I Hriat Ve Atâna An Duh Chanchin Ṭha Chu
ISUA he leia a awm lai khân, a zirtîrte a hnênah lo kalin: “I lo kal lehna leh khawvêl tâwpna chhinchhiahna chu eng nge ni ang?” tiin an zâwt a. Ani chuan hnam tam tak telna indona te, ṭâm te, hri lêng te, dân bawhchhiatna pung te, sakhaw hruaitu derin mi tam tak an hruai bona te, a hnungzuitu dik takte huatna leh tihduhdahna te, mi tam takte felna hmangaihna a daihna te a lo awm tûr thuin a chhâng a ni. Hêng thilte hi a lo thlen ṭan chuan Krista chu hmuh theih lohvin a lo kal dêr tawh tihna a ni a, vân Ram chu a hnai hle tawh tihna a ni bawk. Chu chu chanchin thar—chanchin ṭha a va ni êm! Chuvângin: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin Isua chuan chu chanchin ṭha chu chhinchhiahna zîngah a telh a ni.—Matthaia 24:3-14.
Tûn lai khawvêla thil thlengte ngau ngau hi chu a ṭha lo va; mahse, a târ lan erawh chu a ṭha thung a ni—Krista lo awmna a ni si a. A chunga dinhmun sawi tâkte khi, nasa taka an lo puan, kum 1914-ah chuan chiang takin a lo lang ṭan ta! Chu chu Jentailte Nî a kinna chhinchhiahna a ni. Mihringte rorêlna chu Krista Kum Sâng Rorêlnaa thlêkthleng tûr a ni a, chu rorêlna inthlâkthlengna hun a inṭanzia chhinchhiahna a ni bawk a ni.
Chutianga rorêlna inthlâkthlengna hun a awm tûr thu chu Sâm 110-na châng 1 leh châng 2, leh Thu Puan 12:7-12 chuan a lo târ lang a. Chutah chuan Krista chu Lal a nih hun tûr nghâkin vâna Pathian ding lamah a ṭhu dâwn tih lantîr a ni. Tichuan, vâna indonaah chuan Setana chu leia paih thlâk a ni ang a, lei chungah chuan chungpikna a thleng ang a; tin, Krista chuan a hmêlmate zîngah ro a rêl dâwn a ni. Suahsualna tâwpna tak tak chu “hrehawmna nasa tak,” a lo thlen hunah a ni ang a, chu chuan Har–Magedon indonaah a vâwrtâwp a thleng ang a, chu chu Krista Kum Sâng Rorêlna muanawm tak chuan a zui ang.—Matthaia 24:21, 33, 34; Thu Puan 16:14-16.
Bible chuan: “Hei hi hre rawh, ni hnuhnûngahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu âwih lo te, lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si; Pathian ngaihsak anna an nei ang a, nimahsela a thiltihtheihna chu an âwih lo vang; chûng ang chu hawisan rawh,” tiin a sawi.—2 Timothea 3:1-5.
Ṭhenkhat chuan hêng thilte hi hmân aṭanga a thlen reng tawh thu sawiin an hnial mai thei; mahse, tûn ang rênga nasa hian a la thleng ngai lo. Thilthleng chanchin chhui mite leh chanchin sawitute sawi dân chuan, kum 1914 aṭanga thil thleng ang rêng hi khawvêl hian a la tawng ngai lo a ni. (Phêk 7-na en rawh.) Chungpikna chu tûn hma zawng aiin a nasa zâwk hle a. Chu bâkah, Krista’n ni hnuhnûngte chhinchhiahna dang a sawite zîngah hêng thute hi kan ngaihtuah tûr a ni: Krista lo awmlehna leh Lalram chungchâng thu khawvêl pum huapa puanchhuahna chu tûn hma zawng aiin a nasa hle a ni. Jehova Thuhretute chuan thuhrilhna avânga tihduhdahna chu an tuar nasa bîk a. An zînga mi za tam tak chu Nazi concentration camp-ah tihhlum an ni. Tûn thleng hian Jehova Thuhretute chu ram ṭhenkhatah chuan khapbeh an ni a, hmun dangah chuan man te, lung ina khung te, sawisak te, leh thah te an tuar a ni. Hêng zawng zawngte hi Isua’n chhinchhiahna a pêkte zînga mi vek a ni.
Thu Puan 11:8-a sawi lâwk angin, Jehova Thuhretu mi rinawmte lakah “hnamte chu an thinur a,” chu chuan chûng hnamte chungah chuan Jehova “thinur” chu a lo thleng ve thung dâwn tih a târ lang a ni. Chu Bible châng vêk chuan Pathianin ‘lei tichhetute a tichhe ve thung’ dâwn tih a sawi bawk. Leiin nunna a châwm theihna hi heti khawpa tihderthâwn a la ni ngai lo rêng rêng a. Nimahsela, tûnah chuan a danglam zo ta! Mihringte hian lei hi an tihbawlhhlawh zui zêl chuan chênna tlâk a ni lo mai dâwn tih mi thiam tam tak chuan an sawi a. Mahse, Jehova chuan leilung hi “mihring awm nân a din” a ni a; chuvângin, lei hi an tihchhiat zawh vek hmain a tichhetute chu a tichhe vek dâwn a ni.—Isaia 45:18.
LALRAM HNUAIA LEI MALSAWMNATE
Bible ringtu tam tak chuan chhandamna chang zawng zawngte chu vâna an awm an ring a, chutiang mite tân chuan Pathian Lalram khua leh tui nia he leia chên chu thil mak tak a ni mai thei. Bible chuan bithliah chin nei mi tlêm tê chauh vânah an kal a, leia chatuana chêng tûrte chu mipui tam tak, bithliah chin nei lote an nih tûr thu a târ lang a. (Sâm 37:11, 29; Thu Puan 7:9; 14:1-5) Chu Krista hnuaia Pathian Ramin khawvêl a tihkhah tûr thu leh a awp tûr thu chu Bible-a Daniela hrilh lâwkna thu hian a târ lang bawk a ni.
Chutah chuan Krista Lalram chu Jehova lalchungnunna tlâng aṭanga lung laihchhuah anga sawi a ni a. Chu chuan leia ram thiltithei tak takte ai awhtu milim chu a tichhiain a tikehsawm vek a; tichuan, “milim delhtu lung chu tlâng lian takah a lo chang a, lei pum hi a khat ta a.” Hrilh lâwk thu chuan heti hian a sawizawm zêl a: “Chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin.—Daniela 2:34, 35, 44.
He Lalram leh Pathian Lehkha Thu ṭanchhan nei, lei mawi tak leh fai taka chatuan nun beiseina chu a ni Jehova Thuhretute’n hriattîr che an duh chu ni. Tûna nung dama awm mi maktaduai tam tak leh thlâna awm mêk mi maktaduai tam tak pawhin chuta chatuana chên theihna hun ṭha chu an nei dâwn a. Tichuan, Isua Krista Kum Sâng Rorêlna hnuaiah chuan, atîra Jehova’n lei a siam a, mihring nupa tuak hmasa ber a dah laia a thiltum chu a lo thleng famkim tawh ang. Chu lei Paradis chu a ninawm ngai hauh lo vang a. Eden huana Adama hnêna pêk hna thawh tûr ang chiah, lei leh a chhûnga thlai leh nungchate enkawlna hna, hna lian tak chu mihringte chuan an nei ang. Tin, anni chu “an thawh chhuah chungah chuan an lâwm dâwn a ni.”—Isaia 65:22; Genesis 2:15.
Isua’n: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭaina min zirtîr hi chhân a nih huna thil awm dân tûr târ langtu Bible châng tam tak kawhhmuh tûr a awm a. (Matthaia 6:10) Mahse, tûn atân chuan he mi pakhat hi lo duhtâwk rih mai ila: “Lalṭhutphah aṭangin aw ring takin, ‘Ngai teh, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,’ a tih ka hria. Tin, lalṭhutphaha ṭhu chuan, ‘Ngai teh, thil engkim ka siam thar e,’ a ti a. Tin, ‘Ziak rawh, hêng thu hi a rinawmin a dik si a,’ a ti a,” tih hi.—Thu Puan 21:3-5.
[Phêk 15-naa thu lâk chhuah]
“Hun khirh takte,”
MAHSE “chu mi zawhah chuan tâwpna chu a lo thleng ang”
[Phêk 18-naa milem]
Netherlands
[Phêk 18-naa milem]
Nigeria