BIBLE ṬANCHHAN ZAWHNATE CHHANNA
Khawvêl pumpui tân sawrkâr pakhat kan nei thei ngai ang em?
Engtin nge khawvêl sawrkâr pakhat chuan hnam tinte a suikhâwm theih? Isaia 32:1, 17; 54:13
Khawvêl pumah sawrkâr pakhat chauh awm ta se, mihringte tân a ṭangkai dân tûr chu han ngaihtuah teh. Tûn laia mi tam takte hrehawm tawrh chhan chu mi ṭhenkhat an hausak hle laia an retheih êm vâng a ni. Mahse, mihringte mamawh hria khawvêl sawrkâr pakhat chuan mi zawng zawng mamawh chu a phuhhrûksak thei ngei ang. Chutiang sawrkâr chu mihringte’n an siam theih ngai i ring em?—Jeremia 10:23 chhiar rawh.
Mihring chanchin tluanchhuakah, sawrkârte chuan an khua leh tuite, a bîk takin retheite enkawlna kawngah an hlawhchham nasa hle a. Sawrkâr ṭhenkhat phei chu an nunrâwng a ni. (Thuhriltu 4:1; 8:9) Mahse, Pathian Engkimtitheia chuan mihring sawrkâr zawng zawgte thlâktu tûr sawrkâr pakhat a din dâwn tih min tiam a. Chuta Rorêltu chuan mite chu a ngaihsak tak zet ang.—Isaia 11:4; Daniela 2:44 chhiar rawh.
Pathian Ramin eng nge a hlen chhuah ang?
Pathian Jehova chuan khawvêl Rorêltu atâna duhthusâm, a Fapa Isua chu a thlang a. (Luka 1:31-33) Leia a awm lai khân, Isua chuan mite ṭanpui chu a duh a ni. Lal nihna chelhin, hnam zawng zawngte chu a suihkhâwm ang a, an hrehawm tawrhna zawng zawngte chu a tihrehsak ang.—Sâm 72:8, 12-14 chhiar rawh.
Mi tinin Isua chu Rorêltu atân an pawm ang em? Pawm lo vang. Mahse, Pathian Jehova chu a dawhthei a. (2 Petera 3:9) Isua chu Rorêltu anga pawm theihna hun remchâng a pe a ni. Isua chuan mi suaksualte chu lei ata a tiboral ang a, khawvêl pumpuiah muanna leh himna a rawn thlentîr thuai ang.—Mika 4:3, 4 chhiar rawh. (w15-E 02/01)