Khawvêl Tâwpna—Hlauhna, Ngaihvenna, leh Beidawnna

Mi tam takin khawvêl puma inthlâkthlengna awmna nî tûr anga an sawi, Maya calendar aṭanga chhûta December 21, 2012 hi engtin nge i lo ngaih ve? I beiseina azirin i thawveng emaw, i beidawng emaw, a nih loh leh i ngaihsak lo emaw a ni thei. Chu chu khawvêl tâwpna tûr sawi lâwkna dik lo dang pakhat mai a ni em?

Bible sawi “khawvêl tâwpna” chungchâng chu engtin nge ni ang? (Matthaia 24:3) Mi ṭhenkhat chuan, lei hi a kâng ral vek ang tih an hlau va. Mi dangte erawh chuan khawvêl tâwp dân tûr chu hmuh an châk thung a. Mi tam tak chuan tâwpna a hnaih tawh thu hriat reng mai chu an kham tawh a ni. Mahse, chutiang chhân lêtna chu thil awm tak tak ni lo, ngaihruat thil mai chhân lêtna a ni thei ang em?

Khawvêl tâwpna chungchâng Bible sawi dân dik tak hriat chu mak i ti mai thei a ni. Bible chuan tâwpna hun nghâkhlel taka kan thlîr chhan tûr min hrilh mai ni lovin, thleng tlai anga a lan avânga beidawnna a thlen theih thu pawh a sawi bawk a ni. Khawvêl tâwp chungchânga zawhna lâr ṭhenkhat Bible-in a chhân dân ngaihtuah tûrin kan sâwm a che.

Leilung hi a kângral vek ang em?

BIBLE CHHANNA: “[Pathianin] leilung nghahchhante chu a phûm a, kumkhuaa a nghîn loh nân.”—SAM 104:5.

Leilung hi mei emaw, thil dang emawa tihboral a ni lo vang. Bible chuan he leilung hi mihringte chatuana awmna tûr hmun a ni tih a zirtîr zâwk a. Sâm 37:29 chuan: “Mi felte chuan ram hi an luah ang a, a chhûngah hian kumkhuain an awm ang,” tiin a sawi a ni.—Sâm 115:16; Isaia 45:18.

Pathianin leilung a siam hnu chuan “ṭha a ti êm êm a,” tûnah pawh ṭha a la ti reng a ni. (Genesis 1:31) Tihboral tum ahnêkin, “lei tichhetute tihchhiat” chu min tiam zâwk bâkah, tihboral hlenna ata a humhim dâwn a ni.—Thu Puan 11:18.

Mahse, 2 Petera 3:7 thu hi mak i ti mai thei. Chu Bible châng chuan: “Tûnah vânte leh lei awmte hi . . . hâl tûra khêk a ni,” tiin a sawi si a. Hei hian lei hi a kâng ral ang tih a târ lang a ni lâwm ni? Dik takin, Bible chuan “vânte,” “lei,” leh thil ‘hâl chhiatna’ mei tih ṭawngkamte hi entîr neia hman châng a nei a. Entîr nân, Sâm 97:1-in: “Lei hi hlim takin awm sela,” a tih khân, “lei” tih hian a leilung ni lovin, a chunga chêng mihringte a kâwk a ni.

Petera thawn hnih 3:7 bul vêla thute chuan chuta sawi lan vânte, lei, leh hâl tihte chu entîr neia hman a nihzia a târ lang bawk. Châng 5 leh châng 6 chuan Nova dam laia Tuilêt nên a khaikhin a. Chutih lai chuan hmân lai khawvêl chu tihboral a ni a; chuti chung pawhin, kan awmna leilung hi chu a bo chuang lo. Chu ai mahin, Tuilêt chuan tharum thawh hmangte, a nih loh leh “lei” chu a nuai bo zâwk a ni. Tin, chutih hun laia mipuite chunga rorêltu, “vânte” pawh tihboral a ni bawk. (Genesis 6:11) Chutiang bawkin, 2 Petera 3:7 chuan mi suaksualte leh an sawrkâr dik lo takte tihboral hlenna tûr chu meia kâng ral angin a sawi lâwk a ni.

Khawvêl tâwp hunah eng thil nge thleng ang?

BIBLE CHHANNA: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang.”—1 JOHANA 2:17.

“Khawvêl” boral tûr chu leilung hi ni lovin, Pathian duhzâwng nêna inmila lo va nung khawvêl mihringte hi an ni. Doctor thiam chuan dam lo nun chhanhim nâna cancer-a chang thei dam lo neih bâwk chu a paihsak ang bawkin, Pathian chuan mi ṭhate hlim taka leilunga an chên theih nân mi suaksualte chu a ‘tiboral’ dâwn a ni. (Sâm 37:9) Chutiang zâwnga ngaihtuah chuan, “khawvêl tâwpna” chu thil ṭha tak a ni.

Chutiang a ṭha zâwnga thlîr dân chu “khawvêl tâwpna” tih thu mal hi “he kal hmang tâwpna” emaw, “hun tâwpna” emaw anga lehlin Bible-te chuan a târ lang a ni. (Matthaia 24:3, New World Translation, New Internation Version) Khawvêl tâwpnaah he leilung a dam khawchhuah a, mihring dam khawchhuak tûr an awm bawk avângin, hun thar, a nih loh leh kal hmang tharin a zui ang tih chu thil inâwm tak a ni lâwm ni? Ni e, tih chu Bible chhânna a ni; Bible chuan ‘hun lo la thleng tûr’ thu a sawi avângin.—Luka 18:30.

Isua chuan chu hun lo thleng tûr chu ‘siamtharna’ tiin a sawi a ni. Chutih hunah chuan, ani chuan atîra Pathian tum ang takin mihringte dinhmun chu a rawn siam ṭha ang. (Matthaia 19:28) Chutih hunah chuan,

• Mi zawng zawngte tâna himna leh hmuingîlna lei paradise chu kan chên ang.—Isaia 35:1; Mika 4:4.

• Hna awmze nei leh lungawithlâk tak kan nei tawh ang.—Isaia 65:21-23.

• Natna tinrêng tihdam a ni ang.—Isaia 33:24.

• Tarte an vânglaiah an kîr leh ang.—Joba 33:25.

• Mitthite an tho leh ang.—Johana 5:28, 29.

Pathian “duhzâwng,” kan tih chuan khawvêl tâwpna kan hlauh a ngai lo. Chu ai chuan, nghâkhlel takin kan thlîr zâwk thei a ni.

Khawvêl tâwpna a hnai tak zet em?

BIBLE CHHANNA: “Chûng chu a lo thleng in hmuh hun chuan Pathian ram a lo hnai tawh tih hria ang che u.”—LUKA 21:31.

Professor Richard Kyle-a chuan The Last Days Are Here Again tih lehkhabuah, “vawi leh khata inthlâk thlengna leh khawtlânga buainate chuan khawvêl tâwpna sawi lâwk duhna a awmtîr a ni,” tiin a ziak a. Chu chu chutiang inthlâkthlengna leh buainate hrilhfiah a harsat hunah a ni lehzual a ni.

Mahse, tâwpna chungchâng sawitu Bible-a zâwlneite chuan an hun laia thilthleng, hriatthiam harsa takte thlen chhan chu hrilhfiah an tum lo. Chu ai mah chuan, anni chu khawvêl tâwp a hnai tawh tih târ langtu dinhmunte ziak tûrin Pathianin a thâwk khum a ni. Chûng hrilh lâwkna ṭhenkhat chu ngaihtuah la, kan hun laia a thlen famkim leh kim loh thu tlûkna insiam ang che.

• Indo te, ṭâm te, lîrnghîng te, leh thihpui hlauhawm hri lêng te.—Matthaia 24:7; Luka 21:11.

• Dân bawhchhiatna nasa taka pung te.—Matthaia 24:12.

• Mihringte’n lei an tihchhiatna te.—Thu Puan 11:18.

• Pathian hmangaih lo va, mahni inhmangaihtu te, tangka ngainatu te, leh mahni lâwmna mai hmangaihtu te.—2 Timothea 3:2, 4.

• Chhûngkaw keh darhna te.—2 Timothea 3:2, 3.

• Mi nâwlpuite’n tâwpna a hnai tawh tih finfiahna an ngaihsak lohna te.—Matthaia 24:37-39.

• Khawvêl puma Pathian Ram chanchin ṭha hrilhna te.—Matthaia 24:14.

Isua sawi angin, “chûng zawng zawng” kan hmuh chuan khawvêl tâwp a hnai tawh tih i hria ang u. (Matthaia 24:33) Jehova Thuhretute chuan chu finfiahna chu an ring a, ram 236-ah thu hrilin an rinna chu mi dangte an hrilh chhâwng a ni.

Tâwpna chungchânga beiseina fuh lote chuan a lo thleng ngai dâwn lo tih a hril em?

BIBLE CHHANNA: “‘Muanna leh himna,’ tia an sawi lai takin hmeichhe nau vei angin chawp leh chilha boralna an chungah a thleng ang a, an pumpelh tawp lo vang.”—1 THESSALONIKA 5:3.

Bible chuan khawvêl tihchhiatna chu nau vei ṭan tîr nên a khaikhin a—nu nau vei na tawrh chu pumpelh theih lohvin a lo thleng thut a ni. Nu naupaiin a hrin hun a hnai tawh tih a hre thei a; chuvângin, tâwpna lo thlen nâna thil inmung chhoh dân chu naupai nên tehkhin theih a ni bawk. Doctor chuan nau hrin nî tûr chu a chhût lâwk pawh a ni thei; a ni chhûtah lo piang lo ta pawh ni se, a piang thuai dâwn tih chu nu naupai chuan a hre chiang tho a ni. Chutiang bawkin, tâwpna chungchânga beiseina fuh lote chuan tûn hi ‘ni hnuhnûng’ a ni tih thu dik chu a thlâk dang lam chuang lo.—2 Timothea 3:1.

‘Tâwpna chhinchhiahna chu a chiang viau a nih si chuan, engvângin nge mi tam takin an hmuh hmaih ṭhin?’ tiin i zâwt mai thei a. Bible chuan tâwpna a hnaih hunah mi tam takin finfiahna chu an ngainêp ang tih a târ lang a ni. Ni hnuhnûnga thil ṭha lo tak awmte pawm aiin: “Siam tirh aṭangin engkim a awm pângngai angin chi thlahtute muthilh nî ata tawh kha a la awm zêl alâwm,” tiin, an deu sawh zâwk dâwn a ni. (2 Petera 3:3, 4) Thu danga sawi chuan, ni hnuhnûng chhinchhiahna chu a chiang hle a; mahse, chu chu mi tam tak chuan an ngaihsak dâwn lo a ni.—Matthaia 24:38, 39.

He thuziak hian tâwpna a hnai tawh a ni tih Bible finfiahna ṭhenkhat chauh a târ lang a.a Hriat belh i duh ang em? I duh chuan, engvângin nge a thlâwna Bible zirpui tûra Jehova Thuhretute sâwmna chu i pawm loh vang? Zirna chu in inah emaw, hmun remchâng dangah emaw, phone hmang pawhin neih theih a ni. I pêk ngai awm chhun chu i hun ṭhenkhat a ni mai a, hlâwkna i hmuh tûr erawh chu tehkhin rual lohva hlu a ni. (w13-E 01/01)