INHUATNA THLENG LEH ṬHIN TIHTAWP DAN

2 | Phuba La Suh

Bible Zirtîrna:

“Tu sual pawh sualin thungrûl suh u. . . . A theih phawt chuan nangmahni lam tal, mi zawng zawng nên inremin awm rawh u. . . . In phuba la suh ula, . . . ‘“Phuba rêng rêng keima lâk tûr a ni, keiman ka thungrûl ang,” Lalpain a ti,’ tih ziak a ni si.”—ROM 12:17-19.

A Awmzia:

Dik lo taka cheibâwl kan nih huna thinrim chu thil pângngai tak nih mah se, chumi avânga phuba lâk erawh Pathianin a phal lo. Chu aiin, ani chuan nakin lawkah thil dik lo zawng zawng a chinfel dâwn avângin amah nghâk tûrin min fuih a ni.—Sâm 37:7, 10.

I Tih Theihte:

Ṭha famkim lo mihringte’n phuba kan lâk hian inhuatna chu a thleng nawn leh ṭhîn a. Chuvângin, tu emawin a tilungni lo che emaw, i rilru a tinâ emaw a nih pawhin thungrûl suh. I rilru thunun tum la, zaidam takin chhâng lêt ang che. Dinhmun ṭhenkhatah chuan, thilthlengte ngawih liamsan mai chu a ṭha ber thei a. (Thufingte 19:11) Dinhmun dangah erawh chuan thil awm dânte sawi chhuah chu a ṭha zâwk thei bawk. Entîr nân, a tuartu zâwk i nih chuan police emaw, thuneitu dangte emaw hnêna thlen chu i thlang thei a ni.

Phuba lâk chu mahni intihchhiatna mai a ni

A nih leh, inrem taka buaina chinfel dân kawng awm lo anga a lan chuan engtin nge ni ang? A nih loh leh, inrem taka chingfel tûra theih tâwp i lo chhuah tawh a nih chuan engtin nge ni ang? A enga pawh chu ni se, phuba la suh ang che. Phuba lâkna chuan dinhmun chu a tichhezual zâwk mah thei a. Chu aiin, inhuatna thleng leh ṭhîn chu titâwp zâwk rawh. Pathianin buainate a chinfel dân chu i rinchhan tlat thei a ni. “Amah chu ring la, aman a ti vek ang.”—Sâm 37:3-5.

Nuna Thiltawn—ADRIÁN-A

Phuba Lâk Duhna A Hneh

A tleirâwl chhoh chuan, Adrián-a chu huatnaa khat mi nunrâwng tak a ni a, amah tibuaitute chu kutthlâk a duh mai ṭhîn. Ani chuan: “Silaia inkahnaahte ka tel ṭhîn a, thisen kâi hnuang leh thi tûra kawngsîra hnutchhiaha ka awm châng a tam mai,” tiin a sawi.

Adrián-a chuan kum 16 mi a nihin Bible a zir ṭan a. Ani chuan: “Bible zirnaa hma ka sâwn chhoh zêl rualin ka miziate thlâk danglam a ngai tih ka hre ta a ni,” tiin a sawi. A thinlung aṭanga huatna paih bo va, tharum thawhna a bânsan a ngai a. A bîk takin, phuba la lo tûra fuihna Rom 12:17-19-naa a thu zirte chuan a thinlung a khawih hle. Ani chuan: “Jehova’n rorêlna dik lote chu a duh dânin a hun takah a chingfel ang tih ka pawm a. Ka nun dân râwng tak chu zawi zawiin ka bânsan thei ta a ni,” tiin a sawi.

Tlai khat chu, tûn hmaa a lo tihbuai ṭhin mi sual rual chuan Adrián-a chu an rawn bei a. An zînga hruaitu ber chuan: “Min bei lêt ta che!” tiin a cho va. Adrián-a chuan: “Khawih lêt chu ka châk khawp mai,” tiin a sawi. Mahse, khawih lêt aiin, Jehova hnênah tawi têin a ṭawngṭai a, a kalsan ta a ni.

Adrián-a chuan: “A tûkah, chu mi sual rual hruaitu ber chu amah chauhvin kawngah ka tâwk a. Ka thinrim a rawn so sâng thut a; mahse, mahni inthunun thei tûrin Jehova ṭanpuina dîlin rilruin ka ṭawngṭai leh a. Mak tak maiin, ani chuan mi rawn pan a: ‘Ni zâna thilthleng avâng khân min ngaidam dâwn nia. Dik tak chuan, nangmah ang nih hi ka duh. Bible zir pawh ka duh a ni,’ tiin a sawi. Ka thinrim ka thunun thei chu ka lâwm hle! Bible kan zir dun theih avâng pawhin a lâwmawm tak zet bawk a ni,” tiin a sawi.