Kaka Wanyalo Medo Lony e Tij Lendo—Lendo Kuonde Ohala

Gimomiyo Mano Dwarore: Kama ber ma wanyalo landoe ne ji wach Pinyruoth en kuonde ma gitiyoe kata ma gitimoe ohala, nikech kuondego e ma giyudoree kuom seche mang’eny. Chiwo neno kuonde ohala nyalo bedo gi nyak nikech jo ohala kinde mathoth bedoga mang’won gi joma odhi kuondego ka giparo ni gin jong’iepo. Mondo jolendo oyud nyak maber kuondego, dwarore ni giti gi rieko kendo girwakre e yo mowinjore. (2 Kor. 6:3) Kuom mano, jarit tij lendo onego onon adimba okang’ milendogo e alwora ma ji timoe ohelni, mondo ong’e ni ng’a gini ma lendoga kuondego to gitimoga kamano nyading’eny ma romo nade.

Kaka Wanyalo Timo Mano:

Ik maber weche machuok mibiro chako wuoyogo gi ji. Kapo ni wakawo thuolo mang’eny sama wawuoyo kodgi, ginyalo tamore wuoyo kodwa e kinde ma biro.
Lend kuondego e seche ma jo ohalago ok odich ahinya, kaka sama giyepo.
Tem ahinya mondo iwuo mokwongo gi jal mochung’ ne ohalano. Wuo e yor osiep. Inyalo wacho kama: “Walimo ji mana machuok kuonde ma gitiyoe nikech ok yot yudogi e utegi.” Wuo machuok, kae to ichiw trakt, gaset, kata buk machielo. Mondo kik gikawwa kaka jouso, ber ka ok wanyisogi chenro mar chiwo ma siro tij lendo, mak mana ka gipenjowa kaka isiroga tijwa.
Kapo ni ng’at mochung’ ne ohalano orwakowa, wanyalo kwaye konyalo yienwa mondo wawuo gi jotich mamoko. Nitie kuonde tich moko ma dibed maber kwapenjo ka wanyalo weyo buge kama joma tiyo kanyo chiemee kata yueyoe.
Ng’ad paro e yo mowinjore, kendo ikri timo lokruok moro amora ma dwarore. Kuom ranyisi, kapo ni jal ma tiyo kanyo wuoyo gi jang’iepo, rit mondi nyaka otiek wuoyo gi jang’iepono.

Tem Timo Mae e Dweni:

E Lamo mar Joot ma luwo, timuru ranyisi machuok kaka unyalo lendo kuonde ohala.