Tract Hmanga Inbiakna Neih Ṭan Dân

January 2018 aṭang khân, Nun leh Rawngbâwlna Inzirna Lehkhabu kâwmah chuan inbiak dân tûr entîrnate a chuang a. Mite hnêna thu leh hla chhuahte pe ringawt lo va, anmahni tîtîpui tûra fuih kan ni. Inbiak dân tûr entîrna video-te chuan Bible chauh hmanga inbiak ṭan theih dân a târ lang a, chu chuan thuchhuahtute chu an thusawi dân siamrem tûrin a ṭanpui a ni. Mahse, chu chu in tina thu kan hrilh hunah kan thu leh hla chhuahte kan hmang tûr a ni lo tihna a ni em? Ni lo ve! Entîr nân, tract-te chu inbiak ṭan nâna thil ṭangkai tak a ni thei a. Eng tract pawh hmang dâwn ila, a hnuaia tih dân hi kan hmang thei a ni:

1. Phêk hmasa bera duh thlan theih zawhnate chu zâwt rawh.

2. Phêk hnihna chung lama a chhânna târ langtu Bible châng(te) chu hmuh la. Hun a awm chuan tract chhûnga thu ṭhenkhat chhiarin, sawipui ang che.

3. Tract chu in neitu pe la, a hman huna a puma chhiar tûrin fuih rawh.

4. I chhuah hmain, “Ngaihtuah Tûr” tih hnuaia zawhna chu hmuh la, Bible chhânna sawipui leh tûrin ruahmanna siam ang che.

I tlawh leh hunah, a chhânna chu sawipuiin i kal leh huna sawipui tûr zawhna dang hnut chhiah rawh. Kan website-a zawhna pakhat emaw, phêk hnung lama târ lan thu leh hla chhuaha zawhna pakhat emaw i thlang thei ang. A remchân hunah, Pathian Min Pêk Chanchin Ṭha! tih brochure emaw, Zirtîrna Hmanraw Bâwma thu leh hla chhuah pakhat emaw hmêlhriattîr ang che.