He Hriatrengna Hun Hi Hlimawm Takin Hmang Rawh!

1. He Hriatrengna hun chhûnga kan hlimna tih pung dân kawng khat chu eng nge ni?

¹ March, April, leh May thla chhûng hian i hlimna tih pun i duh em? Tih dân kawng khat chu, a theih chuan auxiliary pioneer thawk a, tam lehzuala rawngbâwl a ni. Engtin nge chu chuan i hlimna a belhchhah ang?

2. Engtin nge kan rawngbâwlna zauhna chuan hlimna a tihpun?

² I Hlimna Tipung Rawh: Kan thlarau lam mamawhte kan tihpuitlin lai hian, Jehova chuan amah biakna aṭanga hlimna leh lungâwina nei thei tûrin min siam a. (Mt. 5:3) Ani chuan mi dangte hnêna thil pêkna aṭanga hlimna nei thei tûrin min siam bawk a ni. (Tirh. 20:35) Rawngbâwlna chuan Pathian be thei tûr leh mite ṭanpui thei tûrin min siam a. Rawngbâwlna tihpunnain hlimna nasa lehzual a rah chhuak chu thil âwm tak a ni. Chu bâkah, thu kan hrilh tam poh leh sawi dân kan thiam lehzual thei bawk. Thiamna kan neih chhoh zêl hian inrintâwkna kan neiin kan zâmna pawh a reh sawt thei a ni. Thu hrilh theihna leh Bible zirpui neih ṭanna hun remchâng tam tak kan nei a. Hêng zawng zawngte hian rawngbâwlna chu a tinuam zual a ni.

3. Engvângin nge March leh April thla chu auxiliary pioneer thawh nâna a ṭhat bîk?

³ March leh April thla hian dârkâr 30 emaw, 50 emaw hmu tûra duh kan thlan theih avângin auxiliary pioneer thawh nâna hun ṭha bîk tak a ni. Hriatrengna inkhâwma mi dangte lo tel ve tûra sâwmna campaign hlimawm tak chu March 22, Inrinni aṭanga ṭanin April 14, Thawhṭanni thlenga neih a ni bawk ang. Thu hrilhna bialah hun tiam chhûnga a tam thei ang ber tlawh chhuak tûrin mi a tam thei ang berte’n ‘rawng an bâwl tlân’ dâwn avângin, kohhrante chu an phûr hle ang.—Zep. 3:9.

4. Auxiliary pioneer thawh kan duh chuan eng nge kan tih ang?

⁴ Tûnah Inbuatsaih Rawh: I la inbuatsaih lo a nih chuan, thla khat emaw, a aia tam emaw chhûnga rawngbâwlna zauh nân hun duan leh insiamrem ngaite ennawn tûra hun insimin, chu chu tawngṭainaah telh rawh. (Jak. 1:5) Chu mi chungchâng chu i chhûngte leh kohhrana mi dangte pawh sawipui ang che. (Thuf. 15:22) I hrisêlna a ṭha lo emaw, i buai hle emaw chung pawhin auxiliary pioneer thawhna aṭanga lo awm hlimna chu i dawng ve thei a ni.

5. He Hriatrengna hun chhûnga kan rawngbâwlna kan zauhna chuan eng rah nge a chhuah ang?

⁵ Jehova chuan a chhiahhlawhte chu hlim taka an awm a duh a. (Sâm 32:11) He Hriatrengna hun chhûnga kan rawngbâwlna zauh tûra kan thawhrimna chuan kan hlimna a tipung mai ni lovin, kan Pa vâna mi lâwmna pawh a thlen ngei ang.—Thuf. 23:24; 27:11.