“Wachu Mondo . . . Pile . . . Obed gi Ndhadhu”
1. Tiend medo ‘ndhadhu e wechewa’ en ang’o?
1 “Wachu mondo obed mang’won pile, kendo obed gi ndhadhu, mondo ung’e kaka owinjore udwok ng’ato ka ng’ato.” (Kolo. 4:6) Medo ndhadhu e wechewa nyiso ni wayiero gima wawacho kendo wuoyo e yo mabiro miyo gibedo mowinjore ne jawinjo. Timo kamano ka walendo owinjore ahinya.
2. Ang’o ma ne okonyo Yesu e lendo ne chi Samaria?
2 Ranyisi mar Yesu: Kane oyueyo machiegni gi soko, Yesu ne okawo thuolo mar wuoyo gi chi Samaria moro ma ne obiro umbo pi. Kane giwuoyo, dhakono ne chiwo paro kuom sigu ma ne osebet e kind Jo-Yahudi gi Jo-Samaria. Dhakono bende ne onyiso yie ni Jo-Samaria ne gin nyikwa Jakobo kata obedo ni Jo-Yahudi to ne neno ni Jo-Samaria ok ne gin Jo-Yahudi. Kar mino kode wach, Yesu ne ogoyo mbaka kode e yo ma jiwe. Mano ne omiyo otimone neno ma ne okonyo dhakono kod joma moko e dalano.—Joha. 4:7-15, 39.
3. Wanyalo luwo ranyisi mar Yesu nade ka walendo?
3 Seche ma walendo kik wiwa wil ni gima omiyo walendo en ni mondo ‘wakel weche mabeyo.’ (Rumi 10:15) Wadwaro chiwo ne wuon ot weche mabeyo kod paro ma jiwe mawuok ei Muma, kik wamigi paro ni wakedo gi yie ma gin-go. Ka paro ma ochiwo ok ni kare, to dwokowa ok ochuno ni nyaka bed ma rieyo paro mare. Bende nitie gimoro ma owacho ma wanyalo yiego kata tiyogo e puoye gadier? Inyalo chako wuoyo kama kichiwo ndiko, “Be isegaparo ka mae nyalore?”
4. Onego watim ang’o ka wuon ot yenyo?
4 To nade ka wuon ot ma walendoneno yenyo kata nenore ni odwaro mana mino wach? Onego wasik ka wan gi ng’wono kod miwafu e timbe kod wechewa. (2 Timo. 2:24, 25) Ka jalo nyiso ni ok orwak wach Pinyruoth de ber ahinya ka wa a mos ka watiyo gi rieko.—Math. 7:6; 10:11-14.
5. Nyaminwa moro ne oyudo nyak mabeyo nade kuom dwoko gi muolo?
5 Weche Mabeyo Mosene: Kane nyaminwa moro otemo lendo ne miyo moro e alwora ma gidakie, miyono ne ogoyo koko gi mirima ka okwong’e. Nyaminwano ne owachone kama e yo mamuol: “Agoyo mos kuom bedo ni iwinjo kamano. Dong’ gi kuwe.” Bang’ jumbe ariyo, dhakono ne odwong’o dhood nyaminwano ka okwaye werruok kuom timne marachno, kendo koro ne onyiso ni oikore mar winjo wach ma nyaminwano ne dwaro wacho. Dwoko mamuol kinde duto bedo gi nyak mabeyo!—Nge. 15:1; 25:15.
6. Ang’o ma omiyo wechewa onego bed gi ndhadhu ka walendo?
6 Tem mondo wecheni obed gi ndhadhu seche ma ilando wach maber. Kata ka wuon ot ok oikore mar winjo, onyalo ikore mar winjo chieng’ machielo ka Joneno mag Jehova olime.