Nonro mag Chenro mar Chokruok mar Ngimawa kod Tijwa
MEI 6-12
MWANDU MA YUDORE E WACH NYASAYE | 2 JO-KORINTHO 4-6
“Ok Waol”
w04-SW 8/15 25 ¶16-17
Ok Waol Kata ka Wajony
16 Rito winjruokwa gi Jehova e gima duong’ie moloyo gimoro amora. Kata bed ni wan gi winjruok maber gi Jehova Nyasaye, pod wanyalo ol e ringrewa, kata kamano, ok wabi ol tiyo ne Jehova. Jehova ‘miyo jo mool teko; kendo jalo ma onge gi teko omiye teko momedore.’ (Isaiah 40:28, 29) Jaote Paulo ma noseneno ka Jehova timone kamano e ngimane nondiko niya: “Ok waol, kendo kata obedo ni e kit dhano ma wan gi oko dhi ka rumo, kuom adier e dhano ma wan gi ka iye to imiyo doko manyien pile ka pile.”—2 Jo-Korintho 4:16.
17 Ndikono otiyo gi wach moro ni “pile ka pile.” Mano nyiso ni nyaka wati gi gik ma Jehova miyowa pile ka pile ma konyowa duogo teko. Nyaminwa moro ma nobedo misonari kuom higni 43 ne bedoga mool kinde moko kendo chunye bende ne nyosorega. Kata kamano, ne ok ool gi lamo Jehova. Owacho kama: “Asetemo matek ma ang’iyo gi tim mar chiewo kogwen mondo alem kendo asom Muma ka pok adonjo e tijena mamoko. Mano e mosekonya nano nyaka sani.” Wanyalo bedo gadier ni Jehova biro miyowa teko “pile ka pile” sama wawuoyo kode e lamo kaachiel gi paro matut kuom kido mabeyo ma en-go kod gik mosingonwa.
it-1-E 724-725
Sinani
Dwarore ni wadhi nyime mako motegno geno ma wan-go mar yudo ngima mochwere e piny ma onge richo. Mano en geno madier ma kata joma sandowa negwa, ok ginyal ketho genono. (Rum 5:4, 5; 1Th 1:3; Fwe 2:10) Ngima mar chandruok ma wadakie sani ok nyal pim kata matin gi ngima ma jaber ma wabiro dakie e kinde ma biro. (Rum 8:18-25) Gie kindeni, ka pod warito ngima mochwere, chandruok moro amora ma wanyalo romogo kata gibed malich manade, gin mana gik “ma kadho piyo kendo gitindo.” (2Ko 4:16-18) Ka Jakristo ong’eyo ni tembe moromogo gin mana mag kinde machuok kendo omako motegno geno ma en-go, mano biro miyo kik chunye nyosre mowe tiyo ne Jehova Nyasaye.
Nono Puonj Manie Wach Nyasaye
w12-SW 2/1 28-29
‘Tim Gik ma Moro Jehova’
David Splane ma ni e Bura Matayo nogolo twak ma wiye wacho ni “Wan gi Mwandu Makendeni e Gik Mochue gi Lowo.” (2 Jo-Korintho 4:7) Mwanduno en mane? Dobed ni en gik ma ng’ato oseng’eyo koso rieko ma en-go? Jagol-twak nodwoko niya: “Ooyo. Mwanduno en tich mar ‘miyo adiera onenre ayanga.’” (2 Jo-Korintho 4:1, 2, 5) Owadwa Splane noparo ne joma nobiro e Skund Gilead ni dweche abich ma ne gikawo ka gipuonjore ne ikogi ne migawo makende e tij lendo. Mano en migawo ma ng’ato onego okawo mapek ahinya.
Jagol-twak nolero ni “gik mochue gi lowo” gin ringrewa. Nopimo gima ochue gi lowo gi ma ochue gi dhahabu. Gik mochue gi dhahabu ok tigago ahinya. To gik mochue gi lowo itiyogago ahinya. Ka po ni waketo mwandu moro makende e gima olos gi dhahabu, wanyalo chako keto pachwa ahinya e gima ochue gi dhahabuno moloyo mwandu ma ni e iye. Owadwa Splane nowacho kama: “Un joma obiro e skundni, ageno ni ok udwar keto pachu kuomu uwegi. Nikech ubiro bedo jomisonari, gombou maduong’ onego obed konyo ji mondo gibi ir Jehova. Mano e momiyo un gik mochue gi lowo.”
Meduru Dongo e Hera mar Owete
7 To nade wan? Ere kaka wanyalo ‘yawo chunywa’ e nyiso hera mar owete? Jogo ma gin mbese, kata mawuok e oganda mawacho dhok achiel nyalo yudo ka yotnegi nyisore hera mar owete. Jogo mohero yore machalre mag manyo mor koda yueyo, bende jobedo gi kinde mang’eny kanyachiel. Kata kamano, kapo ni nitie gik ma riwowa gi Jokristo moko, to koni to gigo pogowa gi jomamoko, dwarore ni ‘wayaw chunywa.’ Daber ka wapenjore wawegi kama: ‘Be ahinyo dhi e tij lendo, kata tudruok e weche mag mor koda yueyo, gi owete koda nyimine ma achiegni godo kende? Ka an e Od Romo, be adigni mako osiep gi jogo mapod nyien nikech aparo ni osiep iloso mana bang’ kinde? Be amoso joma dongo gi joma tindo duto ei kanyakla?’
MEI 13-19
MWANDU MA YUDORE E WACH NYASAYE | 2 JO-KORINTHO 7-10
“Chenro mar Konyo Joma Oyudo Masira”
w98-SW 11/1 25 ¶1
“Nyasaye Ohero Ng’at ma Chiwo gi Ilo”
Mokwongo, Paulo nonyiso Jokristo ma Korintho kaka Jo-Makedonia noketo ranyisi maber mar chiwo kony ne jochan. Paulo nondikonegi kama: “E diere mag tem maduong’ e bwo chandruok, morgi mogundho kod chan margi maduong’ nomiyo ginyiso ni gimewo kuom nyiso chuny mar chiwo ahinya.” Jo-Makedonia ne ok gin joma ichuno mondo ogol chiwo. Kar mano, Paulo nowacho kama: “Gin giwegi e ma ne gikawo okang’ mokwongo mar siko ka gihombowa gi kinda, mondo omigie thuolo makende mar golo chiwo gi chuny mohero.” Yo ma Jo-Makedonia nogologo chiwo gi chuny man thuolo en gima morowa ahinya nikech ne gitimo kamano kata obedo ni gin bende ne gin jochan ahinya.—2 Jo-Korintho 8:2-4.
Konyo Joma Oyudo Masira
WADOG ane chien nyaka e higa mar 46 e kinde Jokristo mokwongo ka ne kech malich ni Judea. Chiemo ne obedo matin ahinya, kendo Jo-Yahudi ma ne gin jolup Kristo ne ok nyal nyiewo chiemo nikech bech chiemo ne tek. Kech ne kayogi ahinya. Kata kamano, Jehova noyawonegi yor konyruok moro makende. En ang’o ma ne otimore?
Konyo Joma Oyudo Masira
4 E barua mar ariyo ma jaote Paulo ne ondiko ne Jokristo ma ne ni Korintho, ne olero yore moko ariyo ma Jokristo tiyogo ne Nyasaye. Kata obedo ni nowuoyo gi Jokristo mowal, wachno pod konyo “rombe mamoko” mag Kristo e kindewagi. (Joh. 10:16) Tich mokwongo ma Jokristo timo en ‘tich mar konyo ji loso winjruokgi gi Nyasaye,’ ma en tij lendo kod puonjo ji Muma. (2 Kor. 5:18-20; 1 Tim. 2:3-6) Tich mar ariyo ma gitimo en konyo Jokristo wetegi. Paulo noluongo tijno ni ‘tich mikonyogo joma ler.’ (2 Kor. 8:4) Ka ipimo 2 Jo-Korintho 5:18 kod 8:4, ibiro fwenyo ni e wes ariyogo, oti gi wach mar “tich.” Wach molok ni “tich,” en di·a·ko·niʹa e dho Grik. Ndiko mag Dho-Grik odhi gi di·a·ko·niʹa wes ariyogo duto. Dibed ni ang’o momiyo oti gi wach achiel e wes ariyogo duto?
5 Kuom tiyo gi wach achiel e dho Grik e lero moro ka moro kuom tije ariyogo, Paulo nonyiso ni tich mar konyo joma oyudo masira en achiel kuom tije ma dwarore e kanyakla mar Jokristo. Par ni ka pok nowuoyo e wi wechego, nowacho niya: “Nitie migepe mopogore opogore mag konyo ji, to e ma Ruodhwa pod en achiel, . . . to Nyasaye achiel e ma pod timogi giduto ei ng’ato ka ng’ato.” (1 Kor. 12:4-6, 11) Mano e momiyo Paulo lero ni gik ma watimo mondo wasirgo kanyakla en tiyo ne Nyasaye. (Rumi 12:1, 6-8) Kare e gin Paulo notemo matek mondo ‘oti ne joma ler ka okonyogi’!—Rumi 15:25, 26.
5 Paulo nokonyo Jokristo ma Korintho mondo ging’e ni tiyo ne Nyasaye kendo lame oriwo konyo joma oyudo masira. Ne ane paro ma ne en-go: Jokristo ma konyo jowetegi moyudo masira timo kamano nikech ‘gitimo ka luwore gi wach maber ma giyalo e wi Kristo.’ (2 Kor. 9:13) Omiyo, Jokristo konyo jowetegi nikech giketo chunygi kuom luwo puonj mag Kristo. Paulo ne owacho ni gik mabeyo ma Jokristo timo ne jowetegi nyiso ni ‘ng’wono mogundho mar Nyasaye opong’ kuomgi.’ (2 Kor. 9:14; 1 Pet. 4:10) Gaset mar The Watchtower ma Desemba 1, 1975 nowuoyo e wi tich ma Jokristo timo ne jowetegi sama masira oneno. Gasedno nowacho niya: “Onego wabed gadier ni Jehova Nyasaye kaachiel gi Yesu Kristo ogeno ahinya kony ma wakonyogo jowetewa moyudo masira.” Kuom adier, konyo joma oyudo masira en achiel kuom yore mag tiyo ne Nyasaye.—Rumi 12:1, 7; 2 Kor. 8:7; Hib. 13:16.
Kaka Wayudo Pesa ma Wasirogo Tije mag Pinyruoth
10 Mokwongo, wagolo chiwo nikech wahero Jehova kendo dwaher ‘timo gik mabeyo e wang’e.’ (1 Joh. 3:22) Jehova mor gi joma chiwone kowuok e chunygi. Wanon ane gima jaote Paulo nowacho e wi chiwo ma Jokristo golo. (Som 2 Jo-Korintho 9:7.) Jakristo madier ok gol chiwo nikech ochune kata odhire ni mondo otim kamano. Kar mano, ogolo chiwo nikech “oseng’ado ei chunye” mar timo kamano. Tiende ni, bang’ kosefwenyo ni rem nitie kamoro, ogolo chiwo ka luwore gi nyalone. Nyasaye ohero ng’at ma kamano nikech en “ng’at ma chiwo gi ilo.” Muma moro oketo ndikono kama: “Nyasaye ohero joma ohero chiwo.”
Nono Puonj Manie Wach Nyasaye
Nyis ni Imor gi ‘Mich ma Nyasaye Chiwo Nono Mokalo Awacha’
2 Paulo nong’eyo ni singo mabeyo duto mag Nyasaye ne dhi chopo mana kokalo kuom misango makare ma Kristo nochiwo. (Som 2 Jo-Korintho 1:20.) Omiyo, ‘mich ma Nyasaye chiwo nono mokalo awacha’ oriwo gik mabeyo duto kod hera mosiko ma ne odhi nyisowa kokalo kuom Yesu. Kiwacho adier, en mich maber miwuoro ma dhano ok nyal lero tiende e yo makare chuth kata gitem ma chalo nade. Mich ma nomiwano onego omi watim ang’o? To michno onego ochwalwa waikre nade ne Rapar mar tho Kristo ma ibiro tim chieng’ Tich Adek tarik 23 dwe mar Mach e higa mar 2016?
g99-SW 7/8 20-21
Be Rach ka Ng’ato Opakore?
E Ndiko mag Mathayo nyaka Fweny, wach motigo ni kau·khaʹo·mai, ka oloki to en “pakore, sungore, kata ng’awore.” Wachno itiyogago e yo maber kata marach. Kuom ranyisi, Paulo nowacho niya: “Ng’at ma pakore, opakre kuom Jehova.” (2 Jo-Korintho 10:17) Mano tiende ni ka wapakore ni Jehova e Nyasachwa, mano biro miyo waland nyinge kod gik mabeyo mosetimo.
MEI 20-26
MWANDU MA YUDORE E WACH NYASAYE | 2 JO-KORINTHO 11-13
“‘Kudho Moro ma ne Chwowo Ringre’ Paulo”
w08-SW 6/15 3-4
Inyalo Bedo gi Teko Kata Obedo ni In gi Nyawo
Jaote Paulo nokwayo Jehova mondo ogolne ‘kudho moro ma ne chwowo ringrene,’ ma nyalo bedo ni ne en chandruok moro ma ne en-go. Nokwayo Nyasaye nyadidek mondo ogolne temno. Kata bed ni temno ne en ang’o, temno ne nyalo miyo kik obed ma mor sama otiyo ne Jehova. Paulo nowacho ni temno ne siko ka sande. Jehova nodwoke kama: “Ng’wonona mogundho oromi, nimar tekona nyisore e yo malong’o chuth e nyawo.” Jehova ne ok ogolone Paulo kudho ma ne chwowo ringrene. Paulo ne nyaka nyagre anyaga gi temno. Kata kamano, nowacho niya: “Sama anyap, eka abedo gi teko.” (2 Kor. 12:7-10) Ang’o ma notemo wacho?
w06-SW 12/15 24 ¶17-18
Jehova Chiwo ‘Roho Maler ne Joma Kwaye’
17 Ka ne Nyasaye dwoko lamo mar Paulo, nonyise niya: “Ng’wonona mogundho oromi, nimar tekona nyisore e yo malong’o chuth e nyawo.” Paulo nowacho kama: “Anabed mamor ahinya ka apakora kuom nyawo ma an-go, mondo teko mar Kristo osik kuoma kaka hema mouma.” (2 Jo-Korintho 12:9; Zaburi 147:5) Omiyo, Paulo noneno maler ni rit ma Nyasaye noritego kokalo kuom Kristo ne chalo kaka hema ma noume. E kindegi, Jehova dwoko lamowa e yo machalo kamano. Orito jotichne maber mana ka gima oumogi gi hema.
18 En adier ni hema ok nyal mono koth chue kata geng’o yamo mondo kik kudh, kata kamano, hema nyalo geng’owa mondo koth kik gowa kendo yamo kik yukwa. E yo ma kamano, rit ma wayudo kokalo kuom “teko mar Kristo” ok mon tembe kod masiche yudowa. Kata kamano, tekono geng’owa mondo Satan kod pinye marachni kik mi waketh winjruok ma wan-go gi Nyasaye. (Fweny 7:9, 15, 16) Kuom mano, kata ka ikalo e tem moro ma odagi weyi, bed gadier ni Jehova ong’eyo kaka inyagori kendo owinjo ‘dwondi kiywak.’ (Isaiah 30:19; 2 Jo-Korintho 1:3, 4) Paulo nondiko niya: “Nyasaye en ng’at migeno, kendo ok obi weyo mondo temu mokalo ma unyalo nanoe, to kaachiel gi temno obiro losonu yo mar wuok mondo ubed gi nyalo mar nano.”—1 Jo-Korintho 10:13; Jo-Filipi 4:6, 7.
‘Omiyo Joma Ool Teko’
8 Som Isaiah 40:30. Kata bed ni wan gi lony e okang’ ma romo nade, pod nitie gik ma ok wanyal timo gi tekowa wawegi. Mano en gima waduto nyaka wang’e. Kata obedo ni jaote Paulo ne nigi lony, pod nitie gik mang’eny ma ne ok onyal timo kaka nodwaro. Ka ne onyiso Nyasaye gik ma chande, Nyasaye nonyise niya: “Tekona nyisore e yo malong’o chuth e nyawo.” Wachno ne odonjo ne Paulo maler. Nowacho niya: “Sama anyap, eka abedo gi teko.” (2 Kor. 12:7-10) Ang’o ma Paulo ne temo wacho?
9 Paulo nong’eyo ni ne ok onyal timo mathoth ka Nyasaye ok omiye teko. Roho maler mar Nyasaye ne dhi konyo Paulo ka miye teko mar timo gik ma ne ok onyal timo gi tekone owuon. Wan bende Nyasaye konyowa e yo ma kamano. Ka Jehova omiyowa teko, onge kiawa ni wabiro bedo motegno gadier!
Nono Puonj Manie Wach Nyasaye
Penjo Moa Kuom Josombwa
“Polo mar adek” miwuoye e 2 Jo-Korintho 12:2 nenore ni ochung’ ne “polo manyien” ma en Pinyruodh Mesia ma oseket e lwet Yesu Kristo kod joloch mamoko 144,000—2 Pet. 3:13.
Iluonge ni “polo mar adek” nikech Pinyruodhno en loch ma ni e rang’iny ma malo ahinya.
“Paradiso” ma noterie Paulo e fwenyno nenore ni ochung’ ne (1) Paradiso ma biro betie e piny ka, (2) kue makende ma jotich Nyasaye biro bedogo e piny manyien, kendo kueno biro bedo mang’eny moloyo ma jotich Nyasaye nigo sani, kod (3) “paradiso mar Nyasaye” ma ni e polo ma biro betie sama paradiso ma ni e piny bende nitie.
it-2-E 177
Nyoth
“Nyoth Maler.” Jokristo mokwongo ne niga gi “nyoth maler” (Rum 16:16; 1Ko 16:20; 2Ko 13:12; 1Th 5:26) kata “nyoth mar hera” (1Pe 5:14, NW mar Kisungu), to nenore ni ne en mos ma chwo ne mosogo mana chwo wetegi kende, to mon bende ne mosogo mon wetegi. Kit mosruok ma Jokristogo ne mosoregono chal gi tim ma Jo-Yahudi ne nigo mar nyodho jowetegi sama gimosore. Kata obedo ni Ndiko ok lernwa “nyoth maler” kata “nyoth mar hera” e yo matut, nenore ni nyothno ne nyiso kaka Jokristogo noherore kendo ne gin gi winjruok maber e kanyakla.—Joh 13:34, 35.
MEI 27–JUN 2
MWANDU MA YUDORE E WACH NYASAYE | JO-GALATIA 1-3
“Ne Akwere e Wang’e”
Be Ineno Gik Moko Kaka Jehova Nenogi?
16 Som Jo-Galatia 2:11-14. Petro ne odonjo e obadho mar luoro dhano. (Nge. 29:25) Kata obedo ni Petro nong’eyo maler ni Jehova ne oseyie gi joma ok Jo-Yahudi, luoro nomake nikech ne ok ong’eyo gima owete ma Jo-Yahudi ma ne oa Jerusalem ne dhi nyise. Nikech jaote Paulo bende ne nitie e bura ma notim Jerusalem e higa mar 49, mano e momiyo ka ne odhi Antiokia, nokwero Petro e wang’e konyise ni owe tim wuondruok. (Tich 15:12; Gal. 2:13) Jokristo ma ne ok gin Jo-Yahudi nowinjo nade nikech tim Petro mar wuondruokno? Be ne gidhi weyo mondo tim Petrono ochwanygi? To nade Petro, be ne idhi maye migepe nikech tim marachno?
Kuom Jogo Mohero Jehova, ‘Onge Gima Dimi Gichwanyre’
12 Petro nonyiso ni en gi nyawo mar luoro dhano, kendo seche moko ne otimo kamano e yo maok ber; mak mana ni pod nomakore kod Yesu gi Jehova. Kuom ranyisi, nokwedo Ruodhe, ok mana dichiel kende, to nyadidek. (Luka 22:54-62) Kinde moro bende, Petro nonyiso kido ma Jakristo ok onego obedgo kane obwono Jokristo wetene maok Jo-Yahudi. Ne oneno Jokristogo ka gima ok gilong’o kopimgi gi Jokristo ma Jo-Yahudi moter nyangu. Jaote Paulo to ne neno wachno e yo mopogore—kanyakla ne ok en kama ikeloe kwedruok. Chuny ma Petro nonyiso ne rach. Kane pok tim Petro ochwanyo owetego, Paulo nokawo okang’ mapiyo mar kwero Petro kanyo gi kanyo. (Gal. 2:11-14) Be wachno nochwanyo Petro ahinya ma oweyo dhi nyime gi ng’wech matere e ngima mochwere? Ooyo. Noparo matut kuom siem ma Paulo nomiye, kendo norwako siemno, ma odhi nyime gi ng’wej ngima.
Nono Puonj Manie Wach Nyasaye
Kik Iwe Tiyo ne Nyasaye Kata Bed ni ‘Sand Ng’eny’
20 To nade yore mopondo ma Satan jatiyogo? Kuom ranyisi, ere kaka wanyalo nyagore gi chuny monyosore? Achiel kuom yore madongo ma wanyalo timogo kamano en paro matut e wi rawar. Mano e gima jaote Paulo notimo. Seche moko chunye ne janyosre ahinya. To nong’eyo ni Kristo ne otho ne dhano morem to ok ne joma onge richo. Kendo Paulo owuon ne en achiel kuom jorichogo. Mano e gimomiyo nondiko niya: ‘Angima kuom yie man kuom Wuod Nyasaye ma nohera, kendo nochiworena.’ (Gal. 2:20) Ee, Paulo noyie gi mich mar rawar. Noneno ni en e ma nochiwne rawar.
21 Neno rawar kaka mich ma Jehova omiyi in iwuon nyalo konyi malich. Mano koro ok nyis ni chunyi ok biga nyosore. Moko kuomwa samoro nyalo nyagore gi pekno nyaka piny manyien ochopi. To par wachni: Joma biro yudo mich gin mana jogo monano nyaka giko. Kaka piny medo ru, e kaka wamedo sudo machiegni gi odiechieng’ ma Pinyruodh Nyasaye biro keloe kuwe kendo miyo dhano duto obed joma kare chuth. Nyagri mondo ibi idonj e Pinyruodhno kata kochuno ni nyaka ikadh e sand mang’eny.
it-1-E 880
Barup Jo-Galatia
Sama Paulo ne wacho ni, “Yaye un Jo-Galatia ma pachu ok ni kare,” ne ok owuo gi ji duto ma ne wuok e gwenge mag Galatia. (Gal 3:1) Kar mano, Paulo ne kwero jomoko e kanyakla ma ne nigi tim moro mar Jo-Yahudi. Ne gikawore kaka joma kare kuom makore gi Chike Musa kar bedo gi yie kuom Kristo ma e gima miyo ikwano ng’ato kaka ng’ama kare ka luwore gi singruok manyien. (2:15–3:14; 4:9, 10) “Kanyakla mag Galatia” (1:2) ma Paulo nondikone baruani ne nigi ji mokikore okikore; moko ne gin Jo-Yahudi to moko ne ok Jo-Yahudi. E i joma ne ok Jo-Yahudigo, moko ne oter nyange mi girwako kit oganda Jo-Yahudi, to moko ne ok oter nyange. Moko bende ne gin joma noa yo Ulaya ma Imbo. (Tic 13:14, 43; 16:1; Gal 5:2) Koriwgi duto, niluongogi ni Jokristo ma Galatia nikech ne gidak e gwenge mag Galatia. Yo mondikgo baruano kod weche motigo e iye nyiso ni Paulo ne ondike ne joma nong’eyo maber ma ne ni yo milambo mar Galatia, to ok ne joma ne ni yo nyandwat ma nenore ni ne ok olimo kata dichiel.