SULA MAR 43
Jokristo Onego Obed gi Paro Mane e Wi Kong’o?
E piny ngima, ji nigi paro mopogore opogore e wi kong’o. Nitie jomoko mohero madhe ka gin gi osiepegi. To jomoko oyiero ni ok gibi madhe kata matin. Jomoko to madhe ma gimer. Ang’o ma Muma wacho e wi kong’o?
1. Be madho kong’o en gima rach?
Muma ok wach ni madho kong’o en gima rach. Kar mano, sama Muma wuoyo e wi mich mang’eny ma Nyasaye omiyowa, okwano “divai ma miyo chuny dhano mor” kaka achiel kuom michgo. (Zaburi 104:14, 15) Chwo gi mon moko miwuoyoe e Muma ma ne nigi yie be ne madhoga kong’o.—1 Timotheo 5:23.
2. En puonj mane ma Muma chiwo ne joma oyiero madho kong’o?
Jehova kwero madho kong’o mokalo tong’ kod mer. (Jo-Galatia 5:21) Muma wacho kama: “Kik ibed e kind jo ma madho divai mang’eny.” (Ngeche 23:20) Omiyo, ka wayiero madho kong’o kama ji nitie kata kar kendwa, ok onego wamadhe ahinya ma chop kama ok wanyal paro malong’o, chiko wechewa kod timbewa, kata madhe ma chop kama ohinyo dendwa. Ka po ni wan gi nyawo mar madho kong’o mokalo tong’, ber mondo wawere kode chuth.
3. Ere kaka wanyalo nyiso ni wachiwo luor ne yiero ma jomoko otimo e wi kong’o?
Ng’ato ka ng’ato onego oyier ka be obiro madho kong’o kata ooyo. Ok onego wang’ad bura ne joma oyiero madho kong’o e yo ma ok okalo tong’, kendo ok onego wachun ng’ato mondo omadh kong’o ka ok odwar timo kamano. (Jo-Rumi 14:10) Wanyalo ng’ado ni ok wabi madho kong’o ka po ni timo kamano nyalo chwanyo jomoko. (Som Jo-Rumi 14:21.) Ok onego ‘wadwar mana gik ma kelonwa ber wawegi, to onego wadwar gik ma kelo ber’ ne jomamoko.—Som 1 Jo-Korintho 10:23, 24.
TIM NONRO
Non ane ndiko moko ma nyalo konyi timo yiero ka be ibiro madho kong’o kod tong’ monego iket ka po ni iyiero madhe. Bende, non ane gima inyalo timo ka po ni in gi nyawo mar madho kong’o mang’eny to itemo matek mondo kik ikal tong’.
4. Yier ka be ibiro madho kong’o kata ooyo
Yesu ne neno nade wach madho kong’o? Mondo iyud dwoko, non ane hono ma nokwongo timo. Som Johana 2:1-11, kae to uwuo e wi penjo ma luwogi:
Hononi konyowa ng’eyo ni Yesu neno nade kong’o kaachiel gi joma madhe?
Yesu ne ok okwer ni ng’ato kik madh kong’o, omiyo, ere kaka Jakristo onego one ng’at moyiero madhe?
Kata obedo ni Jakristo nigi thuolo mar yiero ka be obiro madho kong’o, mano ok nyis ni kinde duto onyalo mana madhe. Som Ngeche 22:3, kae to inon ane kaka weche ma luwogi nyalo konyi yiero ka be onego imadh kong’o kata ooyo:
Idwaro riembo mtoka, apiko, ndiga, kata tiyo gi masin moro.
In gi ich.
Laktar okweri ni kik imadh kong’o.
In gi nyawo mar madho kong’o e yo mokalo tong’.
Chik ok oyieni madho kong’o.
In gi ng’at moyiero ni ok obi madho kong’o nikech ne en-ga gi nyawo mar madho kong’o e yo mokalo tong’ e kinde mokalo.
Be onego imi ji kong’o e arus kata e budho mamoko? Mondo ing’e gima nyalo konyi timo yiero, tug VIDIO.
Som Jo-Rumi 13:13 kod 1 Jo-Korintho 10:31, 32. Bang’ somo ndiko ka ndiko, wuouru e wi penjo ma luwoni:
Ere kaka tiyo gi puonj manie ndikoni, nyalo konyi timo yiero ma moro Jehova?
Jakristo ka Jakristo onego otim yiero ka be obiro madho kong’o kata ooyo. Kata ka oyiero madho kong’o, kinde moko onyalo yiero ni ok obi timo kamano
5. Ng’ad ni ibiro madho kong’o ma romo nade
Ka po ni iyiero madho kong’o, par wachni: Kata obedo ni Jehova ok wach ni madho kong’o rach, okwero madho kong’o e yo mokalo tong’. Nikech ang’o? Som Hosea 4:11, 18, kae to uwuo e wi penjo ma luwoni:
Ang’o ma nyalo timore ka ng’ato omadho kong’o mokalo tong’?
Wanyalo timo ang’o mondo kik wamadh kong’o e yo mokalo tong’? Onego wabolre kendo wang’e nyawo ma wan-go. Som Ngeche 11:2, kae to uwuo e wi penjo ma luwoni:
Ang’o momiyo en gima ber keto tong’ ne kong’o mimadho?
6. Ang’o ma nyalo konyo ng’ato mondo owe madho kong’o mokalo tong’?
Ne ane gima ne okonyo dichwo moro mondo owe madho kong’o e yo mokalo tong’. Tug VIDIO, kae to uwuo e wi penjo ma luwogi:
Kong’o ne miyo Dmitry timo ang’o?
Be ne oweyo madho kong’o mapiyo?
En ang’o ma ne okonye weyo madho kong’o e yo mokalo tong’?
Som 1 Jo-Korintho 6:10, 11, kae to uwuo e wi penjo ma luwogi:
Muma wacho ang’o e wi mer?
Ang’o ma nyiso ni ng’at ma madho kong’o e yo mokalo tong’ nyalo timo lokruok?
Som Mathayo 5:30, kae to uwuo e wi penjo ma luwoni:
Ng’ado lwedo en ranyisi ma Yesu notiyogo e nyiso ni nitie gik monego wawerego mondo wamor Jehova. Ang’o minyalo timo ka po ni ikedo gi nyawo mar madho kong’o e yo mokalo tong’?a
Som 1 Jo-Korintho 15:33, kae to uwuo e wi penjo ma luwoni:
Ang’o ma biro timoreni ka in gi osiepe mohero madho kong’o e yo mokalo tong’?
NG’ATO NYALO PENJI NIYA: “Be Muma wacho ni madho kong’o rach?”
Inyalo dwoke nade?
PUONJ MADUONG’
Jehova nomiyowa kong’o mondo omiwa mor, kata kamano, okwero madho kong’o mokalo tong’ kod mer.
Ang’o ma ipuonjori?
Muma wacho ang’o e wi kong’o?
Madho kong’o e yo mokalo tong’ nyalo kelo hinyruok mage?
Ere kaka wanyalo nyiso ni wachiwo luor ne yiero ma jomoko otimo e wi madho kong’o?
MED TIMO NONRO
Ere kaka rowere nyalo timo yiero mabeyo e wi madho kong’o?
Puonjri gik minyalo timo mondo kik imadh kong’o mokalo tong’.
“Paro Mowinjore Kuom Kong’o” (Ohinga mar Jarito, Julai 1, 2010)
Be Jokristo onego otuom glese sama gimetho?
“Penjo Moa Kuom Josombwa” (Ohinga mar Jarito, Februar 15, 2007)
Som sula ma wiye wacho ni “Nametho Asasa,” mondo ine kaka ng’at moro ne oweyo madho kong’o mokalo tong’.
a Joma ong’iyo madho kong’o e yo mokalo tong’ nyalo manyo kony kuom lakteche molony. Lakteche mang’eny wachoga ni joma nigi nyawo mar madho kong’o e yo mokalo tong’, ok onego omadh kong’o kata matin.