Bug Muma Namba 47​—2 Jo Korintho

Jandiko: Paulo

Ne Ondike: Makedonia

Ne Otiek Ndike: Chiegni 55 E.N.

KORO ne nyalo bedo giko Agost kata Septemba kachakore, e higa mar 55 E Ndalowa. Pod ne nitie weche moko e kanyakla mar Jokristo e Korintho ma ne chando pach jaote Paulo. Dweche manok kende ema ne osekalo nyaka Paulo ndik baruane mokwongo ne Jo-Korintho. Ne oyudo ka oseor Tito mondo odhi Korintho konyo e wach solro ma ne timore kuro ne joma ler ma ne ni Judea, bende nyalo bedo ni nodhi mondo one kaka Jo-Korintho ne okawo weche ma ne nie barupe mokwongo. (2 Kor. 8:1-6; 2:13) Ne gikawo baruano nade? Mano kaka Paulo ne mor kuom ng’eyo ni baruano ne omiyo Jo-Korintho okuyo kendo oloko chunygi! Tito ne odok Makedonia ir Paulo gi wach maberni, kendo koro chuny jaoteno ne opong’ gi hera ne Jokristo wetene ma Jo-Korintho.​—7:5-7; 6:11.

² Omiyo Paulo ne ondiko kendo ne Jo-Korintho. Barua mar ariyoni mondiki e yo mamor kendo mamako paro ne ondik Makedonia to nenore ni Tito ne otere. (9:2, 4; 8:16-18, 22-24) Achiel kuom weche ma ne omiyo Paulo ondiko baruano ne en nikech bedoe mar joma ne oluongo ni “joote madongogo,” e kind Jo-Korintho, kendo Paulo bende ne luongogi ni “joote ma riasore, jotich ma woundo.” (11:5, 13, 14) Chal mar kanyakla manyienno ne ok ber e wang’ Nyasaye, kendo ji ne kwedo ka Paulo be ne en jaote. Omiyo, baruane mar ariyo ne Jo-Korintho ne okonyo kama duong’.

³ Ne ni Paulo ne owacho kama: “Koro aikora mondo abi iru e limbena mar adek.” (2 Kor. 12:14; 13:1) Ne oyudo ochano dhi limogi mar ariyo kane ondiko baruane mokwongo, to kata obedo ni ne oikore ni “mondo uyudi gweth diriyo” mano ne ok otimore. (1 Kor. 16:5; 2 Kor. 1:15) Kuom adier, kindeno ne oyudo Paulo osebedoe Korintho kuom dweche 18 e kind higa mar 50-52 E Ndalowa, kane ochaki kanyakla mar Jokristo e Korintho. (Tich 18:1-18) Kata kamano, bang’e gombo mar Paulo mar dok Korintho ne otimore kendo. Kane en Grik kuom dweche adek, nyalo bedo ni e higa mar 56 E Ndalowa, notiyo gi kinde moko kuom mago e Korintho, kendo kanyo ema ne ondikoe baruane ne Jo-Rumi.​—Rumi 16:1, 23; 1 Kor. 1:14.

⁴ Jo Korintho mar Ariyo osebedo ka ihinyo keto kanyachiel gi Jo Korintho Mokwongo kod barupe mamoko ma Paulo ne ondiko kaka buge mowinjore bedo e buge maler mag Muma. Kendo, wayudo thuolo machielo mar neno chal mar kanyakla mar Korintho, kendo yudo kony kuom weche mokudhi gi much Nyasaye ma Paulo ne ondiko mondo opuonjgi kaachiel gi wan.

GIMOMIYO BUGNI KONYO

¹⁸ Mano kaka en gima jiwo ahinya neno kaka Paulo ne ohero tij lendo mar Jokristo kaka onyis e Jo Korintho mar Ariyo! Wan bende mondo wakaw tijno kaka nokawe. Jalendo ma Jakristo ma Nyasaye oseiko ne tijno ok tim ohala gi Wach Nyasaye to otiyo gi chuny maler. Gima miyo oromo bedo jalendo ok en barua moro mondiki, to en nyak ma obedogo e tij lendo. Kata kamano, kata obedo ni tij lendo en tich maduong’, mano ok mi jalendo oting’re malo. Jotich Nyasaye ma gin dhano adhana mabende nyalo timo richo nigi mwanduni mar tich e agulini mag lowo manyalo tore, mondo teko ma gitiyogo onenore maler ni a kuom Nyasaye. Mano dwaro bolruok mondo ng’ato oyie bedo jatich Nyasaye, kendo mano en ng’wono manade moa kuom Nyasaye mar tiyo kaka “joote Kristo”! Omiyo en gima owinjore ahinya ka Paulo wacho ni, “kik uyud ng’wono kayiem nono”!​—2:14-17; 3:1-5; 4:7; 5:18-20; 6:1.

¹⁹ Kuom adier, Paulo ne ochiwo ranyisi maber ne jotich Nyasaye ma Jokristo mondo oluw. Wach achiel en ni ne ohero kendo ne opuonjore Ndiko mag Dho-Hibrania mokudhi gi much Nyasaye, konwoyo nyading’eny weche kuom Ndikogo, kowuoyo kuomgi kendo konyiso puonj mayudore kuomgi. (2 Kor. 6:2, 16-18; 7:1; 8:15; 9:9; 13:1; Isa. 49:8; Lawi 26:12; Isa. 52:11; Ezek. 20:41; 2 Sam. 7:14; Hos. 1:10) E wi mano, kaka jarit ei kanyakla, ne onyiso ni odewo ahinya kweth kowacho ni: “An to nachiwra mamor, kendo natinu chutho.” Ne ochiwore chuth ne owetene, mana kaka weche mosendik kuome nyiso maler. (2 Kor. 12:15; 6:3-10) Ne ok ool kotiyo matek e tijene kopuonjo, kojiwo ji, kendo korieyo weche e kanyakla mar Korintho. Ne ochiwo siem kuom riwruok gi mudho, konyiso Jo-Korintho ni: “Kik uriwru gi jo ma ok oyie.” Nikech ne oherogi, ne ok odwar mondo pachgi owuondi, “kaka thuol nowuondo Hawa gi riekone,” kuom mano ne ojiwogi gimor kama: “Nonreuru uwegi pile mondo une kuwuotho e yie. Ng’ireuru uwegi.” Ne ojiwogi mondo gibed Jokristo ma jochiwo, konyisogi ni “Nyasaye ohero jachiwo mamor,” kendo en owuon ne onyiso erokamano ahinya ne Nyasaye kuom mich maber modhiero wacho ma Nyasaye ne ochiwo. Kuom adier, owetene man Korintho nondiki e chuny Paulo gi hera, kendo tich mang’eny ma ne otiyo nikech gin, e wach monego onenre kuom jarit-kanyakla ma ok nindi. Mano kaka Paulo en ranyisi maber miwuoro ne wan kindegi!​—6:14; 11:3; 13:5; 9:7, 15; 3:2.

²⁰ Jaote Paulo miyo wang’eyo kama wanyalo yudoe teko gadier e kinde mag tem, kosiemonwa “Wuon ng’wono, kendo Nyasach hoch duto.” En ema “ohoyowa e masiche duto” mondo omi wanan nyaka wayud warruok mar donjo e piny mare manyien. Paulo kendo wuoyo kuom geno maber mar “ot ma Nyasaye oseloso, ot ma ok oger gi lwedo, ot mochwere, manie polo,” kendo owachoni: “E momiyo, ka ng’ato obedo e i Kristo, ochueye ng’a manyien; gik moko machon osekadho, neuru, gik moko duto obet manyien.” Jo Korintho mar Ariyo oting’o weche mabeyo mahoyo chuny ne jogo mabiro yudo gikeni mag Pinyruodh polo, mana kaka Paulo.​—1:3, 4; 5:1, 17.