Hriatrengna Hun—Rawngbâwlna Tihpunna Hun Remchâng!

1. March, April, leh May thla chhûngin rawngbâwlna tihpun chhan tûr eng nge kan neih?

¹ Lo awm tûr Hriatrengna hun chhûng hian rawngbâwlnaah i inhmang zual sauh thei ang em? Hmun tam takah chuan rawngbâwlnaa hun hman tam theih nân ni a rei zâwk a. Thuchhuahtu ṭhenkhat chuan rawngbâwl nâna an hman theih tûr hna emaw, school emaw aṭangin chawlh an nei dâwn a ni. April ni 2 aṭanga inṭanin, April 17-a neih tûr Hriatrengna inkhâwma lo tel tûra tuina neite sâwmna special campaign kan nei ṭan ang a. Chu mi hnuah chuan, lo inkhâwmte tuina chhawm nunsak kan tum ang a, anni chu April 25 chawlhkâr inṭana neih tûr special vântlâng thusawi-a lo tel tûrin kan sâwm bawk ang. March, April, leh May thla chhûngin rawngbâwlna tihpun chhan tûr tam tak kan nei chiang hle.

2. Kan rawngbâwlna tihpun dân kawng ṭha tak chu eng nge ni?

² Auxiliary Pioneer Thawh: Rawngbâwlna tihpun dân kawng ṭha tak chu auxiliary pioneer thawh hi a ni a. Kan buai hlawm êm avângin, chutianga thawk thei tûr chuan inruahman lâwk leh hun duan siam rem a ngai a ni. (Thuf. 21:5) Nî tina thiltih ṭhin pawimawh lutuk lêm lo ṭhenkhat chu nakina tih atâna dah theih a ni ang. (Phil. 1:9-11) Kohhrana mi dangte’n an thawh ve duh tâkin engah nge auxiliary pioneer thawh i duhzia i sawi chhuah loh vang?

3. Engtin nge chhûngkuate chuan rawngbâwlna tipung tûrin ruahmanna an siam theih?

³ Chhûngkuaa Pathian Biakna neih zân in hman leh hunah, chhûngkua anga in thiltumte sawiho chu a ṭha ang. (Thuf. 15:22) In ṭanrual chuan chhûngkaw zînga ṭhenkhat chuan thla khat emaw, a aia tam emaw chu auxiliary pioneer in thawh theih a rinawm a. Chutiang pawh in thei hlawl lo a nih chuan, engtin nge ni ang? Tlai lam rawngbâwlnaa tel châng neihna emaw, Inrinni leh Chawlhni-a hun hman tam lehzualna emaw hmanga rawngbâwlna tipung tûrin ruahmanna in la siam thei cheu a ni.

4. He Hriatrengna huna kan rawngbâwlna tihpunna aṭangin eng malsâwmna nge kan dawn theih?

⁴ Pathian Jehova chuan a rawngbâwlnaa kan thiltih zawng zawng chu a hmu vekin, kan inpêkna chu a hlut hle a ni. (Heb. 6:10) Jehova leh mi dangte tâna inpêkna chuan hlimna a rah chhuak a. (1 Chro. 29:9; Tirh. 20:35) He Hriatrengna hunah hian i rawngbâwlna tipungin, a rah chhuah hlimna leh malsâwmna chu i dawng thei ang em?