Tiyo gi Weche Matiendgi Yot Winjo

KAR chiwo mana weche kende sama iwuoyo, tim momedore. Tem iket wecheni e yo mamiyo jowinjo ng’eyo tiendgi. Mano nyalo miyo wecheni okony, bed ni iwuoyo gi kanyakla kata gi joma ok gin Joneno.

Nitie gik mang’eny mamiyo tiend gik ma ng’ato wacho owinjre. Moko kuomgi iwuoyoe e Lony mar 26, “Chano Weche Owinjre Malong’o.” Mamoko to yudore e Lony mar 30, “Nyiso ni Idewo Ng’at Machielo.” E lonyni, wabiro wuoyo kuom weche moko momedore.

Weche Mayot, Moket e Yo Mayot. Weche mayot kod sentens machieko chieko konyo ahinya e wuoyo maber. Twak mar Got ma Yesu nogolo en ranyisi maber mar twak ma ji nyalo winjo tiende, bed ni gin joma nade kata ni gidak kanye. Puonjgo nyalo bedonegi manyien. Kata kamano, ginyalo winjo tiend gik ma Yesu nowacho nikech ne gin gik mamulowa waduto: kaka wanyalo nwang’o mor, kaka wanyalo keto winjruok e kindwa gi jomamoko obed maber, kaka wanyalo nyagore gi chandruok, koda kaka wanyalo ng’eyo gimomiyo nochwewa. Kendo notiyo gi weche mayot ma ng’ato ang’ata ne nyalo winjo. (Math., sula mag 5-7) En adier ni Muma tiyo gi sentens maboyo koda machieko kendo mochan wechegi e yore mopogore opogore. Gima onego obed ni idwaro chopo en chiwo paro e yo mamiyo tiend wach winjore maler.

Kata ka wach miwuoyoe en ma kore tek, kiwache e yo mayot, tiende biro bedo mayot winjo. Ere kaka inyalo ket wach e yo mayot? Kik imi jowinjo weche mang’eny turi. Chan wecheni e yo masiro puonj madongo. Yier adimba Ndiko mibiro tiyogo. Kar rikni wuok e ndiko moro kidhi e machielo, somgi kendo iler tiendgi. Kik ium paro maber gi weche mang’eny.

Sama itayo puonjruok Muma gi ng’ato, ti gi yore mowachgo. Kik item lero weche matindo tindo duto. Kony japuonjre ong’e puonj madongo maber. Bang’e, obiro puonjore weche momedore sama otimo puonjruok mare owuon koda sama en e chokruoge mag kanyakla.

Mondo iket weche e yo mayot, ikruok maber dwarore. Nyaka iwinj maler tiend wach miwuoyoe iwuon mondo eka ikete maler ne jomoko. Ka iwinjo tiend gimoro maber, inyalo nyiso gimomiyo en kamano. Bende inyalo lerogo kitiyo gi wecheni iwuon.

Ler Tiend Weche ma Ji Kiya. Seche moko mondo iket tiend gik moko owinjre maler ne jomoko, dwarore ni iler tiend weche ma jowinjo kiya. Kik ipar ni jowinjo ong’eyo gik mang’eny ahinya, to bende kik ikawgi kaka joma riekogi tin. Nikech isepuonjori Muma, inyalo yudo ni itiyo gi weche ma jomoko ok ong’eyo tiendgi. Ka ok ilero tiendgi, joma ok gin Joneno mag Jehova ok bi ng’eyo ni wacho ni “jo modong’,” “jatichno mogen, kendo mariek,” ‘rombe mamoko,’ koda “oganda mang’ongo” nyiso grube moko sie mag ji. (Rumi 11:5; Math. 24:45; Joh. 10:16; Fwe. 7:9) E yo ma kamano bende, ka ng’ato ok olony gi riwruok mar Joneno mag Jehova, ok obi winjo tiend wacho ni “jalendo,” “japainia,” “jarit-alwora,” kod “Rapar.”

Nitie weche moko e Muma ma kata joma ok gin Joneno tiyogo mapod nyalo dwarore ni oler tiendgi. Ne ji mang’eny, tiend “Har–Magedon” en tieko piny gi mbom mar nyuklia. Ginyalo kawo ni “Pinyruodh Nyasaye” en gima nie chuny dhano kata ni en gima nie polo to ok sirkal. Wacho ni “chuny” nyalo miyo ji opar gima ji kawo ni wuok sama ng’ato otho kendo dhi nyime bedo mangima. Kaluwore gi gik mosepuonj ji tara gi tara, “roho maler” en ng’ato, kendo ni en achiel kuom Didek. Nikech ji mang’eny oseweyo chik mar Muma kuom timbe maler, nyalo dwaro ni olernegi tiend puonj mar Muma mawacho ni: “Ringuru terruok.”—1 Kor. 6:18, New World Translation.

Wacho mana ni “Paulo nondiko . . .” kata ni “Luka nowacho . . .” nyalo miyo ilal ne joma ok som Muma pile. Nyalo bedo ni osiepegi kata joma gidakgo machiegni iluongo gi nyingego. Biro dwarore ni imed weche manyiso ni ng’atno en jaote ma Jakristo kata jandik-Muma.

Thothne, nyalo dwarore ni iler tiend ndiko mamulo pim mag gik moko koda kit joma nodak ndalo machon sama iwuoyo gi jowinjo me kindegi. Kuom ranyisi, wacho ni yie mar Nowa ne nigi bor maromo bede 300, lach maromo bede 50, kendo tut maromo bede 30, ok bi winjorenegi maler. (Chak. 6:15) To kapo ni inyalo leronegi gigo kitiyo gi pim mong’ere e alworau, jowinjo nyalo neno piyo ni yieno ne romo nade.

Ler Kuonde Madwarore. Mondo iket wach moro owinjre maber ne jowinjo, nyalo dwarore ni itim mang’eny moloyo mana nyiso gima wachno en. Chon e piny Jerusalem e kinde mag Ezra, ne ok som mana Chik kende, to ne ilero tiende bende. Mondo okony ji owinj tiend Chikego, Jo-Lawi ne lerogi kendo ne nyiso kaka ne onego oti kodgi kaluwore gi chal ma ne nitie e kindeno. (Neh. 8:8, 12) E yo ma kamano bende, kaw kinde mar somo kendo nyiso kaka inyalo ti gi ndiko misomo.

Bang’ tho kendo chierne, Yesu nolero ne jopuonjrene ni gima notimoreno nochopo gima Ndiko ne wacho. Bende nojiwo ting’ ma ne gin-go kuom bedo joneno mag gik ma ne ginenogo. (Luka 24:44-48) Ka ikonyo ji neno kaka gima gipuonjore mulo ngimagi giwegi, gibiro winjo tiend puonjno mapiyo.

Kaka Chuny Ng’ato Chiko Kaka Orwako Wach. En adier ni kata ka ilero tiend weche e yo maber, nitie gik mamoko manyalo miyo tiend gik miwacho owinjre kata kik owinjre ne ng’at machielo. Ka chuny ng’ato ok dwar rwako wach, mano biro mone ng’eyo tiend gima iwacho. (Math. 13:13-15) Kuom jogo madwaro mana neno gik moko e yor ringruok, weche mag chuny bedonegi fuwo. (1 Kor. 2:14) Ka ng’ato nyiso chuny ma kamano, nyalo bedo maber ka ing’ado mbakano—kata ka en mana kuom kindeno.

To samoro, chuny ng’ato nyalo tamore rwako wach nikech chal matek mar ngimane. Komiye thuolo mar winjo adiera mag Muma kuom kinde, chuny ng’at ma kamano nyalo rwako wach. Kane Yesu onyiso jootene ni ne idhi chwade ma nege, ne ok giwinjo tiend wechego. Nikech ang’o? Nikech mano ok e gima ne gigeno, kendo ne ok gidwar ni gima kamano otimre! (Luka 18:31-34) Kata kamano, bang’ kinde, joote 11 nowinjo tiend wechego, kendo ne ginyiso mano kuom timo kaluwore gi gima Yesu nosepuonjogi.

Kaka Keto Ranyisi Maber Konyo. Gima konyo ji winjo ok en mana wechewa kende to bende ranyisi mwaketo. Ka giwuoyo kuom odiechienggi mokwongo dhi e Od Romo, ji mang’eny wacho ni giparo hera ma ne nenore ayanga, to ok gima nowachi. E yo ma kamano bende, mor mwanyiso osekonyo weg udi mang’eny mondo oyaw pachgi ne adiera mag Muma. Nikech neno ng’wono mar hera ma oganda Jehova nyiso sama jowadgi oyudo chandruok, jomoko oseng’ado ni din mar Joneno mag Jehova e din mar adier. Omiyo sama ikonyo ji ng’eyo adiera moro mar Muma, par kaka ibiro lere kendo par ranyisi miketo.