Jehova Chhiahhlawhte Chuan Beiseina Dik Tak An Nei

“Jakob-ho mi la awm chhunte chu mi tam takte zîngah LALPA aṭanga dai tla . . . angin an awm ang; chu chuan mihring a nghâk [“beisei,” NW] lo va.”​—MIKA 5:7.

1. Engtin nge thlarau lam Israel chu hahdamna bul a nih?

JEHOVA chu ruah leh dai Siamtu ropui tak a ni a. Dai emaw, ruah emaw min pe tûra mihring nghah leh beisei chu a lo thlâwn mai a ni. Zâwlnei Mika chuan heti hian a ziak a: “Jakob-ho mi la awm chhunte chu chi tam takte zîngah LALPA aṭanga dai tla ang leh hlobet chunga ruah sûr angin an awm ang; chu chuan mihring a nghâk [“beisei,” NW] lo va,” tiin. (Mika 5:7) Tûn laia “Jakob-ho mi la awm chhunte” chu tute nge ni? Chûng mite chu “Pathian Israel,” thlarau lam Israelte chu an ni. (Galatia 6:16) Anni chu khawvêla “chi tam takte” tân “LALPA aṭanga dai tla” ang leh “hlobet chunga ruah sûr” angin mi tihahdam thei tak an ni. Ni e, tûn laia hriak thih Kristiante chu Pathian aṭanga chhuak mite tâna hahdamna bul an ni. Lalram thu puangchhuaktu an nih angin, anni chu Jehova’n beiseina dik tak a thuchah keng tûrin a hmang a ni.

2. He buaina khawvêla kan chêng chung pawhin, engvângin nge beiseina dik tak kan neih?

² He khawvêl hian beiseina dik tak a nei lo chu mak kan ti tûr a ni lo. Politics inthlâk thleng reng te, nungchang tlâk chhiatna te, dân bawhchhiatna te, ei leh bâr harsatna te, mi sual beihna te, leh indonate​—hêng thil zawng zawngte hi Diabol-Setana rorêlna khawvêlah chuan kan beisei rêng a ni. (1 Johana 5:19) Mi tam tak chuan nakin hun tûr an lungkham a. Nimahsela, kei ni Jehova chibai bûktute chuan nakin hun beiseina nghet tak kan neih avângin, kan lungkham ve lo. Chu beiseina chu Pathian Thu-a innghat a nih avângin, beiseina dik tak a ni. Jehova leh a Thuah chuan rinna kan nghat a ni; a thusawi apiang a lo thleng dik zêl si a.

3. (a) Engvângin nge Jehova’n Israel leh Judate chungah kut a thlâk dâwn? (b) Engvângin nge Mika thute chu tûn hun atân pawh a nih?

³ Pathian thâwk khuma ziah Mika hrilh lâwkna hian Jehova hminga kal tûrin min tichak a, beiseina dik tak nghah chhan tûr min pe bawk. Mika’n thu a hrilh lâwk lai, B.C.E. kum zabi pariatnaah hian, Pathian thuthlung mite chu Israel leh Judai ram tiin, ram pahnihah an inṭhen a, a pahnih chuan Pathian thuthlung chu an palzût (or, ngaihthah) ve ve a ni. Chu miin a rah chhuah chu nungchang lama tlâk chhiatna te, sakhaw lama kalpênna te, leh nasa taka hausak âtchilhna te a ni a. Chuvângin, Jehova chuan an chungah kut a thlâk dâwn tih a vaukhân a ni. Chu Pathian vaukhânna thute chu Mika hun laia mite tân a ni ngei mai. Mahse, tûn lai dinhmun hi Mika hun lai nêna a inan êm avângin, a thu sawi chu tûn hun atân pawh a ni. Chu chu Mika bung sarihnaa thu pawimawh zual ṭhenkhatte kan zir hunah a lo lang chiang ang.

A Tlângpuia A Târ Lan Chu

4. Mika bung 1 aṭang 3-na hian eng thu nge a fûn?

⁴ Mika lehkhabu chhûnga thu awmte chu tawi têin lo en ta lawk ila. Bung 1-naah chuan Jehova’n Israel leh Juda te bawhchhiatna chu a hailang a. An thil sual tih avângin Israel chu tihchhiat a ni ang a, Juda hremna chuan Jerusalem kawngka meuh pawh a thleng ang. Bung 2-na chuan mi hausa leh thiltitheite’n mi chak lo leh ṭanpuitu nei lote an awpbeh thu a târ lang a. Chutih rualin, Pathian thutiam pawh a târ lang tel bawk a ni. Pathian mite chu inpumkhatnaa hruai khâwm an ni ang. Bung 3-na chuan hnam hruaitute leh zâwlnei sualte chunga Jehova thiam loh chantîrna thu a sawi a. Hruaitute chuan dikna an tikhaw lova, zâwlneite chuan dâwt an sawi a. Chutichung chuan, Mika chu Jehova rorêlna lo thleng tûr chungchâng puang chhuak tûrin thlarau thianghlimin a khat tlat a ni.

5. Mika bung 4 leh 5 thu fûn tlângpui chu eng nge?

⁵ Bung 4-na chuan nî hnuhnûngahte chuan hnam tinte chu tlâng sâng tak chunga tihngheh Jehova inah chuan a zirtîrna dawng tûrin an lo kal khâwm ang tih a sawi lâwk a. Chu mi hma chuan, Juda chu Babulon-ah an tâng ang a; mahse, Jehova’n a chhanhim leh ang. Bung 5-na chuan Mesia chu Judai ram Bethlehema a lo pian tûr thu leh ani chuan a mite chu a vêng ang a, anmahni awpbettu hnamte lakah a chhanhim ang tih a târ lang a ni.

6, 7. Mika hrilh lâwkna bung 6 leh 7-ah eng thilte nge chuang?

⁶ Mika bung 6 chuan thupawi neia inkhinna anga Jehova’n a mite a sawichhiatna a târ lang a. A thiltih eng hian nge anni chu heltîr? Engmahin. A nihna takah chuan, a thil phûtte chu phût âwm hliah hliah a ni. Amah betute chu dik taka thil ti tûr leh khawngaihna ngaina tûr leh thuhnuairawlh taka amah nêna lêng dûn tûrin a duh a ni. Chutianga tih ahnêkin, Israel leh Juda chuan suahsualna kawng an zawh avângin a rah chhuah chu an têl ngei ang.

⁷ A hrilh lâwkna bung hnuhnûng berah Mika chuan a hun laia mite chu an suahsualna avângin a dem a. Mahse, Jehova chunga “nghah peihna” lantîr a tum tlat avângin, Mika chu a lunghnual lo. (Mika 7:7, NW) Mika lehkhabu chu Jehova chuan a mite chungah zah a ngai dâwn tih rinna thusawi hmanga tihtâwp a ni. Chu beiseina chu a thleng dik tih thilthleng chanchin chuan a târ lang a ni. B.C.E. 537-a Jehova’n a mite a hremna a tihtâwp khân, zah ngai takin a la bângte chu anmahni ram ngeiah a din thar leh a ni.

8. Engtin nge Mika bu chhûnga thu awmte hi i kaihtâwi ang?

⁸ Mika hmanga Jehova thil târ lan chu a va ṭha êm! He Pathian thâwk khuma ziah lehkhabu hian Pathianin a rawngbâwla inchhâl si a, rinawm si lote a dâwr dân chungchângah vaukhânna entawn tûr a pe a. Tûn laia thilthlengte pawh hi a sawi lâwk bawk a. Kan beiseina kan tihngheh theih nâna he hun khirh takte chhûnga kan awm dân tûrah pawh, Pathian zilhna thu min pe bawk.

Lal Chungnungber Jehova’n Thu A Sawi

9. Mika 1:2 sawi dânin, eng nge Jehova’n a tih dâwn?

⁹ Tûnah chuan Mika bu hi bih chiang lehzual ta ila. Mika 1:​2 chu heti hian kan chhiar a: “Nangni hnam zawng zawngte u, in vaiin hria ula; aw leilung leh a chhûnga awm zawng zawngte u, ngaithla rawh u: Lalpa PATHIAN, Lalpa chu a biak in thianghlim aṭangin, nangmahni kalhin in chung thu hretu ni rawh se,” tiin. Mika hun laia awm chu lo ni ta la, chûng thute chuan i ngaihtuahna a la ngei ang. Ni e, Jehova chuan a biak in thianghlim aṭangin thu a sawi a, Israel leh Judate chauh ni lo, hmun tina mite hnêna a sawi avângin, chu chuan i ngaihtuahna a la a ni. Mika hun lai chuan, mite chuan Lal Chungnungber Jehova chu rei tak chhûng an ngaihthah a. Chu dinhmun chu a inthlâk thuai ang. Jehova chuan chêt lâk vat a tum si a.

10. Engvângin nge Mika 1:2 thute hi kan tân a pawimawh êm êm?

¹⁰ Tûn laiah pawh chutiang bawk chu a ni. Thu Puan 14:​18-20 chuan Jehova’n a biak in thianghlim aṭangin thu a sawi leh tih a târ lang a. Nakin lawkah chêt a la leh thuai ang a, thilthleng pawimawh tak mai chuan mite chu a sâwi nghîng leh dâwn a ni. Tûn ṭumah erawh chuan, “leia grep rah” suaksual tak chu Jehova thinurna grêp sâwrna khur, Setana kal hmang tihboralnaah chuan paih luh a ni ang.

11. Mika 1:​3, 4-a thu hi eng nge a awmzia?

¹¹ Jehova thiltih tum hi han ngaithla teh. Mika 1:​3, 4 chuan heti hian a sawi: “Ngai teh u, LALPA chu a hmun aṭangin a lo chhuak a, a lo chhuk ang a, lei hmun sângte chu a chîl dâwn si a. Mei bula khawihnûn ang leh hmun âwiha tui khawh thla ang maiin, tlângte chu a hnuaiah chuan an tui ang a, kawrte chu a khi chat ang,” tiin. Jehova chuan a vân lam chênna hmun chu kalsanin, Ram Tiam tlâng leh phaizâwlte chu a chîl tak tak dâwn em? Dâwn lo ve. Chutianga a tih a ngai lo. A duhzâwng tihpuitlin nân chuan lei lamah a ngaihtuahna a pêk ringawt a tâwk a ni. Chu bâkah, kan târ lan tâk thilte chu leilung tak tak ni lovin, a chhûnga chêngte’n an tuar dâwn a ni. Jehova’n a kut a thlâk hunah chuan, mi rinawm lote tân chuan a râpthlâk hle ang​—tlângte chu khawihnûn ang maia tuiral a, lîrnghîng avânga kawrruamte a khi chat ang mai a ni ang.

12, 13. 2 Petera 3:​10-12 nêna inremin, engin nge kan beiseina tichiang?

¹² Mika 1:​3, 4-a hrilh lâwk thu hian, he leia chhiatna râpthlâk tak lo thleng tûr hrilh lâwkna dang pawh a hriatchhuahtîr mai thei che a ni. 2 Petera 3:10 sawi dânin, tirhkoh Petera chuan heti hian a ziak a: “Lalpa nî chu rûkru angin a lo thleng ngei ang, chu mi niah chuan vânte chu nasa taka riin a boral ang a, thil bulte chu meia emralin a awm tawh ang a, lei leh a chhûnga hnathawh awmnate hi a kângral ang,” tiin. Mika hrilh lâwkna ang bawkin, Petera thu pawh hian lei leh vân tak tak a kâwk lo. Pathian ngaihsak lo khawvêl chunga lo thleng tûr hrehawmna nasa tak chu a kâwk a ni.

¹³ Chu chhiatna chu lo thleng dâwn mah se, Mika ang bawkin, Kristiante chuan nakin hun atân beiseina an nei a ni. Engtin nge an neih? Petera lehkha thawn a hnuai lam chânga kan hmuh fuihnate zawmna hmangin. Tirhkoh chuan heti hian a sawi: “Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?” tiin. (2 Petera 3:​11, 12) Thuâwihna kan neih a, kan awm dân a thianghlim a, Pathian ngaihsak thiltiha kan nun kan tihkhah phawt chuan, nakin hun kan beiseina chu a chiang dâwn a ni. Kan beisei kan tihngheh nân Jehova nî chu a lo thleng ngei ngei dâwn tih kan hre reng tûr a ni bawk.

14. Engvângin nge Israel leh Juda chuan hrem an phu?

¹⁴ Jehova chuan hmân laia a mite’n hrem an phu chhan a sawifiah a. Mika 1:5 chuan heti hian a sawi a: “Hei zawng zawng hi Jakobho bawhchhiatna avâng leh Israela chhûngte sualna avâng a ni. Jakobho bawhchhiatna chu eng nge ni? Samari a ni lo vem ni? Juda hmun sângte chu eng nge ni? Jerusalem a ni lo vem ni?” tiin. Israel leh Juda chu Jehova avânga lo awm an ni a. Mahse, a lakah an hel a, an helna chuan an khawpui zah kai tak tak Samari leh Jerusalem pawh a thleng hial a ni.

Thil Suaksual A Hluar

15, 16. Mika hun laia mite khân eng thil suaksual tak tihah nge thiam loh an chan?

¹⁵ Mika hun laia suahsualna nasatzia chu Mika 2:​1, 2 hian chiang takin a sawi a: “An khum laizâwla khawlohna suangtuahtute leh thil ṭha lo ngaihtuah chhuaktute chu an chung a pik e! Zîngah khua a lo vârin an tum ang ngei chuan an ti ta rêng a. Mi lote an awt a, an lâksak a; inte an awt a, an la mai bawk a; mi leh an chhûngte, mi leh an ro chenin an hnuaichhiah a ni,” tiin.

¹⁶ Mi duhâmte chu an ṭhenawmte in leh lote neihsak theih dân ngaihtuah tûrin zânah an meng ṭhîn a. Zîng khua a lo vâr chuan an thil ruahmanna ken tlang tumin an phe vat ṭhîn. Jehova thuthlung hre reng chu ni se la chuan, chutiang thil suaksual chu an ti hauh lo vang. Mosia Dân chuan mi retheite vênhim nân ruahmanna a siam vek a. Dân hnuaiah chuan chhûngkua tumahin an ro atâna an thil neih chu an hloh hlen tûr a ni lo. Mahse, chûng dân thute chu mi duhâmte chuan an bengkhawn lo. Leviticus 19:​18 thu: “Nangmah i inhmangaih angin i ṭhenawm i hmangaih tûr a ni,” tih chu an ngaihthah a ni.

17. Pathian rawngbâwla inchhâlte’n khawvêl sum leh pai lam an ngaih pawimawh ber chuan an chungah eng nge lo thleng thei?

¹⁷ Hei hian Pathian rawngbâwla inchhâlte’n thlarau lam thiltum ngaihthaha khawvêl sum leh pai lam an zawn hmasak hian an chunga thil lo thleng thei chu a târ lang a ni. Paula chuan a hun laia Kristiante chu: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn,” tiin a vaukhân a ni. (1 Timothea 6:9) Miin sum hailuh chu a nuna thil pawimawh bera a dah chuan, Pathian dik lo a bia a tih theih a ni​—Hausakna chu. Chu Pathian dik lo chuan nakin hun atâna beiseina chiang tak min pe thei lo.​—Matthaia 6:24.

18. Mika hun laia hausak âtchilhtute chungah eng nge a lo thlen dâwn?

¹⁸ Mika hun laia mi tam takte chuan sum leh paia innghah chu engmah lo mai a nihzia a harsa zâwngin an zir a. Mika 2:4 sawi dânin Jehova chuan: “Chumi nîah chuan nangmahni demin tehkhin thu an siam ang a, ṭah hla lungchhiatthlâka chhamin, Rawk vekin kan awm ta a nih hi: ka mite chan a tidanglam a: ka hnên ata a tisawn ta a nih hi! Hel hmangte hnênah kan lo a sem darh ta a ni, an ti ang,” tiin a sawi. Ni e, chûng mi in leh lo rawktute chuan an chhûngkaw ro chan ngei chu an chân ang a. Ram danga thawn bo an ni ang a, an thil neihte chu “hel hmangte,” a nih loh leh hnam dang mite chan a lo ni ang. Nakin hun atâna hausak an inbeiseina chu engmah lo mai a ni ang.

19, 20. Jehova ringtu Judate chuan eng thil nge an tawn?

¹⁹ Mahse, Jehova ringtute beiseina chu tihbeidawn a ni ve lo vang. Jehova chu Abrahama leh Davida nêna an thuthlung siamah chuan a rinawm a, Mika anga amah hmangaiha, an mi leh sate Pathian laka inmihranna avânga lungngaite chungah chuan zahngaihna a nei a ni. Mi ṭhate avângin, Pathianin hun a tih takah chuan a din thar leh ang.

²⁰ Chu dinthar lehna chu B.C.E. 537, Babulon a tlûkchhiat a, Juda la châmbângte an in leh lova an kîrleh khân a thleng famkim a ni. Chutih hunah chuan Mika 2:12 chuan thlen famkimna hmasa a nei a. Jehova chuan: “Aw Jakobho, in vaiin ka ko khâwm ngei ang che u a; Israel mi la awm chhunte chu ka hruai khâwm ngei ang; Bozra khaw berâm angin ka dah khâwm ang a: ran rual an hlobet hmuna awm ang maiin, mipui an nih avâng chuan an sa mur mur ang,” tiin a sawi a ni. Jehova chuan hmangaihna a va ngah tak êm! A mite a hrem hnuah Jehova chuan an pi leh pute hnêna ram a pêka kîr leh a, a rawng an bâwl leh chu a phal a ni.

Kan Hun Laia A Anpui Mak Tak

21. Engtin nge kan tûn lai dinhmun leh Mika hun lai dinhmun a inan?

²¹ Mika bung hmasa pahnih kan zir hian, kan hun lai nêna a inannate hian i rilru a khawih lo maw? Mika hun lai ang bawkin, mi tam tak chu Pathian rawngbâwlah an inchhâl a. Mahse, Juda leh Isarel te ang bawkin, an inṭhen hrang a, anmahni zîngah pawh indo an tichhuak bawk a. Kristianna rama mi hausa tam takte pawh hian mi retheite an awpbet bawk a ni. Sakhaw hruaitute lah chuan Bible-in thil chîn ṭha lo a tihte chu an ngaizam tawlh tawlh bawk nên. Chuvângin, Kristianna ram chu “Babylon Khaw Ropui,” sakhaw dik lo lalram nêna a boral thuai tûr pawh hi a mak lo ve! (Thu Puan 18:​1-5) Mahse, Mika hun laia thil awm dân chu zuiin, Jehova chuan he leiah hian chhiahhlawh rinawm châmbâng a nei ang.

22. Eng pâwl pahnihin nge Pathian Rama an beiseina nghat?

²² Kum 1919 khân, hriak thih Kristian rinawmte chuan Kristianna ram nêna an inkungkaihna chu an titâwp ta vek a, hnam zawng zawngte hnênah Lalram chanchin ṭha an hril ṭan a ni. (Matthaia 24:14) Thlarau lam Israel la bângte an zawng hmasa phawt a. Chutah “berâm dang” lâkkhâwmna an ṭan leh a; chûng pâwl pahnihte chu “pâwl khatin, vêngtu pakhat” hnuaiah an awm a ni. (Johana 10:16) Tûnah chuan ram 234-ah Pathian rawngbâwlin awm tawh mah se, hêng Jehova betu mi rinawmte hi “inpumkhatin” an awm a ni. Tûnah chuan berâm huang chu mipa, hmeichhia leh naupangtein a “sa mur mur” tawh a ni. An beiseina chu Pathian ngaihsak lo he khawvêlah hian ni lovin, lei lam paradis-a hruai thleng thuaitu tûr Pathian Ramah an nghat a ni.

23. Engvângin nge i beiseina a chiang tih i rin tlat theih?

²³ Jehova betu rinawmte chungchângah, Mika bung 2 châng tâwpna ber chuan heti hian a sawi: “An lal chu an hmâah a kal a, LALPA chuan an hmâ a hruai a” tiin. Jehova hma hruaina hnuaia i Lal Isua Krista hnung zuiin i inhmu em? I inhmuh chuan, hnehna chu i chang dâwn ngei a, i beisei chu a chiang tihna a ni. Chu mi chungchâng chu Mika hrilh lâwkna pawimawh dangte kan zir hunah a chiang lehzual ang. (w03 8/15)

Engtin Nge I Chhân Ang?

• Mika hun lai khân, engvângin nge Jehova’n Juda leh Israelte chunga kut thlâk a tum?

• Pathian rawngbâwla inchhâlte’n khawvêl hausakna lam an dah pawimawh ber chuan, an chungah eng nge lo thleng thei?

• Mika bung 1 leh 2 kan zir hnuin, engvângin nge i beiseina chu a chiang tih i rin tlat theih?