Tiyo gi Troli e ‘Chiwo Neno ne Ogendni Duto’

Kuom higni mohingo apar, lendo gi troli osekonyo ahinya e chiwo neno. E piny ngima, ji duto nyaloga fwenyo mayot troli magwa. Troligo olos e yo makende ahinya kendo tiyo kodgi yot. Nyaminwa moro miluongo ni Asenata ma wuok Poland wacho kama: “Kata obedo ni troligo olos e yo mayot kendo modimbore, pod gibeyo kendo gimako wang’. Tiyo kodgi yot kendo inyalo dhi kodgi kamoro amora.”

Be isegapenjori ni troligo iloso nade?

Olosgi e Yo ma Ginyalo Tiyo Maber

E higa mar 2001, Bura Matayo nopwodho mondo otem ti gi yore mopogore opogore mag lendo e lela moriwo nyaka tiyo gi troli. Owete gi nyimine e piny France notemo tiyo gi troli mondo giland wach maber. Notem los troligo e yore mopogore opogore. Kuom ranyisi, nolos troli moko machal gi bege madongo miting’ogo osike. Ne ginyalo tiyo kodgi sama gilendo kendo bang’e ninyalo kanie buge. Gikone, noyier yo moro achiel ma nilosogo troligo kendo jolendo notiyo kodgi kuom higni mang’eny.

Owete man France ne mor ahinya gi nyak ma ne giyudo kuom tiyo gi troli e tij lendo. Kuom mano, e higa mar 2011, Bura Matayo nopwodho mondo ochak program moro manyien mar lendo e lela e taon mar New York e piny Amerka, kendo ne gichako tiyo gi troli moko matindo kod mesni. Jopainia ma noriwo tij lendono lwedo, nofwenyo mapiyo ni troli matindogo ne nigi ber mang’eny kendo wuotho kodgi ne yot. Jopainiago bende nochiwo paro e wi yo ma ninyalo med bergo troligo. Troli ma nokwong los gi bao ne pek ahinya kendo mano ne miyo ting’ogi bedo matek. Kuom mano, nochak losgi e yo ma koro ne bet giyot, to ok ma yot ahinya ma yamo nyalo goyo piny. Bende, nolosnegi tielo ma bet dongo ma nigi spring’ ma miyo riembogi e nderni motimo kite kod bugni bedo mayot. Nomedne bende sanduk moro matin e toke minyalo kanie buge momedore.

Program manyienno, tiende ni lendo kitiyo gi troli, nodhi maber ahinya. Kuom mano, e higa mar 2012 Bura Matayo nopwodho mondo oti gi troli e tij lendo e piny mangima. Notim chenro mondo kambi moro olos troligo mang’eny ka gilosogi gi gik mayot kendo ma ok kethre piyo.

Kaka higni ne medo kalo, nomed bergi e yore moko matindo tindo. Kuom ranyisi, e higa mar 2015, nolosnegi law moro ma nigi jwala e iye minyalo umgigo sama koth chue. Nyaminwa Dina modak e piny Georgia ohero ahinya yo molosgo lawno. Owacho kama: “Kata mana troli bende nigi law koth ma nyalo geng’o buge sama koth chue!” E higa mar 2017, nolos otese moko mibawo e wi troli ma lando weche moko. Otesego nibawo gi spak. Tomasz, Owadwa moro ma wuok Poland, wacho kama: “Ne ok en gima yot ahinya wilo otese ma ne imwonoga gi gam. Omiyo, otese mibawo gi spak ne koro tiyo maberie moloyo.” E higa mar 2019, notim lokruoge moko ne gik ma ne ilosogo troligo kod yo ma nilosogigo mondo omed ti kodgi kuom kinde malach.

Garama mar Loso Troligo

Troligo ilosoga gi kambi moro achiel kae to ikowogi kuonde mopogore opogore e piny ngima. Sani, troli achiel iloso gi dola 43 mag Amerka ka ok oriw pesa mitiyogo e kowogi kuonde mopogore opogore kod mag garama mamoko. Chop sani, dola mohingo milion 16 mag Amerka osetigo e loso troli kendo troli mohingo 420,000 osekow e kanyakla mopogore opogore e piny ngima.

Mondo oti gi chiwo migolo e yo maber, troligo ikwayoga mang’eny dichiel. E wi mano, kanyakla sani nyalo kwayo gik mokethore e troli kae to ioronegi manyien to giwilo, kar mondo giwil troli oduto.

Tiyo gi Troli Matindo e Chiwo Neno

Jolendo mang’eny e piny ngima mor ahinya tiyo gi troli e tij lendo. Martina, ma wuok Ghana wacho kama: “Kinde mang’eny sama walendo wan e ma wadhiga ir ji. Kata kamano, gima ahero gi lendo gi troli en ji e ma biro irwa. Kata mana jowuoth makalo pod ichiwonegiga neno.”

E piny moro manie Afrika, ng’at moro nosudo machiegni gi troli kae to noyudo buge moko e dhok mowacho. Bang’ juma achiel, noduogo kendo mowacho kama: “Nasomo bugego duto. Weche manie bugego beyo ahinya. Adwaro ni jooda ma bende ni dala odhi osom bugegi.” Jood ng’atno nodak kilomita 500 kama kowuok e taon kama nodakie. Bang’ dweche ariyo, noduogo kendo mowacho kama: “Jogweng’wa nosomo bugegi duto kendo ne gimor ahinya gi weche manie igi. Gidwaro bedo Joneno mag Jehova. Kata kamano, nitie penjo moko ma pod chandogi. Kuom ranyisi, ging’eyo ni mondo obatisgi, nyaka nyumgi e pi. Kata kamano, waonge gi aora machiegni kodwa. Be ochuno ni wabi koni e ka obatiswa?” Jolendogo notudo ng’atno gi painia moro ma ne wacho dhok mowacho. Chakre kindeno, gisebedo ka giwuoyo e wi weche mag Muma kanyachiel.

En gima morowa neno kaka tiyo gi Troli e yalo wach maber e piny ngima ‘chiwo neno ne ogendni duto.’ (Mathayo 24:14, weche moler piny) Pesa mitiyogo e loso troligo wuokga kanye? Pesago wuok kuom chiwo ma siro tij piny ngima ma thothne igologa kitiyo gi yore ma yudore websaitwa mar donate.jw.org. Erourukamano ahinya kuom chiwo magu.