Umo Wich Dwarore Kinde Mage, Kendo Nikech Ang’o?

Kaluwore gi wach lemo mare, dhako ma Jakristo onego oum wiye kinde mage kendo nikech ang’o? Wane ane gima jaote Paulo nowacho kuom wachni kokudhne gi much Nyasaye. Ochiwo weche ma konyowa timo yiero e yo mowinjore, mabiro miyo Nyasaye duong’. (1 Jo Korintho 11:3-16) Paulo chiwo weche adek monego opar: (1) gik mitimo mamiyo dwarore ni ng’ama dhako mondo oum wiye, (2) seche ma onego otimie kamano, kod (3) gima omiyo onego okonyre gi chikni.

Gik mitimo. Paulo wacho gik moko ariyo: lamo kod hulo wach. (Kwan matindo 4, 5) Kuom adier, lamo en wuoyo gi Jehova e yor luor. E ndalogi, hulo wach nyalo chung’ ne tij puonjo moro amora motenore gi Muma ma Jakristo timo. Kata kamano, be Paulo temo wacho ni kinde duto ng’ama dhako ka lemo kata ka opuonjo adier manie Muma to nyaka oum wiye? Ooyo. Gima ng’ama dhako timo sama olemo kata puonjo ema nyiso ka onego oum wiye kata ok onego oum.

Seche monego oum wiye. Weche ma Paulo nowacho nyiso kinde ariyo; ka en gi joode kata ka en e kanyakla. Owacho kama: “Wi dhako en dichwo . . . Dhako ka dhako kolamo, kata kohulo wach, ma ok oumo wiye, ochayo wiye.” (Kwan matindo 3, 5) Kaluwore gi chenro mar joot, chwor dhako ema Jehova oketo mondo obed wiye. Ka ok oyie gi teko ma omi chwore, obiro miyo chwore wichkuot ka otimo migawo ma Jehova omiyo chwore. Kuom ranyisi, ka dwarore ni mondo ota puonjruok mar Muma ka chwore nitie, obiro nyiso ni oyie gi teko ma omi chwore kuom umo wiye. Obiro timo kamano kata bed ni chwore osebatisi kata podi nikech en e wi ot.a Kapo ni dwarore mondo olem kata puonjo ka nyathine ma wuowi ma pod tin to osebatisi nitie, bende obiro umo wiye, ok nikech en e wi ot, to nikech nyise luor kaka ng’ama dichwo ma osebatisi e kanyakla mar Jokristo.

Paulo wuoyo kuom weche mag kanyakla, kowacho kama: “Ka ng’ato dwaro bedo jambaka, wan waonge tim machielo, kata kanise mag Nyasaye ongego.” (Kwan matindo 16) E kanyakla mar Jokristo, migawo mar bedo wich omi joma chwo ma osebatisi. (1 Timotheo 2:11-14; Jo Hibrania 13:17) Mana joma chwo kende ema iketo kaka jodong-kanyakla kod jokony-tich kimiyogi migawo gi Nyasaye mondo girit kweth mag Nyasaye. (Tich Joote 20:28) Kata kamano, nitie kinde moko, ma inyalo kwa nyaminwa moro mondo okaw ting’ ma pile itimo gi owadwa mowinjore ma osebatisi. Kuom ranyisi, nyalo dwarore ni ota romo mar chano dhi lendo nikech owadwa mowinjore ma osebatisi onge kata ok obiro. Kata onyalo tayo puonjruok mar Muma ma ne osechan motelo mondo otim ka dichwo mosebatisi nitie kanyo. Nikech mano en mana achiel kuom chenro ma kanyakla ema timo, obiro umo wiye mondo onyis ni ong’eyo ni otimo migawo ma pile imiyo ng’ama dichwo.

Mopogore gi mano, nitie gik mathoth kuom wach lemo ma ok ochuno ni nyaminwa nyaka um wiye. Kuom ranyisi, ok ochuno ni nyaka oum wiye ka ochiwo paro e chokruok mag Jokristo, ka gin gi chwore kata ng’at machielo ma dichwo e tij lendo mar ot ka ot, kata ka opuonjore kata lemo gi nyithinde ma pok obatisi. En adier ni, penjo moko nyalo bedoe, kendo ka nyaminwano ok ni gi adier kuom wach moro, onyalo medo timo nonro.b Ka pod ok en gadier kendo ka chunye dwaro mondo otim kamano, onge rachne ka oumo wiye.

Gima omiyo oumo wiye. E kwan matindo 10, wanwang’o weche ariyo mamiyo nyaminwa ma Jakristo dwarore ni oum wiye: “Dhako onego oum wiye, ma en ranyisi ni en e bwo loch, nikech malaika.” Mokwongo, ne wechegi: “Ranyis ni en e bwo loch.” Umo wich en yo ma dhako onego onyisgo ni oyie gi teko ma Jehova omiyo joma chwo ma osebatisi manie kanyakla. Kuom timo kamano, onyiso ni ohero kendo oriwo Jehova Nyasaye lwedo. Wach mar ariyo yudore e wechegi: “Nikech malaika.” Ere kaka dhako koumo wiye to mulo chwech mag rohogo ma nigi teko ahinya?

Malaike dwaro neno ka teko ma Nyasaye ochiwo imiyo duong’ e riwruok mar oganda Jehova, e polo koda piny. Gin bende giyudo kony kuom ranyisi ma dhano ma pod orem chiwo e wachni. Kuom adier, gin bende onego gibolore ne chenro ma Jehova oketo, ma en wach mane otamo malaike moko e kinde machon. (Juda 6) Malaike nyalo neno ranyisi kuom nyaminwa ma Jakristo molony ahinya, ma nigi ng’eyo kod rieko moloyo ng’at ma dichwo ma osebatisi e kanyakla; kata kamano, oikore mar bolore ne teko momi ng’ama dichwono. Nyiminewa moko gin Jokristo mowal kuom roho ma bang’e biro bedo moko kuom joma biro bedo gi Kristo e polo. Nyaminwa ma kamano bang’e biro nwang’o migawo maduong’ moloyo kata ma malaike nigo, kendo locho gi Kristo e polo. Donge mano en ranyisi maber ahinya mondo malaike one e kindegi? Kuom adier, mano en thuolo makende ahinya ma nyimine duto nigo mar nyiso chuny mar winjo wach gi muolo kuom kido mar riwo Nyasaye lwedo, kendo bolorene e nyim tara mag malaike makare!