot, minwa nojiwa mondo awinj wer ma wiye wacho ni ‘Study Makes You Strong.’ Wendno nokonya ng’eyo ni nonego atim nonro mondo aik kaka nanyalo dwoko japuonjwa. Kinyne, nawuoyo gi japuonjwa. Noyie winja, kendo nogoyona erokamano kuom nyise gik ma Joneno mag Jehova oyiego. Agoyo erokamano ne riwruok mar oganda Jehova kuom losonwa wende makende ma jiwowa ahinya.”

Ere kama wayudoe pesa mar loso wende makendego? En kokalo kuom chiwo magu musirogo tij piny mangima, ma thothne ugologa kutiyo gi yore moler e websaitwa mar donate.jw.org. Erourukamano ahinya!