Rawngbâwlna Zauh Tûrin Ruahmanna Siam Nghâl Rawh
1. Hriatrengna hun a pawimawh riau chhan chu eng nge ni a, chu mi atân chuan engtin nge kan inbuatsaih ang?
1 Hriatrengna hun chuan ‘Jehova hnêna lâwmthu nasa taka sawi’ theihna hun remchâng thar min pe ṭhîn a. (Sâm 109:30) Tlanna Petu hnêna lâwmthu sawi nân March thla chhûng hian i rawngbâwlna i zauh ang em? Tûn hi ruahmanna siam ṭan hun a ni.—Thuf. 21:5.
2. Kum kalta April thlaa auxiliary pioneer tâna dârkâr phût zât tihtlêmna chu nang leh mi dangte chuan engtin nge in chhân lêt?
2 Auxiliary Pioneer Thawh: Ni kum khân April thlaa auxiliary pioneer thawkte tâna dârkâr phût zât tihtlêmna chuan kohhran mite chu a tiphûr hle a. Unaupa pakhat chuan: “High school kal lai ka ni a, regular pioneer ka thawk thei lo. Mahse, April thlaah dârkâr 30 hmua pioneer thawh ka dîl ang a, dârkâr 50 hmuh ka tum ang,” tiin a ziak a ni. Hun kima hna thawk unaunu pakhat chuan: “Dârkâr sawmthum—chu chu hmuh phâk a ni lutuk!” tiin a ziak ve thung a ni. He ruahmanna puan a nih khân, tûn hmaa pioneer lo thawk ṭhîn kum 80 pêl tawh unaunu chuan: “Hei tak hi a ni ka lo nghah reng chu! Jehova chuan pioneer thawh hi nuna hun ṭha ber ka hman hun a ni tih a hria a nih hi!” tiin a sawi. Auxiliary pioneer thawk thei lo mi dangte chuan rawngbâwlnaa thawh tam lehzual chu an tum a ni.
3. March, April, leh May thla chhûnga auxiliary pioneer thawh chhan tûr eng nge kan neih?
3 March thla chu dârkâr 30 emaw, 50 emaw hmua auxiliary pioneer thawh theihna hun ṭha tak a ni leh dâwn a. Chu bâkah, April 5-a neih tûr Hriatrengna inkhâwma mi dangte lo tel ve tûra sâwmna special beihpui chu March 17, Inrinni aṭangin kan nei ṭan bawk ang. Mi tam tak chuan an rawngbâwlna zauh chu nuam an ti hle ang a, April thla leh May thlaah pawh dârkâr 50 hmua auxiliary pioneer thawh chu an duh ngei ang.
4. Engtin nge kan rawngbâwlna kan zauh theih a, chu chuan eng nge a rah chhuah ang?
4 Chhûngkuaa Pathian Biakna neih zân in hman leh hunah, engvângin nge chhûngkuaa mi mal tinte’n Hriatrengna hun chhûnga a rawngbâwlna an zauh theih dân tûr chu in sawiho loh vang? (Thuf. 15:22) Jehova hnênah theihtâwp i chhuahna malsâwm tûrin ṭawngṭai ang che. (1 Joh. 3:22) Rawngbâwlnaa i tel tam lehzual hian, Jehova i chawimawi lehzual mai ni lovin, i hlimna pawh i tipung lehzual a lo ni ang.—2 Kor. 9:6.