Tiyo gi Muma e Chiwo Dwoko

SAMA jomoko penjowa penjo kuom yie marwa, kit ngimawa, kaka waneno gik matimore e kinde mwadakiegi, koda geno marwa kuom kinde mabiro, watemo tiyo gi Muma e chiwo dwoko. Nikech ang’o? En nikech Muma en Wach Nyasaye. Puonj mwaluwo wuok e Muma. Kit ngimawa otenore kuom Muma. Muma ema chiko kaka waneno gik matimore e piny. Geno marwa kuom kinde mabiro ogurore chuth kuom singo mag Nyasaye mayudore e Muma.—2 Tim. 3:16, 17.

Wang’eyo maber ahinya ting’ ma wan-go nikech nyingwa. Wan Joneno mag Jehova. (Isa. 43:12) Omiyo, sama wadwoko penjo, watiyo gi gima Jehova wacho e Wachne, to ok wati gi puonj mag dhano. En adier ni nitie kaka ng’ato ka ng’ato kuomwa neno gik moko, kata kamano, waweyo mondo Wach Nyasaye ema ochikwa nikech wan gi yie motegno ni gima owacho e adiera. Onge kiawa ni Muma chiwonwa thuolo mar timo yiero magwa wawegi e weche mang’eny. Kar chuno jomoko otim kaka wadwaro, gombo marwa en ni wanyisgi puonj manie Ndiko, nikech timo kamano miyo jowinjo bende thuolo mar timo yiero maggi giwegi. Mana kaka jaote Paulo, wadwaro ni wajiw “ji owinj wach” nikech giyie kuom Nyasaye.—Rumi 16:26.

Fweny 3:14 nyiso ni Yesu Kristo en “janeno migeno kendo madier.” Ne odwoko nade penjo ma ji ne poyego, kendo nonyagore nade gi chal ma noromogo? Kinde moko, ne otiyo gi ranyisi ma ne miyo ji opar matut. To kinde moko nopenjo jal mopenjo penjo kaka jalno owuon winjo tiend ndiko moro. To kinde mang’eny ne otiyo gi weche sie mag Ndiko, noketo gima ndiko wacho e yo mayot, kata nowuoyo kuom ndiko e yo maok achiel kachiel. (Math. 4:3-10; 12:1-8; Luka 10:25-28; 17:32) E kinde Jokristo mokwongo, buge modol moting’o Ndiko ne ikano e sunagogi. Onge gima nyiso ni Yesu ne nigi buge modolgo mamage owuon, kata kamano, nong’eyo Ndiko maber kendo notiyo kodgi nyading’eny sama opuonjo jo mamoko. (Luka 24:27, 44-47) Nonyalo wacho ka en gadier ni gik ma ne opuonjo ok ne gin meke owuon. Nowacho gik ma nowinjo kuom Wuon mare.—Joh. 8:26.

Gombowa en ni waluw ranyisi mar Yesu. Onge ng’ato kuomwa ma Nyasaye osewuoyogo achiel kachiel kaka nowuoyo gi Yesu. Kata kamano, Muma en Wach Nyasaye. Ka watiyo kode e chiwo dwoko, ok wami ji ket pachgi kuomwa. Wanyiso ni kar puonjo pach dhano morem, wang’ado chuth e chunywa mar weyo Nyasaye ema onyis gima adiera en.—Joh. 7:18; Rumi 3:4.

Ong’e kiawa ni ok wadwar mana tiyo gi Muma, to wadwaro tiyo kode e yo makonyo jawinjo moloyo. Wadwaro ni jawinjowa obed gi paro moyawore sama owinjowa. Kaluwore gi paro ma en-go, inyalo chako wuoyo kode kuom gima Muma wacho, kama: “Donge en adier ni gima Nyasaye wacho ema onego watigo?” Kata inyalo wacho niya: “Be ing’eyo ni Muma wuoyo kuom gima ipenjono?” Kapo ni iwuoyo gi ng’at maok mi Muma luor, nyalo dwarore ni iti gi yo mopogore matin e chako mbaka. Inyalo wacho kama: “We anyisi ane wach moro kae ma ne okor chon.” Kata inyalo wacho niya: “Buk mosepog moloyo buge mamoko duto e histori mar dhano, wacho niya . . . ”

Seche moko, inyalo mana keto mayot gima ndiko wacho. Kata kamano, kanyalore, gimaber moloyo en elo Muma wuon mondo isome kaka ondike. Nyis ng’atno ndikono ei Muma mare owuon, ka timo kamano nyalore. Tiyo gi Muma wuon kamano thothne jamulo chuny ji ahinya.—Hib. 4:12.

Jodong-kanyakla nigi ting’ makende mar tiyo gi Muma sama gichiwo dwoko. Achiel kuom kidogo manyiso ni ng’ato oromo bedo jaduong’-kanyakla, en bedo ng’at mapuonjo ka ‘mako matek wachno mar adier.’ (Tito 1:9) Puonj ma jaduong’-kanyakla chiwo nyalo miyo Jakristo ong’ad mar kawo okang’ e wi wach moro mapek e ngimane. Mano kaka dwarore ni puonjgo obed mogurore chuth e Ndiko! Ranyisi ma jaduong’-kanyakla keto kuom wachni nyalo miyo jomoko bende otim kamano sama gipuonjo.