Sandug Penjo

◼ Be jalendo ma nyako kata ma dhako onego otwe otamba kata umo wiye sama otayo puonjruok mar Muma gi ng’ato e dhoot ka en gi jalendo ma dichwo?

Ka jalendo ma nyako kata ma dhako tayo puonjruok mar Muma ma osebedo ka dhi nyime, to jalendo ma dichwo nitie, onego oum wiye. (1 Kor. 11:3-10) Gaset mar Mnara wa Mlinzi ma Julai 15, 2002, ite mar 27, nolero kama: “Mano en puonjruok mochan motelo, kendo jalendo ma puonjo e sechego e ng’ama tayo. Omiyo, puonjruok ma kamano en chenro mar kanyakla. Ka jalendo ma nyako kata ma dhako mosebatisi tayo puonjruok ma kamano ka en gi jalendo ma dichwo mosebatisi, onego oum wiye.” Obiro timo mano bed ni otayo puonjruogno e ot, e dhoot, kata kamoro amora.

Kata kamano, ka nyaminwa moro dhi limo ng’at ma pok gichakogo puonjruok moriere, to en gi jalendo ma dichwo, ok ochuno ni oum wiye kapo ni giwuoyoga gi ng’atno e dhoot, kata kapo ni gichano mar nyise kaka itimo puonjruok mar Muma, kata ka gidhi mana nono e yo machuok bugwa moro ma wajotayogo puonjruok Muma gi ji. Nikech kawoga kinde mondo puonjruok mag Muma mitimo e dhoot obed motegno, jalendono ema onego ong’e kinde mowinjore ochak umoe wiye kaluwore gi chal mantie.