Inbiak pawhna hi nu leh pate leh fate inzawmna neihtîrtu lei dawh ang a ni
NU LEH PATE TAN
5 INBIAK PAWHNA
A AWMZIA
Inbiak pawhna ṭha tak nei tûr chuan, i fate nêna in ngaih dân leh rilru vei zâwngte in inhrilh tawn a ngai.
A PAWIMAWH CHHAN
A bîk takin, tleirâwlte nêna inbiak pawhna neih chu a harsa thei a. Fate chuan an naupan laiin nu leh pate hnênah thil engkim an hrilh ṭhîn a. An lo puitlin deuh chuan an hrilh duh vak tawh loh avângin an ngaihtuahnate leh an rilru vei zâwngte chu hriat theih a ni tawh lo va. An inkâr chu luiin a dang ang mai a ni. Dik tak chuan, hetiang hunah hian inbiak pawhna neih a pawimawh lehzual a ni.
I TIH THEIHTE
I fate’n thu an sawi duh hunah ngaihthlâksak rawh. Zân reh hnua inbiak an duh a nih pawhin ngaihthlâksak ang che.
“‘Nilêngin i bulah ka awm a! Tûnah chauh maw inbiak i duh a?’ tia chhân chu i duh mai thei. Mahse, kan fate’n an rilrua awmte min hrilh an duh chuan, engtin nge kan sawisêl theih ang? Chu chu nu leh pa tinte duhthusâm a ni lâwm ni?”—Lisa-i.
“A tlai lutuk hmaa mut chu duh ṭhîn mah ila, a châng chuan ka fate nêna ṭha taka inbiak pawhna kan neih theih hunte chu zan lai pelh hnuahte a ni ṭhîn.”—Herbert-a.
BIBLE THU BUL: “Tu pawhin mahni ṭhatna tûr zawng lovin, mi dang ṭhatna tûr zawng zâwk rawh se.”—1 Korinth 10:24.
I rilru kalpêntîr suh. Pa pakhat chuan: “A châng chuan ka fate’n thu an sawi laiin thil dang ka lo ngaihtuah daih ṭhîn a. Chu chu ka fate ngei pawhin an hria!” tiin a sawi.
Chutianga i awm ve ṭhîn a nih chuan, TV off-in, i phone leh tablet chu dah la. I fa thusawi chu pawimawh vak lo anga a lan pawhin, ngun takin ngaihthlâksak ang che.
“An rilru vei zâwngte chu kan tân a pawimawh tih kan hriat chiantîr a ngai. Chutiang a nih loh chuan, nu leh pate hnêna hrilh lovin, mi dang hnênah an sawi chhuak ang.”—Maranda-i.
“I fa ngaihtuah dân chu a dik lo hle a nih pawhin a lutukin chhâng lêt suh.”—Anthony-a.
BIBLE THU BUL: “In thu dawnsawn dânah fîmkhur rawh u.”—Luka 8:18, C.L. Re-edited.
Hun remchâng chu hmang ṭangkai ang che. A châng chuan naupangte hian nu leh pate nêna inhmachhawna an ṭhut loh hian thusawi nuam an ti zâwk a.
“Motor-a kan chuan laite chu rem chângah kan la ṭhîn a. Inhmachhawna ṭhut aiin, anmahni nêna ṭhut dunna chuan inbiak pawhna ṭha min neihtîr a ni.”—Nicole-i.
Chaw ei hunte chu tîtîhona hun ṭha tak dang a ni.
“Zanriah ei hun chu nilênga hun kan hmannaa nuam kan tih lai ber leh nuam lo kan tih lai berte sawiho nân kan hmang ṭhîn a. Chu chuan min inpumkhattîrin, harsatnate chu mahni chauhva kan hmachhawn a ngai lo tih min hriattîr a ni.”—Robin-a.
BIBLE THU BUL: “Ngaihthlâk chuh sela, thusawi chuh lo sela.”—Jakoba 1:19.