Auxiliary Pioneer I Thawk Ang Em?
1. Engvângin nge Hriatrengna hun chu kan rawngbâwlna zauh nâna hun ṭha tak a nih?
1 Hriatrengna hun chu kan rawngbâwlna tihpun nâna hun ṭha tak a ni a. Chu chu tlanna atâna a Fapa min pêkna kawnga Jehova hmangaihna nasa tak kan ngaihtuah hun a ni. (Joh. 3:16) Hei hian kan thinlungah ngaihhlutna min neihtîr a, Jehova leh mihringte tâna a thiltihte chungchâng mi dangte hnêna hrilh kan châkna chu a tizual a ni. (Is. 12:4, 5; Lk. 6:45) Chu hun chu kan thu hrilhna biala mite leh kan hmêl hriatte chu Hriatrengna inkhâwma kan ruala lo tel ve tûra sâwmna beihpui kan thlâk hun a ni bawk. Chu mi hnuah, tuina nei rawn inkhâwmte chu an tuina chhawm nunsak kan tum ṭhîn a ni. March, April, a nih loh leh May thla chhûng hian auxiliary pioneer thawkin i rawngbâwlna i zauh ang em?
2. Engin nge March thla chu auxiliary pioneer thawh nâna hun ṭha tak nihtîr?
2 March Chu Thla Pawimawh Tak Nihtîr Rawh: March chu auxiliary pioneer thawh nâna hun ṭha tak a ni ang. Dîlna theh lûttute chuan dârkâr 30 emaw, 50 emaw thawk tûrin duh an thlang thei a. March thla chhûnga bial kantuin a tlawh laia auxiliary pioneer thawkte chu special pioneer leh regular pioneer a kawmna hun zawng zawngah an tel kim thei ang. Kum 2013, March 26, Thawhlehni-a neih tûr Hriatrengna atâna sâwmna beihpui thlâkna hun chu, kum dang aia pawhsei a ni a, March 1-a neih ṭan a ni ang. Chu bâkah, March thlaah hian chawlhkâr tâwp panga a awm a. Chuvângin, kum khata thla pawimawh ber i nihtîr theih leh theih loh engvângin nge ngun taka i ngaihtuah loh vang?
3. Engtin nge kan rawngbâwlna tipung tûra ruahmanna kan siam theih?
3 Ruahman Nghâl Rawh: Tûn hi pioneer i thawh theih nâna insiam rem ngaite hriat nân i hun duan en nawn hun a ni. Chhûngkuaa thawhhona neih chu a pawimawh dâwn a, chuvângin in Chhûngkuaa Pathian Biakna neih zân in neih hunah chhûngkua anga in thiltumte sawiho nân leh hun duan siam nân hun pe ang che. (Thuf. 15:22) Auxiliary pioneer i thawk thei lo a nih pawhin lunghnual suh ang che. Rawngbâwla i chhuah theih nî chuan, thawk rei zâwk tûrin i hun duan i siam rem thei ang em? Chawlhkâr chhûnga ni khat dang chu rawngbâwlin i chhuah belh thei ang em?
4. March, April, leh May thla chhûnga kan rawngbâwlna tihpunna chuan, eng hlâwkna nge a rahchhuah dâwn?
4 March, April, leh May thla chhûnga kan rawngbâwlna tihpunna aṭangin, Jehova rawngbâwlna leh mi dangte tâna inpêkna aṭanga kan hmuh hlimna leh lungawina chu kan tipung dâwn a ni. (Joh. 4:34; Tirh. 20:35) Chu aia pawimawh zâwk chu, kan inpêkna nasa tak chuan Jehova lâwmna a thlen dâwn a ni.—Thuf. 27:11.