Puonj mag Muma Konyo Kinde Duto

PAR ANE ni iwuotho e museum kama okanee gik machon mopogore opogore. Thothgi oti kendo okethore marach. Moko bende bethegi otur ma olal. Kata kamano, nitie achiel kuomgi ma opogore. Ok okethore kata matin kendo onge gimoro amora kuome molal. Mano miyo ipenjo ng’at ma tayou niya: “Dibed ni mae nyien moloyo mamoko?” Odwoki niya: “Ooyo, en e ma osedak moloyogi to bende pok okethore.” Ipenje kendo niya: “Dibed ni orite maber moloyo gik mamoko?” Odwoki niya: “Ooyo, en ema gik maricho mogik osebedo ka yude. Kendo jowasigu mang’eny osetemo kethe.” Wachno nyalo kawi gi wuoro ma ipenjri kama, ‘To olose gi ang’o?’

E yo machalo kamano, Muma bende chalo gi gima chonno. En buk machon ahinya. En adier ni nitie buge mamoko machon. Kata kamano, bugego osekethore marach nikech gisebudho. Weche ma bugego wacho e wi sayans tinde ok tigo nikech nitie weche manyien ma osefwenyore machiegnini. Paro ma gichiwo e weche thieth gin mana paro ma nyalo hinyo ji kar mondo okonygi. Ng’eny bugego ok yudre kaka ne olosgi chon kendo bethegi moko oselal kata kethore marach.

Muma to opogore ahinya. Ne ondike higni 3,500 mokalo to ema pod onge bathe kata achiel ma oselal. Kata obedo ni jomoko osetemo ketho Muma kuom wang’e, goye marfuk kata kwede, puonj ma nie yie to pok olokore. Josayans bende osefwenyo gik manyien. Kata kamano, Muma nyisowa weche mathoth kendo ma iwuoro e wi weche ma gifwenyogo.—Ne sanduku ma wiye wacho ni “Be Muma Pod Konyo e Kindegi Koso Oting’o Puonj ma Tinde Ok Kony?”

PUONJ MA DWARORE E KINDEGI

Samoro in be inyalo penjori niya: ‘Be puonj mag Muma nyalo konyowa e kindegi?’ Mondo iyud dwoko, penjri ane kama: ‘Gin chandruoge mage madongo ahinya momako ji e ndalowagi?’ Samoro inyalo wacho ni gin lwenje, gik mang’eny machido alwora, mahundu, kod mibadhi. We wane ane puonj moko ma yudore e Muma. Sama itimo kamano, penjri niya, ‘Ka ji nyalo dak kaluwore gi puonj mag Mumago, be piny nyalo bedo kama ber?’

HERO KUWE

“Joma mor gin jolos kuwe, nimar noluonggi ni nyithind Nyasaye.” (Mathayo 5:9) “Ka nyalore, to temuru matek mondo udag gi kuwe gi ji duto.”—Jo-Rumi 12:18.

KECHO JI, NG’WONONE JI

“Joma mor gin joma kecho ji, nimar nokechgi.” (Mathayo 5:7) “Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo kata kapo ni ng’ato nigi wach moro gi nyawadgi. Mana kaka Jehovaa bende ne ni thuolo weyonu richou, un bende nyaka utim kamano.”—Jo-Kolosai 3:13.

KUWE E KIND OGENDNI

Nyasaye “noloso ogendni duto koa kuom ng’ato achiel, mondo gidag e wang’ piny mangima.” (Tich Joote 17:26) “Nyasaye ok buon ng’ato ang’ata, to ei oganda moro amora, ng’at moluore kendo ma timo gik makare, oyiego.”—Tich Joote 10:34, 35.

RITO PINY

“Jehova Nyasaye nokawo dhano, nokete e puodho mar Eden mondo olose kendo orite.” (Chakruok 2:15) Nyasaye biro “kelo kethruok ne joma ketho piny.”—Fweny 11:18.

WEYO TIMBE MAG ICH LACH KAACHIEL GI TERRUOK

“Utang’ gi yore duto mag ich-lach, nimar kata ka ng’ato nigi gik mogundho, ngimane ok otenore kuom gik ma en-go.” (Luka 12:15) “Terruok, gi kit timbe duto ma ok ler, kod ich-lach, kik hulie kata matin e kindu, mana kaka onego obed kuom joma ler.”—Jo-Efeso 5:3.

BEDO JORATIRO KENDO JOKINDA

“Wadwaro bedo joratiro e gik moko duto ma watimo.” (Jo-Hibrania 13:18) “Ng’at ma kwelo kik okwel kendo; to kar mano oti matek.”—Jo-Efeso 4:28.

KONYO JOMA OCHANDO

“Wuouru e yo ma hoyo joma chunygi onyosore, teguru joma yomyom, nyisuru horuok ne ji duto.” (1 Jo-Thesalonika 5:14) ‘Rituru nyithi kiye kod mond liete e chandruokgi.’—Jakobo 1:27.

Muma ok wach awacha puonjgo. Kar mano, opuonjowa ni mondo wagen-gi ahinya kendo wati kodgi e ngimawa mapile. Ka dine bed ni ji duto nyalo luwo puonjgo, donge chandruoge momako dhano dikoro odok chien? Onge kiawa ni puonj mag Muma inyalo gen kendo gikonyo kinde duto. Kata kamano, ere kaka puonj mag Muma nyalo konyi e kindegi?

KAKA PUONJ MAG MUMA NYALO KONYI E KINDEGI

Yesu ma ne en jal mariek moloyo ji duto nowacho niya: “Rieko nyisore ni en kare kokalo kuom gik motimo.” (Mathayo 11:19) Donge in bende iyie gi wechego? Rieko nenore ka luwore gi kaka itiyo kode e ngimani. Omiyo inyalo penjori niya: ‘Ka Muma en buk ma oting’o rieko gadier, donge onego okonya e ngimana? Ere kaka onyalo konya mondo anyagra gi chandruoge ma ayudo?’ Ne ane ranyisini.

Delphineb ne odak e ngima maber. Apoya nono, chandruoge moko ne oyude. Nyare ma rawera ne otho. Kend mare ne okethore. Pesa ma ne en-go bende ne orumo. Owacho niya: “Pacha ne olal. Nyara ne otho, chwora ne oweya, kendo ot be ne aongego. Ne aneno ni an ng’at manono. Onge kama ne anyalo dhiye, ne aonge gi teko, kendo ne aonge gi geno mar kinde mabiro.”

Mago e kinde ma Delphine ne oneno ka wechegi chopo e ngimane: “Ndalo mag hikwa gin higini piero abiriyo, to kamoro gichopo higini piero aboro nikech teko ma ng’ato ni go; to sungagi en mana chandruok gi parrwok; nimar okadho piyo, mi waae.”—Zaburi 90:10.

Muma ema nokonyo Delphine e kinde ma ne en gi chandruok. Muma ne okonye e yo makende. Mana kaka wabiro neno e sula adek maluwo, ji mang’eny bende osefwenyo ni luwo puonj mag Muma nokonyogi mondo ginyagre gi chandruoge ma yudogi. Gisefwenyo ni Muma chalo gi gima chon ma ne wasewuoyoe motelo e chak sulani. Opogore ahinya gi buge mang’eny ma bedo moti kendo kargi lal nono. Be dibed ni en kamano nikech olos Muma gi gima opogore? Be en adier ni oting’o pach Nyasaye to ok mar dhano?—1 Jo-Thesalonika 2:13.

Samoro in bende iseneno ni ngima chuok kendo opong’ gi chandruok. Sama ineno ka chandruoge obembi, imanyoga hoch, kony, kod paro kanye?

We wanon ane weche adek madongo ma nyiso gadier ni puonj mag Muma nyalo konyowa e ngima. Muma nyalo puonji kaka inyalo

1. geng’o chandruoge.

2. loyo chandruoge ma omaki.

3. nyagori maber gi chandruoge ma ok inyal tieko.

Sula maluwo biro wuoyo e wi weche adekgo.