Bible Ṭanchhan Zawhnate Chhanna
Isua’n nakinah eng nge a tih ang?
C.E. 33 khân, Isua chu a thi a, a tho leh a, vânah a lâwn ta a ni. Hun rei tak a liam hnuah Lal anga rorêl tûrin Isua chu thu neihna pêk a ni a. (Daniela 7:13, 14) Nakinah chuan khawvêla remna awmtîr tûr leh reitheihna nuai bo tûrin hma a la ang.—Sâm 72:7, 8, 13 chhiar rawh.
Lal a nih angin Isua chuan leia fel lohnate chu a thianfai ang
Mihringte chunga Rorêltu a nih angin Isua chuan thil ropui takte a la ti ang a. Pain a pêk thiltihtheihna chu mihringte ṭhat famkimna neih lêttîr nân a hmang dâwn a ni. Chûng mite chu tarna leh thihna tuar tawh lovin, leiah hian hlim takin an awm tawh ang.—Johana 5:26-29; 1 Korinth 15:25, 26 chhiar rawh.
Isua’n tûnah eng nge a tih?
Isua chuan a hnungzuitu dik takte khawvêl pum huapa thu hrilhna chu a kaihruai mêk a. Anni chuan mite hnênah Pathian Ram chungchâng Bible sawite chu an hrilh ṭhîn. Isua chuan Pathian Ramin mihring sawrkârte a tihtâwp thlengin a zirtîrte hnathawh chu a ṭanpui zêl dâwn tih a sawi a ni.—Matthaia 24:14; 28:19, 20 chhiar rawh.
Kristian kohhran dik tak hmangin, Isua chuan mite chu nun kawng ṭha zâwkah a hruai a. Ani chuan he khawvêl kalhmang hi tihchhiat a nih a, Pathian tiam khawvêl thar thleng pawhin anni chu a kaihhruai zêl ang.—2 Petera 3:7, 13; Thu Puan 7:17 chhiar rawh. (w14-E 04/01)