Rawngbâwlnaah Thiamna Tihmasâwn Rawh—Mi Mal Ngaihsakna Lantîrin

A Pawimawh Chhan: Isua chuan mite chu a mi mal anga thlîrin ngaihsakna a lantîr ṭheuh va. Entîr nân, ṭum khat chu Isua’n bengngawng pakhat a tihdam khân, chu pa zâmzia a hria a ni ngei ang; mipui zîng ata hruai chhuakin a ti dam a ni. (Mk. 7:31-35) Ani chuan a zirtîrte tlin tâwk hriatna lantîrin leh thu tam tak faha tihrilhhai lovin, anmahni a ngaihtuahzia a târ lang a. (Joh. 16:12) Vâna nihna sâng tak a chelh hunah pawh, Isua chuan mi mal ngaihsakna a lantîr reng tho a ni. (2 Tim. 4:17) Krista hnungzuitute kan nih angin, amah entawn chu kan duh a. (1 Pet. 2:21; 1 Joh. 3:16, 18) Chu bâkah, in neitute ngaihtuahna lantîr a, an dinhmun danglam bîk te, an ngaihven zâwng te, leh an ngaih pawimawh zâwngte kan hriat chuan rawngbâwlnaah kan hlawhtling lehzual ang. In neituin chanchin sawi tûr mai emaw, thu leh hla chhuah pe tûr mai emaw kan ni lo va, mi mal takin amah kan ngaihsak a ni tih a hriat chuan kan thusawi a ngaihthla duh lehzual ang.

A Tih Dân Tûr:

Ṭha takin inbuatsaih rawh. Dam tak leh nui hmêl puin, nêlawm tak ni ang che.
Thil chîk mi ni ang che. In neitu chuan fa a nei tih hriat theihna emaw, huan siam leh ran vulh tui mi a ni tih hriat theihna emaw, a nih loh leh sakhaw thurin vawn ngheh bîk nei mi a ni tih hriat theihna emaw i hmu em? I thuhmahruai chu a dinhmun mil tûrin i siam rem thei ngei ang.
A ngaih dân zâwt la, a sawi lai pawhchahsak lovin ngun takin ngaihthlâksak rawh. I ngaithla tih lantîr nân mitmeia inzawmna nei tlat la. A ngaih dân a sawi avângin lâwm thu hrilh la, tih tak zetin fak ang che. Inhnial duhna chu pumpelh rawh.
Insiamrem thei tak ni rawh. A ṭûl chuan, a thil ngaih pawimawh lam hawizâwngin i thusawi dân chu siamrem ang che. Kan tract te, brochure te, leh magazine-ah te chuan thu chi hrang hrang a chuan avângin, chutianga thusawi dân siamrem chu i rin aiin a awlsam zâwk mai thei a ni. I va tlawh hun chu a buai lai ang chi a remchân loh lai a nih chuan pawi i tih thu sawiin, i thusawi chu titâwi ang che.

Tûn Thla Chhûng Hian Tichhin Rawh:

Thuchhuahtu chuan in neitu thusawi lam hawi tûra a thusawi a siamrem dân târ langtu tihchhinna chu chhûngkuaa Pathian biakna neih hunah emaw, rawngbâwlnaa tel hunah emaw nei ang che.
Thlawhhma rawngbâwlna atâna inhmuhkhâwmna ṭhenkhatah kaihruaitu chuan mi mala ngaihsakna lantîr theih dân chu a sawipui emaw, a entîr emaw thei a ni.