District Inkhâwmpui—Lâwm Taka Biakna Hun
1. Engtin nge Israelte kût leh tûn laia kan district inkhâwmpuite chu a inan?
1 Josefa, Mari, an fate, leh mi dangte chu Jerusalem-ah kum tina an neih kûtte hmang tûrin an kal ṭhîn a. Chûng hun lai chuan, anni leh mi dangte chuan an nî tin lungkhamnate chu hnuchhawnin, an nuna pawimawh zâwk thlarau lam thilte chu an ngaihsak a ni. Kûtte chuan Jehova ṭhatna chungchâng sawina hun leh a Dân thute ngaihtuahna hun a pe a. Lo awm tûr kan district inkhâwmpuite chuan chutiang bawka Pathian Jehova hlim taka biakna hun remchâng min pe ang.
2. District inkhâwmpui lo awm tûr atâna inbuatsaih tûrin eng nge kan tih ang?
2 Inbuatsaih A Ngai: Nazaret aṭanga kût hmang tûra zin nân Isua chhûngte tân kal lam leh hâwn lam belhkhâwmin mêl 120 vêl kea an kal a ngai a. Isua’n pianpui unau eng zât chiah nge a neih hre lo mah ila, Josefa leh Mari te tân ruahmanna siam leh theih tâwp chhuah a ngaih dân tûr chu kan ngaihruatsak thei a ni. District inkhâwmpui lo awm tûr, Inrinni leh Chawlhnia tel thei tûrin a ṭûl ang angin i inbuatsaih tawh em? Chutianga inbuatsaih tûr chuan i hnathawhna pu ber hnên aṭanga chawlh dîl emaw, in fate tâna an zirtîrtu hnêna chawlh dîlsak emaw a ngai thei ang. A ṭûl a nih chuan thlenna tûr hotel i hauh lâwk tawh em? Kohhrana mamawh zual bîk tuemaw chu inkhâwmpuia tel thei tûra ṭanpui tûrin hma i la thei ang em?—1 Joh. 3:17, 18.
3. Engtin nge Israelte kût chuan intihchak tawnna hun remchâng a siam?
3 Mi Tichak Thei Inkawmna: Judate kût nî chuan rinpuite nêna mi tichak thei inkawmna hun remchâng a va pe tak êm! Isua chhûngte’n ṭhian hluite nêna inkawmna hun neih leh chu an nghâkhlel ang tih rinhlelh rual a ni lo. Tin, Jerusalem kal lam leh hâwn lam zinkawngah Juda leh saphun mi tam takte zînga ṭhian thar chhar theihna hun remchâng an nei bawk.
4. Engtin nge kan Kristian inunauna kan hlut lo ngai lo tih kan lantîr theih?
4 Bâwih rinawm leh fing tak chuan district inkhâwmpuia thu sawi tûrte chu lehkhabua chhuah mai aia, inkhâwmpui buatsaiha min koh khâwm chhan pakhat chu kan infuih tawn theih nân a ni. (Heb. 10:24, 25) Chuvângin, chairman-in ṭhut hmun rem a hun tawh tih hriattîrna rimawi ngaithla tûra mipuite a sâwm hmaa mi dangte nêna inkawmhona nuam tak nei thei tûrin, nî tina inkhâwmpuina hmun thlen hma dân ruahman ang che. Chhûn chaw ei tûra inkhâwmpuina hmun chhuahsan aiin, kal chhuak lova kan kianga awmte nêna kan inkawm theih nân chhûn chaw samkhai tak rawn keng tûra fuih kan ni. Kan Kristian inunauna hi Jehova thilpêk a nih avângin, kan hlut lo ngai tûr a ni lo.—Mik. 2:12.
5. Thusawite hlâwkpui tak zet tûrin engin nge min ṭanpui ang?
5 Zirna Tûr Hun: Isua chuan a naupan lai aṭangin kût nîte chu a Pa vâna mi chungchâng zîr nân a hmang ṭangkai a ni. (Lk. 2:41-49) Inkhâwmpuia thusawi tûrte chu mahni leh chhûngkua anga hlâwkpui tak zet tûrin engin nge min ṭanpui ang? Inkhâwmpui chhûngin, i ṭhutnaah ṭhu nghet la, ṭûl lo taka inbiak chu pumpelh rawh. I cell phone emaw, pager emaw, a nih loh leh chutiang chi thil dang emawte chu nangmah leh mi dangte tihbuaitîr suh ang che. Thu sawitu chu en la, tawi têin lo ziak chhuak ang che. I fate’n thusawi an ngaithla a ni tih i chian theih nân chhûngkua angin ṭhu tlâng ang che u. Tlai lamah chuan thusawia ṭha in tih laite chu sawiho vang che u.
6. Silhfên leh inchei dân chungchângah eng nge kan rilruah kan vawn reng ang?
6 Silhfên leh Inchei Dân: Isua chhûngte leh Juda betu dangte kût hmanga an kal lam emaw, hâwng lam emawa tâwktu ram dang mi sumdâwngte tân chuan Isua chhûngte leh Juda betu dangte hriat hran chu a awlsam hle ngei ang; anni chuan an puan hmâwrah a fêmte siamin, a hmâwr tin fêmah a dum pâwl an dah ṭheuh avângin. (Num. 15:37-41) Kristiante chuan thuamhnaw hâk bîk nei lo mah ila, kan silhfên inchawih tâwk, felfai tak leh thianghlim tak aṭanga hriat kan ni ṭhîn. Inkhâwpuina lam pana kan kal lam leh hâwn lamah leh kan inkhâwmpuina khuaa kan awm chhûngin, kan lan dânah kan fîmkhur zual bîk tûr a ni. Inkhâwmpui bân hnua kan inthlâk a nih pawhin, zahawm takin kan inthuam tûr a ni a, inkhâwmpui badge card kan vuah reng tûr a ni bawk. Hetiang kawng hian, Thuhretu ni lote lakah kan danglam bîkin, min hmutute lakah hming ṭha kan siam thei ang.
7. Engvângin nge inkhâwmpuia mahni inpea hna thawh chu kan tum ang?
7 Tlâwmngaia Inpete Mamawh A Ni: Tluang taka inkhâwmpui kan hman theihna tûrin hna thawktu tam tak mamawh a ni a. Ṭanpui tûrin i inpe thei ang em? (Sâm 110:3) Inkhâwmpuia hna thawhte hi kan rawngbâwlna thianghlim pêng pawimawh tak a ni a, thu hriattîrna ṭha tak a ni thei a ni. Inkhâwmpui kan neihna hmun manager chuan tlâwmngaia hmun tithianghlimtute inpêknain a rilru a khawih êm avângin heti hian a ziak a ni: “Heta thilthleng ka tawnte zînga mak ropui ber avângin lâwmthu ka hrilh duh a che u. Jehova Thuhretute chu mi danglam bîk tak an ni a, an inkhâwmpuina hmunte chu a hma aia fai zâwkin an kalsan ṭhîn tih hming an nei tih ka lo hre ṭhîn. Nangmahni leh in inawpna pâwl hian he hmun hi vântlâng tâna hmun ṭha zâwkah in siam a, chutianga siamtute lah hmêlhriat nuam kan tih êm êm khawngaihna ngah takte an ni lehnghâl,” tiin.
8. Inkhâwmpui neihna khuaah thu hrilh theihna hun remchâng eng nge awm ang?
8 Thu Hrilh Theihna Hun Remchângte: Inkhâwmpuina khuaa mi tam takte chuan inkhâwmpuina badge vuah felfai taka inthuam leh incheite an hmu ang a, chu chuan an ngaihven a hlawhin inkhâwmpui chungchâng hrilh theihna hun remchâng min pe thei a ni. Kum li mi naupang pakhat chuan inkhâwmpui bânah thu leh hla chhuah thar a dawn chu restaurant-a ei leh in chhawptunu a hmuhtîr a. Chu chuan mipa naupang nu leh pate tân chu nu chu inkhâwmpui rawn chhîm ve tûra sawm theihna hun remchâng a pe ta a ni.
9. Kan unaute nungchang ṭhatna chungchângah hotel-a thawktute’n eng ang fakna thute nge an sawi chhuah?
9 Thil Ṭha Tih: Mi tam takte hmaah chuan district Inkhâwmpuia kan ‘thil ṭha tih chu a lang nghâl’ ṭhîn a. (1 Tim. 5:25) Kum tam tak chhûng inkhâwmpui kan neihna ṭhin India ram Hmâr lama khawpui pakhata hotel manager pakhat chuan: “In khawsazia chu kan duh hle mai; mi dang kan hmuh ṭhinte angin chil in chhâk ve mai mai lo va, teihawi mai mai in awm loh bâkah, hmun vêl in tibawlhhlawh si lo,” a ti. Khawpui danga hotel manager pakhat chuan pâwl dangte leh mi larte dâwr an harsatzia a sawi hnuah, an hotel-a thleng kan unaute lantîr thawhho duhna leh dawhtheihna rilru put hmang chu heti hian a fak a ni: “Kan mikhualte hi Jehova Thuhretute ang ni vek se kan duh khawp mai!” tiin. Kan unaute nungchang ṭha avânga lo awm hêng fakna thusawite leh chutiang bawk thusawi dang tam takte chuan kan Pathian Jehova thinlung a tilâwm ngei ang le!
10. Isua leh a chhûngte’n Pathian Jehova thlarau lam ruahmana an hlut dân chu engtin nge kan entawn theih?
10 Hmân lai kût nîte chu hun hlimawm tak a ni a, thlarau lam thil ngaihventu Judate chuan an nghâkhlel hle ṭhîn. (Deut. 16:15) Isua leh a chhûngte pawh khân kût hmang tûr leh hlâwkpui tak zet tûrin thil engpawh chân an inhuam a ni. Keini pawhin kan district inkhâwmpuite chu chutiang bawkin kan ngaihlu a, min hmangaihtu kan Pa vâna mi min pêk thilpêk angin kan thlîr a ni. (Jak. 1:17) Tûn hi kum tina hlim taka Pathian Jehova biak theihna hun remchâng atâna inbuatsaih hun a va ni tak êm!
[Phêk 5, 6-naa bâwm]
District Inkhâwmpui Hriattîrnate
◼ Inkhâwm Hun: Inkhâwm chu Inrinni-ah zîng dâr 9:20-ah ṭan a ni ang a, Chawlhni-ah chuan dâr 8:50-ah ṭan a ni ang. Inkhâwmpuina hmun kawngkapui chu zîng dâr 8:00-ah hawn a ni ang. Inkhâwmpui ṭanna rimawi ngaithla tûra puan a nih hian, hun chu zahawm taka ṭan a nih theih nân mahni ṭhutna tûr hmunah kan ṭhu ṭheuh tûr a ni. Inkhâwm chu Inrinni chuan tlai dâr 4:55-a tihtâwp a ni ang a, Chawlhni-ah erawh chuan tlai dâr 3:40-a tihtâwp a ni thung ang.
◼ Lîrthei Dahna: Lîrthei dah dân chunga thu kan neih theihna inkhâwmpuina hmunahte chuan, inkhâwmpuinaa tel tûr a lo thleng hmasa apiang hnênah dah man chawi lova hmun chantîr a ni ang. Lîrthei dahna hmun hi a zau lêm loh ṭhin avângin, lîrthei pakhatah a theih anga tam chuanho hrâm tûr a ni.
◼ Ṭhutna Hauh: Ṭhutna chu motor-a i chuanpuite emaw, in khata i chênpuite emaw, a nih loh leh i Bible zirpuite tân chauh hauhsak theih a ni ang.—1 Kor. 13:5.
◼ Chhûn Chaw: Chhûn chawlh chhûnga chaw ei tûra inkhâwmpuina hmun kalsan ai chuan, chhûn chaw samkhai tak chu rawn keng ang che u. Ṭhutna hnuaia dah theih tûr chaw kennate chu a hman theih ang. Chaw kenna lian leh thil kenna keh thei chi rêng rêng chu inkhâwmpuina inah ken luh phal a ni lo. Chaw leh ei chawp tûr thil dang chu inkhâwmpuina ngaihtuahtu pâwlin a buatsaih tel lo vang.
◼ Thawhlâwm: District inkhâwmpui ruahmanna avânga kan lâwmzia chu mahni Kingdom Hall emaw, inkhâwmpuina emawa khawvêl pum huap rawngbâwlna atâna thawhlâwm bâwmah phal taka thawhin kan lantîr thei a. Inkhâwmpuinaa cheque hmanga thawhlâwm thawh eng pawh chu “The Watch Tower Bible and Tract Society of India” hminga dawn theih tûra siam tûr a ni.
◼ Tawhsual leh Rîkrum Thil: Inkhâwmpuina hmunah damdawi lam thila rîkrum thil a thlen chuan, i bul hnaia awm inkhâwm enkawltu (attendant) chu hriattîr rawh, ani chuan First Aid Department a hriattîr nghâl ang a, inkhâwmpuinaa awm kan mi thiamte’n a hlauhawm dân chhûtin ṭanpuina pêk dân tûr an ngaihtuah nghâl ang.
◼ Pheikhawk: Kum tinin pheikhawk leh a kaihhnawih thil avânga intihpalhna a thleng deuh nual a. Kailâwn leh hmun hrang hranga him taka i kalpui theih tûr pheikhawk i bun tâwk leh mawihnai tak bun chu a ṭha ber a ni.
◼ Bengngawngte Tân: A hnuaia târ lan inkhâwmpui-ahte hian thusawite chu sign language pawha neih a ni ang: Bangalore (English); Coimbatore (Tamil); Kochi-2 (Malayalam); leh Pune-Chinchwad (English).
◼ Aw Thun: Aw thunna hmanrua eng pawh chu inkhâwmpuina electric hrui nên emaw, au rinna nên emaw thlun zawm tûr a ni lo va, mi dangte tibuai lo tûr zâwnga hman tûr a ni.
◼ Naute Ṭhutna Nawrlirh Theih leh Ṭhut Mutna: Naute ṭhutna nawrlirh theih leh ṭhut mutna te chu inkhâwmpuinaah ken luh tûr a ni lo. Amaherawhchu, ṭhutnaa vuah theih naute ṭhutnate chu ken luh theih a ni ang.
◼ Rimtui Inhnawih Chite: Inkhâwmpui tam tak chu khâwl hmanga boruak fîm lak luhna hmun inkhâr ûp taka neih a ni a. Chuvângin, thâwk lam pang leh a kaihhnawih lam thila harsatna neite’n buaina an tawh loh nâna rimtui inhnawih chi rim na lutuk rêng rêng hman loh chu ngilneihna lantîrna a ni ang.—1 Kor. 10:24.
◼ Follow-up Form: Please Follow Up (S-43) form chu inkhâwmpui chhûnga tawnchawp thu hrilhna kan neih aṭanga tuina lantîrtute chungchâng hriattîrna ziak nâna hman tûr a ni. Thuchhuahtute chuan inkhâwmpuinaah follow-up form pahnih khat vêl chu an keng tûr a ni a. Form kimchang taka ziak khah chu Book Room-ah emaw, i haw hunah i kohhran secretary hnênah emaw an bawhzui atân i theh lût thei ang.—November 2009 Kan Lalram Rawngbâwlna p. 3 en rawh
◼ Restaurant-ah: Hotel leh restaurant-a i nungchang mawi hmangin Pathian Jehova hming chawimawi rawh. Hmun tam takah chuan, an thiltih azirin lâwm thu sawi nân lâwmman tlêm azâwng chu hnutchhiah a ni ṭhîn.
◼ Hotel-ah: (1) Mamawh zât tûr aia tam pindan hauh suh la, an phal zât aia tam khawsa suh ang che u. (2) I pindan hauh lâwk tawhah i thlen leh theih dâwn loh chuan, hotel chu a rang thei ang berin hriattîr rawh. (3) Hman i inpeih hunah chauh bungraw nawrna nawrlirh chu lain, i hman zawh ve leh dah lehnghâl ṭhîn rawh. (4) Pindan chhûnga ei rawng bâwl theih lohna hmunah ei rawng bâwl suh. (5) In chhûng tifaitu tân nî tin sum tlêm azâwng lâwmthu sawi nân hnutchhiah rawh. (6) Hotel-a thlengte tâna a thlâwna an pêk zîng chaw, coffee, a nih loh leh vûr te chu mi dang tân la suh. (7) Hotel-a hna thawkte nêna in indâwrnaah thlarau rah lantîr reng rawh. Anni chuan mikhual tam tak an enkawl ṭhîn a, kan ngilneihna, dawhtheihna, leh remhriatna chu an hlut ṭhîn a ni. (8) Hotel Luah Theih Ziak Chhuahna-a târ lan luah man chu ni khat chhûng luah man tûr a ni a, chu mi bâkah chuan chhiah chawi a ngai bawk a ni. I thil hman loh emaw, i dîl loh emaw atâna man chawi belh tûra tih i nih chuan, chûng chu hnâwl la, inkhâwmpuinaa Rooming Department chu a rang thei ang berin hriattîr ang che. (9) I thlenna hotel room chungchânga buaina i neih chuan, inkhâwmpuinaa i awm chhûng ngeiin Rooming Department hriattîr la an ṭanpui thei ang che.
◼ Tlâwmngaia Rawngbâwlna: Inkhâwmpuia a ṭûlna apiang thawhna ṭanpui tûra kan inpêk chuan, inkhâwmpui aṭanga hlimna kan hmuh chu a nasa lehzual ang. (Tirh. 20:35) Chutianga inpe duh tupawh chuan Volunteer Service Department-ah an va inhriattîr tûr a ni. Kum 16 hnuai lam naupangte pawhin an nu leh pa emaw, enkawltu emaw, a nih loh leh anni’n an ruat puitling pakhat emaw enkawlna hnuaiah thawkin ṭanpuina hlu tak an pe ve thei a ni.