Kaka Wanyalo Medo Lony e Tij Lendo—Dwoko Joma Temo Geng’owa Mondo Kik Walendnegi

Gimomiyo Onego Wamany Yor Dwoko Joma Kamago: Kaw ane ni iyudo wach ni masira moro chiegni timore e alworau. Ji mang’eny dhi tho ka ok gikawo okang’ mar ringo a kanyo. Kae to idhi ir jirandi moro mondo imiye siem chon-chon, to otamore winji kowacho ni en odich. Kuom adier, ok ibi weye aweya mayot kamano; kar mano ibiro temo kar nyaloni mondo ikonye! Kamano bende, sama walendo e alworawa, ji mang’eny tamore winjowa nikech ok gipar ni ote ma wateronegi nyalo reso ngimagi. Nitie kinde ma gitamore winjowa nikech wayudo ka gidich. (Math. 24:37-39) Samoro nyalo bedo ni nitie joma osegoyogi fitina ni ok wan joma beyo. (Math. 11:18, 19) Kata, ginyalo paro ni wan be wachal achala gi dinde mamoko mopong’ gi timbe anjawo. (2 Pet. 2: 1, 2) Omiyo, ka wuon ot ok orwakowa e limbewa mokwongo, kik chunywa tho kode piyo.

Kaka Wanyalo Timo Mano:

Kapok iikori dhi lendo ot ka ot, kaw thuolo matin mondo ipar weche ma joma ni e alworau nyalo tiyogo mondo gigeng’i kik ilendnegi, kendo inon kaka inyalo dwokogi.
Sama wuon ot temo geng’i mondo kik ilendne, tem manyo yor dhi nyime gi mbaka e yo mamuol. Inyalo pwoye. Kuom ranyisi, ka onyisi ni en gi dinne, inyalo nyise ni, “Amor yudo ng’at mohero weche Nyasaye ka in kama.” Bende, kinyiso wuon ot ni idewo kaka owinjo kata dich ma en-go, mano nyalo konyi dhi nyime gi mbaka. Kuom ranyisi, ka onyisi ni odich, inyalo wacho ni: “Dich to tinde ng’eny adier. Kata kamano, kapok awuok, daher miyi mae isom.” To kapo ni onyisi ni ok odwar winjo, inyalo tiyo gi penjo kaka, “Dibed ni Muma ema ok ihero, koso weche din ema ok idwar?”
Ng’ad paro e yo mowinjore. Par ni Jehova ok chun ji mondo owinje. (Rapar 30:19) Ng’ato ka ng’ato nyaka ting’ ting’ne owuon e nyim Jehova. (Gal. 6:5) Ka wuon ot otamore winji chuth-chuth, weri aweya kode. Ka wanyiso ni wachiwo luor ne paro ma en-go, wachalo joma payo yo ne jolendo mamoko ma nyalo lime chieng’ machielo.—1 Pet. 3:15.

Tem Timo Mae e Dweni:

Sama iromo gi ng’at ma otemo geng’i mondo kik ilendne, bang’ tiekori kode, wuo gi jalendo ma un-go kuom yo ma dine okonyou e dwoko ng’atno e yo maber moloyo.